ប្រធានាធិបតីអាម៉េរិក លោក ដូណាល់ ត្រាំ បានប្រាប់អ្នកយកព័ត៌មានដែលរួមដំណើរជាមួយលោក ដោយទំនុកចិត្តថា សង្រ្គាមនៅតំបន់ហ្គាហ្សាបានបញ្ចប់នៅពេលលោកបានចេញដំណើរពីទីក្រុងវ៉ាស៊ីនតោន ទៅតំបន់មជ្ឈិមបូព៌ា សម្រាប់ដំណើរពិសេសមួយ ហើយថា ក្រុមហាម៉ាស់ ក៏គ្រោងនឹងដោះលែងចំណាប់ខ្មាំងត្រឡប់ទៅផ្ទះវិញផងដែរ។
បើតាមការអះអាងរបស់លោក ត្រាំ កាលណាក្រុមហាម៉ាស់បានប្រគល់ចំណាប់ខ្មាំងចំនួន៤៧នាក់ទាំងនៅរស់ និងស្លាប់ហើយ ប្រទេសអ៊ីស្រាអែលនឹងចាប់ផ្ដើមដោះលែងអ្នកទោសប៉ាឡេស្ទីនប្រហែល២ពាន់នាក់ជាថ្នូរនឹងការដោះលែងនោះ។ ប៉ុន្តែក្រុមអ្នកចរចានៅមិនទាន់ចុះសម្រុងគ្នានៅឡើយទេ ជុំវិញការរៀបចំចុងក្រោយមួយចំនួនដោយមានប្រភពពីក្រុមហាម៉ាស់បានប្រាប់ទីភ្នាក់ងារ AFP ថា ក្រុមនេះទទូចសុំឱ្យអ៊ីស្រាអែល បញ្ចូលមេដឹកនាំជាន់ខ្ពស់ប៉ាឡេស្ទីនចំនួន៧នាក់ទៅក្នុងបញ្ជីអ្នកទោសប៉ាឡេស្ទីន ដែលត្រូវបានដោះលែងនោះ។
លោក ត្រាំ ត្រូវបានរំពឹងថា នឹងទៅដល់អ៊ីស្រាអែល នៅក្រោយការដោះលែងចំណាប់ខ្មាំង ហើយនឹងថ្លែងសុន្ទរកថា នៅក្នុងសភារបស់អ៊ីស្រាអែល មុនធ្វើដំណើរទៅកាន់ប្រទេសអេហ្ស៊ីប ដើម្បីធ្វើជាម្ចាស់ផ្ទះកិច្ចប្រជុំក្រុមមេដឹកនាំពិភពលោក ដើម្បីគាំទ្រផែនការរបស់លោកក្នុងការបញ្ចប់សង្រ្គាមនៅតំបន់ហ្គាហ្សារយៈពេលពីរឆ្នាំមកនេះ និងលើកកម្ពស់សន្តិភាពនៅតំបន់មជ្ឈិមបូព៌ា៕
ដោយ៖ សុខ មង្គល
