យោងតាមការវិភាគលើព័ត៌មានដ៏រសើបដែលក្រុមហ៊ុនធំៗទូទាំងពិភពលោកទម្លាយឱ្យដឹងបង្ហាញថា គិតមកទល់ពេលនេះ ការដាក់ពន្ធគយរបស់ប្រធានាធិបតីអាម៉េរិក លោក ដូណាល់ ត្រាំ បានធ្វើឱ្យក្រុមហ៊ុនធំៗទូទាំងពិភពលោកខាតបង់ធ្ងន់ករហូតដល់ទៅជាង៣៤ពាន់លានដុល្លារអាម៉េរិក ក្រោយវិធានការពន្ធនេះបានធ្វើឱ្យការលក់ធ្លាក់ចុះ និងថ្លៃដើមកើនឡើងខ្ពស់ ហើយតាមការរំពឹងទុក តួលេខនៃការខាតបង់នេះទំនងជាបន្តកើនថែមទៀតគួរឱ្យព្រួយបារម្ភ ខណៈដែលភាពមិនប្រាកដប្រជាជុំវិញពន្ធគយនេះកំពុងធ្វើឱ្យក្រុមហ៊ុធំៗទូទាំងពិភពលោកពិបាកនឹងសម្រេចចិត្តនៅក្នុងអាជីវកម្មរបស់ខ្លួន។
នៅទូទាំងសហរដ្ឋអាម៉េរិក ទ្វីបអាស៊ី និងអឺរ៉ុប ក្រុមហ៊ុនធំៗរួមមានដូចជា ក្រុមហ៊ុន Apple ក្រុមហ៊ុន Ford ក្រុមហ៊ុន Porsche និងក្រុមហ៊ុន Sony ជាដើម បានបន្ទាបការព្យាករអំពីប្រាក់ចំណេញរបស់ខ្លួនរួចទៅហើយ ហើយភាគច្រើនលើសលប់នៃក្រុមហ៊ុនទាំងនោះបានគូសបញ្ជាក់ថា គោលនយោបាយពាណិជ្ជកម្មដែលក្រឡិចក្រឡាច់ពិបាកប៉ាន់ស្មានរបស់លោក ដូណាល់ ត្រាំ ធ្វើឱ្យខ្លួនមិនអាចប៉ាន់ស្មានពីថ្លៃដើមឱ្យបានត្រឹមត្រូវនោះឡើយ។
ការវិភាគនេះធ្វើឡើងដោយផ្អែកលើទិន្នន័យ ដែលប្រមូលបានពីសេចក្ដីថ្លែងការណ៍របស់ក្រុមហ៊ុន ឯកសារបទប្បញ្ញត្តិ សន្និសីទ និងការចុះផ្សាយរបស់ប្រព័ន្ធផ្សព្វផ្សាយនានា ដើម្បីបង្ហាញពីផលប៉ះពាល់ដែលពន្ធគយរបស់លោក ដូណាល់ ត្រាំ បានបង្កឡើងទៅលើក្រុមហ៊ុននានាទូទាំងពិភពលោក។
ការខាតបង់ក្នុងទំហំរហូតដល់ទៅជាង៣៤ពាន់លានដុល្លារនេះ គឺជាចំនួនប៉ាន់ប្រមាណសរុបពីក្រុមហ៊ុនចំនួន៣២ ដែលបានផ្សាយមូលបត្រនៅផ្សារហ៊ុនអាម៉េរិក S&P 500 ក្រុមហ៊ុនចំនួន៣នៅផ្សារហ៊ុនអឺរ៉ុប STOXX 600 និងក្រុមហ៊ុនចំនួន២១ នៅផ្សារហ៊ុនជប៉ុន Nikkei 225។
អ្វីដែលជាការកត់សម្គាល់ ក្រុមអ្នកជំនាញសេដ្ឋកិច្ចបានលើកឡើងថា ការខាតបង់ពិតប្រាកដប្រហែលជាមានទំហំធំជាងនេះច្រើនដង បើធៀបនឹងអ្វីដែលក្រុមហ៊ុននានា បានទម្លាយឱ្យដឹងគិតមកទល់ពេលនេះ។
ទោះបីជាភាពតានតឹងរវាងសហរដ្ឋអាម៉រិក និងចិន បានធូរស្រាលខ្លះដោយសារមហាអំណាចទាំងពីរនេះបានព្រមព្រៀងគ្នា ផ្អាកធ្វើសង្គ្រាមពន្ធគយជាបណ្ដោះអាសន្នសម្រាប់រយៈពេល៩០ថ្ងៃ ហើយលោក ដូណាល់ ត្រាំ បានដកថយពីការគំរាមដំឡើងពន្ធលើអឺរ៉ុប យ៉ាងណាក្ដី ក៏កិច្ចព្រមព្រៀងពាណិជ្ជកម្មដែលនឹងសម្រេចបានចុងក្រោយស្ថិតក្នុងភាពមិនប្រាកដប្រជានៅឡើយ។
ហើយកាលពីពេលថ្មីៗនេះ តុលាការពាណិជ្ជកម្មអាម៉េរិក បានសម្រេចរារាំងការអនុវត្តពន្ធគយថ្មីៗដាក់ដោយលោក ដូណាល់ ត្រាំ ក្រោមហេតុផលថា ការដាក់ពន្ធគយថ្មីៗទាំងនេះខុសពីអ្វីដែលរដ្ឋធម្មនុញ្ញបានកំណត់។ ស្ថិតក្នុងបរិយាកាសមិនប្រាកដប្រជាបែបនេះ តាមការព្យាករ ក្រុមហ៊ុននានានឹងពង្រឹងខ្សែច្រវាក់ផ្គត់ផ្គង់របស់ខ្លួន ផ្លាស់ទីតាំងផលិតកម្មទៅកាន់តែជិតខ្លួន និងស្វះស្វែងរកទីផ្សារថ្មីៗ ដែលកត្តាទាំងអស់នេះសុទ្ធតែអាចធ្វើឱ្យថ្លៃដើមមកើនឡើងខ្ពស់៕
ដោយ: តែម សុខុម
