យ៉ាងណាមិញអ្នកជំនាញក្នុងវិស័យទេសចរណ៍យល់ឃើញថា កម្ពុជាគួរបង្កើនការផ្សព្វផ្សាយទេសចរណ៍ឱ្យបានកាន់តែទូលំទូលាយបន្ថែមទៀតទៅកាន់ពិភពលោក ពោលគឺចាប់ផ្តើមពីប្រជាជនគ្រប់រូប ដែលប្រជាជនម្នាក់ គឺជាទូតទេសចរណ៍ម្នាក់សម្រាប់អភិវឌ្ឍវិស័យទេសចរណ៍កម្ពុជា។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា បានគូសបញ្ជាក់ថា វិស័យទេសចរណ៍ គឺជាវិស័យសក្តានុពលមួយ ដើម្បីចូលរួមអភិវឌ្ឍសេដ្ឋកិច្ចជាតិ ហើយវិស័យនេះ ក៏ជាចលករក្នុងការជួយជំរុញ និងទ្រទ្រង់វិស័យផ្សេងៗទៀតដែរ តួយ៉ាងនៅពេលវិស័យទេសចរណ៍មានការរីកចម្រើន វិស័យផ្សេងទៀតក៏មានការរីកចម្រើនតាមនឹងដែរ ទាំងវិស័យកសិកម្ម ឧស្សហកម្ម អចលនទ្រព្យ ការវិនិយោគ និងវិស័យផ្សេងៗទៀត។
បើតាមលោក ធួន ស៊ីណាន ដើម្បីឱ្យវិស័យទេសចរណ៍កម្ពុជា អាចរីកចម្រើន និងលេចធ្លោបាននោះ គឺទាមទារឱ្យមានការផ្សព្វផ្សាយឱ្យបានទូលំទូលាយទៅកាន់ពិភពលោក ហើយការផ្សព្វផ្សាយនេះទៀតសោត គឺមិនត្រូវពឹងផ្អែកតែទៅលើរាជរដ្ឋាភិបាល ឬក្រសួងទេសចរណ៍តែម្យ៉ាងនោះទេ តែទាមទារឱ្យមានការចូលរួមពីគ្រប់ភាគីពាក់ព័ន្ធទាំងអស់ ពោលគឺប្រជាជនម្នាក់ គឺជាទូតទេសចរណ៍ម្នាក់ សម្រាប់បង្ហាញពីភាពអស្ចារ្យ និងសក្កានុពលនៃវិស័យទេសចរណ៍របស់កម្ពុជា។
អត្ថបទគួរអាន
ជាមួយគ្នានេះលោក ធួន ស៊ីណាន បានអះអាងថា កត្តាសំខាន់មួយទៀតដើម្បីជំរុញវិស័យទេសចរណ៍ឱ្យកាន់តែរីកចម្រើននោះ គឺរាជរដ្ឋាភិបាលត្រូវគិតគូរអំពីការរៀបចំឱ្យមានព្រឹត្តិការណ៍កម្រិតអន្តរជាតិនៅក្នុងប្រទេសកម្ពុជា ឱ្យបានច្រើន ពិសេសនៅតាមខេត្តដែលមានសក្កានុពលផងដែរ ជាជាងការរៀបចំឱ្យមានតែនៅរាជធានីភ្នំពេញ ដើម្បីទាក់ទាញទាំងភ្ញៀវទេសចរផង និងភ្ញៀវជាធុរជន និងពាណិជ្ជករផង។ ម្យ៉ាងទៀត ស្របពេលដែលការវិវត្តរបស់បច្ចេកវិទ្យាកាន់តែទំនើបនោះ ការផ្សព្វផ្សាយអំពីវិស័យទេសចរណ៍កម្ពុជាតាមរយៈបុគ្គលដែលមានប្រជាប្រិយភាពនៅលើបណ្តាញសង្គមរបស់ប្រទេសផ្សេងៗនោះ ក៏ជាកត្តាសំខាន់ដែលធ្វើឱ្យពិភពលោកកាន់តែស្គាល់ពីកម្ពុជាផងដែរ។
សូមជម្រាបថា តាមរបាយការណ៍របស់ក្រសួងទេសចរណ៍ នៅត្រីមាសទី១ឆ្នាំ២០២៤ កម្ពុជាទទួលបានភ្ញៀវទេសចរបរទេសជាង១លាន៥សែននាក់ មានការកើនឡើងជាង២២% បើធៀបនឹងរយៈពេលដូចគ្នាកាលពីឆ្នាំមុន។ ក្នុងចំណោមភ្ញៀវទេសចរបរទេសទាំងនេះ ភ្ញៀវទេសចរមកពីអឺរ៉ុបមានចំនួនជាង២១ម៉ឺននាក់ មានកើនឡើងជាង២១% បើធៀបនឹងរយៈពេលដូចគ្នាកាលពីឆ្នាំមុន។ ក្រសួងទេសចរណ៍រំពឹងថា វិស័យទេសចរណ៍អន្តរជាតិរបស់កម្ពុជា នៅឆ្នាំនេះនឹងអាចវិលទៅរកភាពល្អប្រសើរដូចមុនពេលមិនទាន់ផ្ទុះវិបត្តិកូវីដ-១៩៕
None
