លោក ដូណាល់ ត្រាំ ប្រធានាធិបតីសហរដ្ឋអាម៉េរិក បានប្រាប់វេទិកាសេដ្ឋកិច្ចពិភពលោក ពីទីក្រុងវ៉ាស៊ីនតោនថា មកដល់ពេលនេះអ្វីដែលសហរដ្ឋអាម៉េរិក ចង់បានបំផុត គឺភាពយុត្តិធម៌លើការធ្វើពាណិជ្ជកម្មជាមួយនឹងប្រទេសចិន ហើយលោកបានអះអាងថា លោកនិងសមភាគីចិន គឺលោក ស៊ី ជីនពីង នៅតែមានទំនាក់ទំនងដ៏អស្ចារ្យ។ ប្រធានាធិបតីសហរដ្ឋអាម៉េរិក ទើបឡើងកាន់តំណែងរូបនេះ បានសង្កត់ធ្ងន់ថា ឱនភាពពាណិជ្ជកម្មរបស់សហរដ្ឋអាម៉េរិក ជាមួយប្រទេសចិន នៅតែស្ថិតក្នុងកម្រិតខ្ពស់ ដូច្នេះសហរដ្ឋអាម៉េរិក ត្រូវតែធ្វើឲ្យមានតុល្យភាពឡើងវិញ។
បច្ចុប្បន្នលោក ដូណាល់ ត្រាំ កំពុងសើររើឡើងវិញសឹងតែទាំងអស់ពាក់ព័ន្ធនឹងគោលនយោបាយពន្ធ ដែលលោកបាននិយាយនៅអាណត្តិមុន បន្ទាប់ពីលោកបានធ្លាក់ចេញពីអំណាចអស់រយៈពេល៤ឆ្នាំកន្លងមកនេះ។ ជាក់ស្តែង លោក កំពុងប្រាប់ឲ្យក្រុមអ្នកជំនាញការអាម៉េរិក ស៊ើបអង្កេតរកមូលហេតុនៃឱនភាពពាណិជ្ជកម្មប្រចាំឆ្នាំជាមួយនឹងចិន។ ហើយជាជំហានដំបូង លោក ត្រាំ គ្រោងដាក់ពន្ធលើទំនិញនាំចូលពីចិន១០% សិន ដែលអាចនឹងអនុវត្តចាប់ពីថ្ងៃទី១ ខែកុម្ភៈ តទៅ។
ដោយឡែកលោក ឌីង ស៊ូសៀន (Ding Xuexiang) ឧបនាយករដ្ឋមន្ត្រីចិន បាននិយាយនៅទីក្រុងដាវូស ដោយផ្ទាល់ កាលពីថ្ងៃអង្គារ ថា ប្រទេសចិន មិនបានស្វែងរកអតិរេកពាណិជ្ជកម្មជាមួយប្រទេសណាមួយនោះទេ ហើយបានឆ្លៀតពន្លយពាក្យឌឺដងថា ការការពារនិយមនឹងមិនអាចជួយអ្វីបានឡើយ។
ការិយាល័យស្ថិតិអាម៉េរិក បានអះអាងថា ពាណិជ្ជកម្មទ្វេភាគីចិន និងអាម៉េរិក មានទំហំជាង៥៣២ពាន់លានដុល្លារ ដោយអាម៉េរិក មានឱនភាពពាណិជ្ជកម្មជាង២៧០ពាន់លានដុល្លារ។ អាម៉េរិក បាននាំចេញទំនិញទៅចិន មានតម្លៃត្រឹមជិត១៣១ពាន់លានប៉ុណ្ណោះ តែបាននាំចូលពីចិន មកវិញ មានតម្លៃរហូតដល់៤០១ពាន់លានដុល្លារ៕
ដោយៈ សរ សុជាតិ
