អ្នកឧកញ៉ា គួច ម៉េងលី ស្ថាបនិក នាយកប្រតិបត្តិក្រុមហ៊ុន ម៉េងលី ជេ. គួច អេឌ្យូខេសិន កត់សម្គាល់ឃើញថា បច្ចុប្បន្នធនធានមនុស្សជំនាញផ្នែកវិទ្យាសាស្រ្តនៅកម្ពុជា ហាក់កំពុងខ្វះខាត ដែលទាមទារឱ្យសិស្សានុសិស្សគួរងាកពីវិទ្យាសាស្រ្តសង្គមមកផ្ដោតលើវិទ្យាសាស្រ្តពិតឱ្យបានច្រើនជាងនេះ ដើម្បីចូលរួមអភិវឌ្ឍសង្គមជាតិ ផ្នែកស្ទែម និងបច្ចេកវិទ្យា។ បើតាមអ្នកជំនាញរូបនេះ បច្ចុប្បន្នមានមុខជំនាញជាច្រើនដូចជាវិទ្យាសាស្រ្តកុំព្យូទ័រ ទីផ្សារ ហិរញ្ញវត្ថុ វិភាគទិន្នន័យ អ្នកសរសេរកូដ អ្នកឌីស្សាញ ពោលគឺផ្នែកខាងវិទ្យាសាស្រ្តតែម្ដង ដែលកំពុងមានតម្រូវការ តែយ៉ាងណាបច្ចុប្បន្ននិស្សិតភាគច្រើនហាក់ខ្វះជំនាញ និងសមត្ថភាពដែលជាហេតុជួបការលំបាកអំឡុងពេលបំពេញការងារ។ អ្នកវិនិយោគក្នុងវិស័យអប់រំដ៏ល្បីល្បាញរូបនេះសង្កេតឃើញថា តម្រូវការអ្នកជំនាញខាងដោះស្រាយបញ្ហាផ្លូវចិត្ត និងប្រឹក្សាយោបល់ផ្សេងទៀត ក៏កំពុងមានតម្រូវផងដែរ។ ទន្ទឹមនឹងនេះ អ្នកឧកញ៉ា ស្នើដល់ភាគីពាក់ព័ន្ធគួរដាក់ចេញនូវគោលការណ៍ថ្មី និងបន្ថែមគ្រឹះស្ថានអប់រំនៅមុខជំនាញផ្នែកវិទ្យាសាស្រ្តឱ្យបានច្រើនទីតាំងបន្ថែមទៀតជាមួយផ្តល់តម្លៃសមរម្យ ដើម្បីឱ្យយុវជនអាចឆ្លើយតបជាមួយទិដ្ឋភាពការងារជាក់ស្ដែង។
ជាមួយគ្នានេះ ឧកញ៉ា ប៉ិច បូឡែន អគ្គនាយកក្រុមហ៊ុន វេសឡាញ អេខ្យូខេសិនគ្រុប កត់សម្គាល់ឃើញថា សិស្សនិស្សិតដែលប្រលងជាប់បាក់ឌុបនៅឆ្នាំនេះមានជម្រើសច្រើនក្នុងការជ្រើសរើសមុខជំនាញទាំងសិក្សាបន្តនៅសាកលវិទ្យាល័យ និងសិក្សាផ្នែកបណ្តុះបណ្ដាលវិជ្ជាជីវៈបច្ចេកទេសជាដើម ។ តែយ៉ាងណាសិស្សនិស្សិតត្រូវសិក្សាពង្រឹងសមត្ថភាពបន្ថែម មុននឹងចូលរៀនមុខជំនាញ ដែលខ្លួនបានជ្រើសរើស ដើម្បីឱ្យការរៀនទទួលបានជំនាញច្បាស់លាស់ត្រឡប់មកវិញ។ បើតាមអ្នកជំនាញក្នុងវិស័យអប់រំរូបនេះ បច្ចុប្បន្នមានមុខជំនាញជាច្រើនដែលកំពុងមានសក្ដានុពលដូចជាជំនាញកសិកម្ម ផ្នែកសេវាកម្ម ពេទ្យ មេធាវី ទីផ្សារ វិស្វករ ហិរញ្ញាវត្ថុ អាជីវកម្ម និងគ្រូបង្រៀនជាដើម។
បើតាមអ្នកឧកញ៉ា គួច ម៉េងលី រដ្ឋាភិបាល ក៏ដូចជាក្រសួងអប់រំ យុវជន និងកីឡា គួរតែបន្ថែមចំនួនគ្រូបង្រៀន និងបើកសាលាគរុកោសល្យឱ្យច្រើនបន្ថែមទៀត ដោយសម្រួលឱ្យមានការបន្ធូរបន្ថយប្រលងចូល ដោយសារបច្ចុប្បន្នវិស័យអប់រំ កំពុងមានតម្រូវការគ្រូបង្រៀន។ អ្នកឧកញ៉ា បានសង្កត់ធ្ងន់ថា ប្រសិនបើស្ថាប័នរដ្ឋខ្វះខាតថវិកាទំនុកបម្រុង គួរតែបង្វែរឱ្យវិស័យឯកជនអាចមានឱកាសចូលរួមចំណែកកសាងនូវធនធានគ្រូបង្រៀន ដើម្បីឱ្យមានគ្រូបង្គោលដែលអាចបណ្ដុះបណ្ដាលចំណេះជំនាញបន្តដល់សិស្សជំនាន់ក្រោយៗទៀត៕
អត្ថបទ៖ ជា ម៉ារ៉ា
