សហរដ្ឋអាម៉េរិក កើតទុក្ខមិនសុខចិត្តប្ដឹងទៅអង្គការពាណិជ្ជកម្មពិភពលោកថា ឥណ្ឌា គ្មានមូលដ្ឋានអ្វីត្រូវដាក់ពន្ធសងសឹកលើផលិតផលអាម៉េរិក នោះឡើយ

ខណៈដែលប្រទេសឥណ្ឌា និងសហរដ្ឋអាម៉េរិក កំពុងចរចាកិច្ចព្រមព្រៀងពាណិជ្ជកម្មស្រាប់តែកាលពីថ្ងៃសុក្រ សប្ដាហ៍មុន សហរដ្ឋអាម៉េរិក បានប្ដឹងទៅអង្គការពាណិជ្ជកម្មពិភពលោក WTO ថា ឥណ្ឌា កាលពីសប្ដាហ៍មុនបានប្រកាសផែនការដាក់ពន្ធសងសឹកលើទំនិញសំខាន់ៗចំនួន២៩ប្រភេទរបស់ខ្លួនរួមទាំងដែកថែប និងអាលុយមីញ៉ូម ផងដែរ ហើយថា ប្រទេសឥណ្ឌា គ្មានមូលដ្ឋានអ្វីដែលអាចធ្វើបែបនោះបានឡើយ។

ប្រទេសឥណ្ឌា បានប្ដឹងទៅអង្គការពាណិជ្ជកម្មពិភពលោក WTO ថា វិធានការដំឡើងពន្ធបដិការរបស់សហរដ្ឋអាម៉េរិកនឹងជះផលប៉ះពាល់ដល់ទំនិញឥណ្ឌា ក្នុងទំហំ៧,៦ពាន់លានដុល្លារអាម៉េរិក ដែលនាំចូលទៅកាន់សហរដ្ឋអាម៉េរិក។ ភាពតានតឹងថ្មីនេះកើតមានឡើង ស្របពេលដែលឥណ្ឌា និងសហរដ្ឋអាម៉េរិក កំពុងចរចាកិច្ចព្រមព្រៀងពាណិជ្ជកម្មដែលឥណ្ឌា រំពឹងថានឹងអាចសម្រេចបានដំណាក់កាលដំបូងនៃកិច្ចព្រមព្រៀងនោះនៅត្រឹមដើមខែកក្កដា មុនពេលពន្ធគយបដិការរបស់លោក ដូណាល់ ត្រាំ ចូលជាធរមាន។

ទន្ទឹមនេះ លោក ដូណាល់ ត្រាំ ក៏បានបង្ហាញការមិនសប្បាយចិត្តផងដែរ ចំពោះផែនការរបស់ក្រុមហ៊ុន Apple ក្នុងការផលិតទូរសព្ទ iPhone នៅក្នុងប្រទេសឥណ្ឌា ដោយនិយាយថា ទូរសព្ទ iPhone ដែលផលិតនៅក្រៅទឹកដីសហរដ្ឋអាម៉េរិក សម្រាប់ដាក់លក់នៅទីផ្សារអាម៉េរិកនឹងត្រូវជាប់ពន្ធ២៥%៕

ដោយ: តែម សុខុម