កាលពីប៉ុន្មានថ្ងៃមុននេះសហរដ្ឋអាម៉េរិកបានលើកសំណើទៅអ៊ុយក្រែន ដោយទាមទារកាន់កាប់ចំណែកពាក់កណ្ដាលនៃធនធានរ៉ែកម្រទាំងអស់របស់អ៊ុយក្រែន ជាថ្នូរនឹងការជួយគាំទ្រអ៊ុយក្រែន ទាំងផ្នែកយោធា និងសេដ្ឋកិច្ច ដើម្បីបញ្ចប់សង្គ្រាមជាមួយរុស្ស៊ី ប៉ុន្តែសំណើនេះត្រូវបានភាគីអ៊ុយក្រែនច្រានចោល ខណៈដែលប្រធានាធិបតី ហ្សេឡិនស្គី ចង់បានកិច្ចព្រមព្រៀងដែលប្រសើរជាងនេះ។
រដ្ឋមន្ត្រីក្រសួងរតនាគារអាម៉េរិកលោក ស្កុត បេស៊ឹន (Scott Bessent) បានបង្ហាញសំណើនេះតាមរយៈសេចក្ដីព្រាង នៃកិច្ចព្រមព្រៀងមួយដល់ប្រធានាធិបតី ហ្សេឡិនស្គី អំឡុងជំនួបរបស់លោកទាំងពីរនៅទីក្រុងគៀវ រដ្ឋធានីនៃប្រទេសអ៊ុយក្រែន កាលពីថ្ងៃពុធ
សប្ដាហ៍មុន។
ក្រុមមន្ត្រីជាន់ខ្ពស់របស់អ៊ុយក្រែនបានបញ្ជាក់ថា សម្រាប់កិច្ចព្រមព្រៀងបែងចែករ៉ែណាមួយ គឺប្រធានាធិបតីអ៊ុយក្រែនលោក ហ្សេឡិនស្គី ចង់ឱ្យសហរដ្ឋអាម៉េរិក និងសហភាពអឺរ៉ុបចូលរួមជួយធានាសន្តិសុខរបស់អ៊ុយក្រែន ហើយទីក្រុងគៀវ កំពុងចរចារលក្ខខណ្ឌដែលល្អប្រសើរជាងនេះ។
ទោះជាយ៉ាងណា ភ្លាមៗស្ថានទូតអ៊ុយក្រែន ប្រចាំនៅទីក្រុងវ៉ាស៊ីនតោន និងក្រុមប្រឹក្សាសន្តិសុខជាតិនៅសេតវិមាន មិនបានធ្វើអត្ថាធិប្បាយទេជុំវិញបញ្ហានេះ។
យោងតាមទីភ្នាក់ងារសិក្សាធនធានធម្មជាតិរបស់សហរដ្ឋអាម៉េរិក (USGS) បានឱ្យដឹងថា ប្រទេសអ៊ុយក្រែន គ្មានធនធានរ៉ែកម្រច្រើននោះទេ ប៉ុន្តែបានបញ្ជាក់ថា រ៉ែកម្រមានច្រើនគួរសមនៅក្នុងបណ្ដាតំបន់ភាគខាងកើតរបស់អ៊ុយក្រែន ដែលសព្វថ្ងៃកាន់កាប់ដោយរុស្ស៊ី រួមមានទាំងរ៉ែទីតាញ៉ូម លីចូម និងរ៉ែក្រាភីត (Graphite) ផងដែរ។
យោងតាមការចុះផ្សាយរបស់សារព័ត៌មាន Aljazeera បានឱ្យដឹងថា ប្រធានាធិបតីអាម៉េរិក លោក ដូណាល់ ត្រាំ បានបញ្ជាក់ថា លោកអាចនឹងជួបប្រធានាធិបតីរុស្ស៊ី លោក វ្ល៉ាឌីមៀ ពូទីន ក្នុងពេលឆាប់ៗនេះ ដើម្បីចរចាកិច្ចព្រមព្រៀងសន្តិភាពរវាងរុស្ស៊ី និងអ៊ុយក្រែន ឈានទៅដល់ការបញ្ចប់សង្គ្រាមជាស្ថាពរ។
លោក ដូណាល់ ត្រាំ បានថ្លែងប្រាប់ក្រុមអ្នកយកព័ត៌មាននៅប្រទេសអារ៉ាប៊ីសាអូឌីត កាលពីថ្ងៃអាទិត្យ ទី១៦ ខែកុម្ភៈ ថា ពេលវេលាជាក់លាក់សម្រាប់ការចរចាកិច្ចព្រមព្រៀងរវាងរុស្ស៊ី និងអ៊ុយក្រែន មិនទាន់ត្រូវបានកំណត់នៅឡើយទេ ប៉ុន្តែលោកថា ការចរចានេះអាចនឹងធ្វើឡើងនៅក្នុងខែនេះ៕
ដោយ: តែម សុខុម
