រដ្ឋមន្ត្រីសន្តិសុខមាតុភូមិអាម៉េរិក លោកស្រី គ្រីស្ទី ណូម (Kristi Noem) បានប្រកាសតាមបណ្តាញសង្គម X កាលពីថ្ងៃព្រហស្បតិ៍ ដោយបញ្ជាឱ្យបញ្ចប់កម្មវិធីផ្លាស់ប្ដូរនិស្សិតអន្តរជាតិ នៅសកលវិទ្យាល័យហាវើដ ដ៏ល្បីល្បាញនៅសហរដ្ឋអាម៉េរិក។ តាមរយៈវិធានការនេះ មានន័យថា សកលវិទ្យាល័យនេះមិនអាចទទួលយកនិស្សិតអន្តរជាតិ បានទៀតឡើយ ចាប់តាំងពីពេលនេះតទៅ ហើយនិស្សិតអន្តរជាតិណាដែលបានចុះឈ្មោះចូលរៀននៅសកលវិទ្យាល័យនេះរួចហើយ ត្រូវផ្ទេរឱ្យទៅរៀននៅសកលវិទ្យាល័យផ្សេង បើមិនដូច្នេះទេ ពួកគេនឹងបាត់បង់ឋានៈស្របច្បាប់ស្នាក់នៅសហរដ្ឋអាម៉េរិក។
ក្រសួងនេះ បានចាត់ទុកការដាក់ចេញវិធានការរបស់លោក ត្រាំ នេះ ជាបំណងល្អដើម្បីជួយសកលវិទ្យាល័យហាវើដក្នុងការប្រយុទ្ធប្រឆាំងនឹងអំពើហិង្សា ការប្រឆាំងសាសនា និងការសម្របសម្រួលជាមួយនឹងបក្សកុម្មុយនីស្តចិន នៅក្នុងបរិវេណសាលាមួយនេះ។
ឆ្លើយតបនឹងចំណាត់ការនេះ សកលវិទ្យាល័យហាវើដ បានចេញសេចក្ដីថ្លែងការណ៍មួយដោយបានហៅចំណាត់ការនេះថា ខុសច្បាប់ និងជាការសងសឹកមួយ ហើយសកលវិទ្យាល័យបានប្ដេជ្ញាចិត្តយ៉ាងម៉ឺងម៉ាត់ថា នឹងនៅតែរក្សាលទ្ធភាពរបស់ខ្លួនក្នុងការទទួលយកនិស្សិត និងអ្នកប្រាជ្ញអន្តរជាតិ ដែលមកពីជាង១៤០ប្រទេសជាបន្តទៀត។
សូមរំលឹកថា សកលវិទ្យាល័យហាវើដ បានចុះឈ្មោះនិស្សិតអន្តរជាតិ ជិត៧ពាន់នាក់ ក្នុងឆ្នាំសិក្សា២០២៤-២០២៥ ដែលស្មើនឹង២៧%នៃការចុះឈ្មោះចូលរៀនសរុបរបស់សាលាដ៏ល្បីជាងគេបំផុតលើពិភពលោកមួយនេះ៕
ដោយ៖ សុខ មង្គល
