មតិជាច្រើនបានលើកឡើងថា លោក ដូណាល់ ត្រាំ ប្រធានាធិបតីអាម៉េរិក កំពុងស្វែងរកច្រកដើម្បីអាចឈរឈ្មោះក្នុងការបោះឆ្នោតជ្រើសរើសប្រធានាធិបតីនៅអាណត្តិក្រោយបន្តទៀត ក្រោយអាណត្តិទី២របស់លោកត្រូវបានបញ្ចប់។ ពាក់ព័ន្ធបញ្ហានេះ លោក ត្រាំ ប្រាប់យកព័ត៌មានក្នុងអំឡុងពេលលោកធ្វើដំណើរទៅកាន់ប្រទេសកូរ៉េខាងត្បូងថា ច្បាប់អាម៉េរិក មិនអនុញ្ញាតឱ្យលោកឈរឈ្មោះសម្រាប់អាណត្តិទី៣នោះទេ ហើយលោកក៏គ្មានបំណងប្រឆាំងនឹងច្បាប់នេះដែរ។ លោក ត្រាំ បានប្រាប់អ្នកយកព័ត៌មាននៅតាមផ្លូវទៅកាន់ប្រទេសកូរ៉េខាងត្បូងថា “ប្រសិនបើអ្នកអានច្បាប់។
ជាមួយគ្នានោះ លោក ត្រាំ ក៏បានច្រានចោលលទ្ធភាពក្នុងការឈរឈ្មោះជាអនុប្រធានាធិបតីនៅឆ្នាំ ២០២៨ ផងដែរ។ ការច្រានចោលនេះធ្វើឡើងក្រោយសារព័ត៌មាន Aljazeera ចុះផ្សាយថា ក្រុមអ្នកគាំទ្រ របស់លោក ត្រាំ មួយចំនួនកំពុងសិក្សាច្បាប់ និងផ្តល់យោបល់ឱ្យលោកឈរឈ្មោះជាអនុប្រធានាធិបតី ហើយជ្រើសរើសបេក្ខភាពម្នាក់ឲ្យឈរឈ្មោះប្រធានាធិបតី ក្រោយមកឱ្យប្រធានាធិបតីជាប់ឆ្នោតលាលែង ហើយលោកចូលកាន់តំណែងប្រធានាធិបតីជំនួស។ ពាក់ព័ន្ធនឹងច្រកនេះ លោក ត្រាំ បានបញ្ជក់ប្រាប់អ្នកយកព័ត៌មាននៅលើយន្តហោះ Air Force One ថា ច្បាប់ក៏មិនអនុញ្ញាតិឲ្យធ្វើបែបនេះដែរ។
យ៉ាងណាមិញ លោក ដូណាល់ ត្រាំ បានស្នើឱ្យអនុប្រធានាធិបតីអាម៉េរិក លោក ជេឌី វេន (JD Vance) និងរដ្ឋមន្ត្រីការបរទេស ម៉ាកូ រូប៊ីអូ (Marco Rubio) ពិចារណាស្នងដំណែងបន្តពីលោកនៅក្នុងការបោះឆ្នោតនៅឆ្នាំ២០២៨៕
ដោយៈ សរ សុជាតិ
