សមាជិកបណ្ឌិត្យសភា បញ្ញវន្ត តំណាងសង្គមស៊ីវិល និងក្រុមតស៊ូមតិដើម្បីសន្តិភាពចំនួន១២១នាក់ ដែលមានការប្តេជ្ញាចិត្តខ្ពស់ចំពោះយុត្តិធម៌ និងសេចក្តីថ្លៃថ្នូររបស់មនុស្សនៅទូទាំងអាស៊ីអាគ្នេយ៍ បានចេញសេចក្តីថ្លែងការណ៍មួយកាលពីពេលថ្មីៗទៅកាន់មេដឹកនាំប្រទេសកម្ពុជា ថៃ និងអាស៊ាន ដោយសម្តែងការព្រួយបារម្ភយ៉ាងខ្លាំងចំពោះភាពតានតឹងតាមបណ្តោយព្រំដែនកម្ពុជា-ថៃ។ ក្រុមសកម្មជនទាំងនេះបានព្រមានថា ភាពតានតឹងក្នុងជម្លោះព្រំដែន ដែលបានកើតឡើងចុងក្រោយបំផុតមិនត្រឹមតែគំរាមកំហែងដល់សន្តិភាព និងសន្តិសុខក្នុងតំបន់ប៉ុណ្ណោះទេ ថែមទាំងធ្វើឱ្យសហគមន៍នៅតាមព្រំដែនរងគ្រោះថ្នាក់ និងធ្វើឱ្យខូចដល់តម្លៃស្នូលរបស់អាស៊ាន ដែលតែងតែឱ្យតម្លៃលើការដោះស្រាយបញ្ហាដោយការសន្ទនា ការគោរពគ្នាទៅវិញទៅមក និងដោយសន្តិវិធី។
ក្រុមអ្នកតស៊ូមតិដើម្បីសន្តិភាពខាងលើ បានអំពាវនាវឱ្យរដ្ឋាភិបាលកម្ពុជា ថៃ និងអាស៊ានធ្វើសកម្មភាពជាបន្ទាន់ ដោយផ្អែកលើច្បាប់អន្តរជាតិ និងសេចក្តីថ្លៃថ្នូររបស់មនុស្ស តាមរយៈយន្តការ និងគោលការណ៍ចំនួន៦ រួមមានការប្រកាន់ខ្ជាប់យ៉ាងម៉ឺងម៉ាត់ចំពោះកិច្ចព្រមព្រៀងសន្តិភាពគូឡាឡាំពួ, បង្កើតយន្តការស៊ើបអង្កេតឯករាជ្យ, ផ្តល់ឱកាសពិតប្រាកដដល់សន្តិភាពតាមរយៈបទដ្ឋានអន្តរជាតិ និងតំបន់, ការពារសិទ្ធិមនុស្ស និងសេចក្តីថ្លៃថ្នូររបស់មនុស្សនៅក្នុងសហគមន៍ដែលរងផលប៉ះពាល់, លើកកម្ពស់ការទូតរវាងប្រជាជន និងប្រជាជន ហើយប្រឆាំងនឹងការបណ្តុះវប្បធម៌សម្អប់គ្នា និងផ្លាស់ប្តូររឿងរ៉ាវជម្លោះតាមរយៈការអប់រំ។
សេចក្តីថ្លែងការណ៍ខាងលើបានសង្កត់ធ្ងន់ថា បទប្បញ្ញត្តិទាំងអស់នៃកិច្ចព្រមព្រៀងសន្តិភាពនៅទីក្រុងគូឡាឡាំពួគួរតែត្រូវបានអនុវត្តដោយយុត្តិធម៌ តម្លាភាព និងដោយគ្មានការពន្យារពេល។ សម្រាប់ក្រុមតស៊ូមតិដើម្បីសន្តិភាព កិច្ចព្រមព្រៀងនេះមិនមែនជាជម្រើសទេ ប៉ុន្តែជាការប្តេជ្ញាចិត្តខាងនយោបាយរបស់ថ្នាក់ដឹកនាំរបស់រដ្ឋាភិបាលនៃប្រទេសទាំងពីរ។
ក្រុមសកម្មជនខាងលើ ក៏បានព្រមានដែរថា ការងាកចេញណាមួយពីកិច្ចព្រមព្រៀងសន្តិភាព ដែលបានចុះហត្ថលេខារួមគ្នារវាងកម្ពុជា និងថៃ ដោយមានការចូលរួមធ្វើជាសាក្សីពីសំណាក់លោក ដូណាល់ ត្រាំ ប្រធានាធិបតីអាម៉េរិក និងលោក អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី និងជាប្រធានប្តូរវេនអាស៊ាន អាចបង្កគ្រោះថ្នាក់ធ្ងន់ធ្ងរដល់សហគមន៍ព្រំដែន ធ្វើឱ្យប៉ះពាល់ដល់ទំនុកចិត្តក្នុងតំបន់ និងធ្វើឱ្យខូចដល់ភាពជឿជាក់របស់អាស៊ាន។
ទន្ទឹមនឹងនេះ ពួកគេជំរុញឱ្យប្រធានអាស៊ានដើរតួនាទីយ៉ាងសកម្ម អព្យាក្រឹត និងស៊ីសង្វាក់គ្នា និងបានអំពាវនាវឱ្យប្រធាន និងក្រុមអ្នកសង្កេតការណ៍អាស៊ាន (AOT) អនុវត្តភារកិច្ចរបស់ពួកគេដោយវិជ្ជាជីវៈ ភាពត្រឹមត្រូវ និងតម្លាភាព ក៏ដូចជាអំពាវនាវឱ្យមានយន្តការស្វែងរកការពិតឯករាជ្យ និងតម្លាភាពពេញលេញ ដើម្បីស៊ើបអង្កេតឧប្បត្តិហេតុទាំងអស់តាមបណ្តោយព្រំដែនផងដែរ៕
ដោយៈ សរ សុជាតិ
