លោក ត្រាំ បញ្ជាឱ្យបញ្ជូនកងទ័ពម៉ារីន៧០០នាក់ ទៅទីក្រុងឡូសអេនជឺឡិស ដើម្បីគ្រប់គ្រងបាតុកម្ម

មន្ត្រីរដ្ឋបាលរបស់លោក ត្រាំ បាននិយាយថា ទាហានម៉ារីនប្រមាណ៧០០នាក់ ដែលឈរជើងនៅភាគខាងត្បូងនៃរដ្ឋកាលីហ្វ័រញ៉ា ត្រូវបានគេរំពឹងថា នឹងត្រូវបញ្ជូនទៅដល់ទីក្រុងឡូសអេនជឺឡិស នៅយប់ថ្ងៃចន្ទ ឬព្រឹកថ្ងៃអង្គារ ដែលជាផ្នែកមួយនៃយុទ្ធសាស្រ្តសហព័ន្ធ ដើម្បីបង្ក្រាបបាតុកម្មតាមដងផ្លូវប្រឆាំងនឹងការឆ្មក់ចាប់ជនអន្តោប្រវេសន៍នៅក្នុងរដ្ឋនេះ ដែលជាផ្នែកមួយនៃកិច្ចខិតខំរបស់លោក ត្រាំ នៅក្នុងអាណត្តិទីពីរនេះ។

ទោះជាបេសកកម្មរបស់កងម៉ារីននេះ ធ្វើឡើងក្នុងបំណងការពារបុគ្គលិក និងទ្រព្យសម្បត្តិសហព័ន្ធជាបណ្តោះអាសន្នទម្រាំតែកងកម្លាំងឆ្មាំជាតិ ចំនួន៤ពាន់នាក់ ទៅដល់ទីក្រុងនេះក៏ពិតមែន ប៉ុន្តែការដាក់ពង្រាយនេះ គឺជាការប្រើប្រាស់កម្លាំងយោធាដ៏វិសេសមួយក្នុងការគាំទ្រដល់ប្រតិបត្តិការរបស់ប៉ូលិស ហើយវាបានកើតឡើងដោយសារតែមានការជំទាស់ពីថ្នាក់ដឹកនាំរដ្ឋ និងមូលដ្ឋានដែលមិនបានស្នើសុំជំនួយបែបនេះ។

ទន្ទឹមនឹងនេះ រដ្ឋមន្ត្រីសន្តិសុខមាតុភូមិអាម៉េរិក លោកស្រី គ្រីស្ទី ណូម (Kristi Noem) បានសន្យាថា នឹងបន្តអនុវត្តប្រតិបត្តិការកាន់តែខ្លាំងឡើងដើម្បីបង្រ្កាបអ្នកសង្ស័យដែលបានបំពានលើច្បាប់អន្តោប្រវេសន៍ដោយពង្រីកការបង្រ្កាបដែលបង្កឱ្យមានការតវ៉ានេះឡើង។ មន្ត្រីរបស់លោក ត្រាំ បានចាត់ទុកការតវ៉ានេះថា គ្មានច្បាប់ទម្លាប់ និងបានស្តីបន្ទោសថ្នាក់ដឹកនាំរដ្ឋនេះ និងគណបក្សប្រជាធិបតេយ្យមូលដ្ឋានចំពោះការអនុញ្ញាតឱ្យមានចលាចលនេះកើតឡើង និងការជួយការពារជនអន្តោប្រវេសន៍ដែលគ្មានឯកសារត្រឹមត្រូវរស់នៅលើទឹកដីអាម៉េរិក។

ប្រតិបត្តិការអនុវត្តច្បាប់របស់យោធា និងសហព័ន្ធនេះបានធ្វើឱ្យគណបក្សនយោបាយធំៗទាំងពីររបស់អាម៉េរិក មានភាពរកាំរកូសបន្ថែមទៀត ខណៈលោក ត្រាំ បានគំរាមចាប់ខ្លួនអភិបាលរដ្ឋកាលីហ្វ័រញ៉ាលោក ហ្គេវីន ញូវសាំ (Gavin Newsom) ពីបទប្រឆាំងនឹងការបង្រ្កាបរបស់សហព័ន្ធ។ រដ្ឋកាលីហ្វ័រញ៉ា បានប្តឹងរដ្ឋបាលរបស់លោក ត្រាំ ដើម្បីរារាំងការដាក់ពង្រាយឆ្មាំជាតិ និងកងម៉ារីន ដោយលើកហេតុផលថា វាជាការបំពានច្បាប់សហព័ន្ធ និងអធិបតេយ្យរបស់រដ្ឋនេះ។

ចំណែកសមាជិកព្រឹទ្ធសភាលោក ជែក រីដ (Jack Reed) មកពីគណបក្សប្រជាធិបតេយ្យបាននិយាយថា លោក ត្រាំ មានបញ្ហាយ៉ាងធ្ងន់ធ្ងរចំពោះការបញ្ហាឱ្យដាក់ពង្រាយកងម៉ារីន ព្រោះទង្វើ ដែលមិនធ្លាប់មានពីមុនមកនេះបានគំរាមកំហែងដល់ការបង្វែស្ថានការណ៍តានតឹងឱ្យទៅជាវិបត្តិជាតិ៕

ដោយ៖ សុខ មង្គល