ទីភ្នាក់ងារព័ត៌មានធំៗបានរាយការណ៍កាលពីសប្តាហ៍មុនថា ក្រុមហ៊ុនបន្ទះឈីប Brite បានផ្តល់សេវាកម្មឌីហ្សាញបន្ទះឈីបដល់ក្រុមហ៊ុនផ្គត់ផ្គង់យោធាចិនយ៉ាងតិច៦ក្រុមហ៊ុន ហើយក្រុមហ៊ុននេះមួយផ្នែកគ្រប់គ្រងដោយក្រុមហ៊ុន Semiconductor Manufacturing International Corporation (SMIC) ដែលជាក្រុមហ៊ុនផលិតបន្ទះឈីប ដ៏ធំបំផុតរបស់ចិន និងដែលត្រូវបានរារាំងមិនឱ្យទទួលបានបច្ចេកវិទ្យាមួយចំនួនរបស់សហរដ្ឋអាម៉េរិក ដោយសារមានទំនាក់ទំនងជាមួយនឹងក្រុមហ៊ុនឧស្សាហកម្មយោធាចិន ប៉ុន្តែក្រុមហ៊ុន SMIC បានបដិសេធចំពោះការចោទប្រកាន់នេះ។
ទោះជាមានទំនាក់ទំនងទាំងនោះហើយក៏ដោយ ក៏ក្រុមហ៊ុន Brite នៅតែអាចទទួលបានការវិនិយោគ និងបច្ចេកវិទ្យារបស់សហរដ្ឋអាម៉េរិក ដដែលរួមទាំងកម្មវិធីឌីហ្សាញបន្ទះឈីបពីក្រុមហ៊ុនអាម៉េរិក ដូចជាស៊ីនណូបស៊ីស (Synopsys) និងខាឌិនស៍ ឌីហ្សាញ (Cadence Design) ជាដើម។
ក្នុងលិខិតមួយចុះកាលពីថ្ងៃពុធ ដើមសប្ដាហ៍នេះ ដែលត្រូវបានផ្សាយលើកដំបូងដោយទីភ្នាក់ងារព័ត៌មានរ៉យទ័រ លោក ម៉ាកូ រូប៊ីអូ បាននិយាយថា ការដែលក្រុមហ៊ុន Brite និងក្រុមហ៊ុនបច្ចេកវិទ្យាចិន ផ្សេងទៀតអាចទទួលបានបច្ចេកវិទ្យាអាម៉េរិក ដោយសេរីនេះបង្ហាញថា កម្មវិធីត្រួតពិនិត្យការនាំចេញនាពេលបច្ចុប្បន្នកំពុងធ្វើឱ្យចិនរះឡើងជាមហាអំណាចបច្ចេកវិទ្យាមួយក្នុងពិភពលោក។
លោក ម៉ាកូ រូប៊ីអូ បានលើកឡើងតាមរយៈលិខិតផ្ញើជូនរដ្ឋមន្ត្រីក្រសួងពាណិជ្ជកម្មអាម៉េរិក គឺលោកស្រី ហ្គីណា រ៉ៃម៉ុនដូ ថា សកម្មភាពរបស់ក្រុមហ៊ុនចិន Brite នេះបានបង្ហាញថា សហរដ្ឋអាម៉េរិកចាំបាច់ត្រូវតែចាត់វិធានាការនៅពេលនេះជាបន្ទាន់ដើម្បីរារាំងមូលដ្ឋានឧស្សាហកម្មបន្ទះឈីបរបស់ចិន កុំឱ្យមានកម្លាំងកាន់តែខ្លាំង។ ដូច្នេះហើយលោកបានជំរុញឱ្យលោកស្រី រ៉ៃម៉ុនដូ ដាក់លក្ខខណ្ឌតម្រូវលើក្រុមហ៊ុន Brite ដូចគ្នានឹងលក្ខខណ្ឌតម្រូវដាក់លើក្រុមហ៊ុន SMIC អ៊ីចឹងដែរសម្រាប់ការទទួលបានអាជ្ញាប័ណ្ណ៕
អត្ថបទ៖ សុខ ជា
