រដ្ឋមន្ត្រីក្រសួងពាណិជ្ជកម្មអាមេរិកបំពេញទស្សនកិច្ចនៅចិនដើម្បីពិភាក្សាពីបច្ចេកវិទ្យាបន្ទះឈីប និងបញ្ញាសិប្បនិមិត្ត

លោកស្រី រ៉ៃម៉ុនដូ បាននិងកំពុងធ្វើទស្សនកិច្ចនៅប្រទេសចិនរយៈពេល៤ថ្ងៃចាប់ពីថ្ងៃទី២៧ ដល់ថ្ងៃពុធ ទី៣០ ខែសីហា ដោយលោកស្រីត្រូវជួបជាមួយរដ្ឋមន្ត្រីក្រសួងពាណិជ្ជកម្មចិនលោក វ៉ាង វិនតាវ (Wang Wentao) និងអាចជួបជាមួយមន្ត្រីជាន់ខ្ពស់ចិនមួយចំនួនទៀត សម្រាប់គោលនយោបាយសេដ្ឋកិច្ចផងដែរ។

មុខតំណែងរបស់លោកស្រី រ៉ៃម៉ុនដូ ជារដ្ឋមន្ត្រីក្រសួងពាណិជ្ជកម្មនេះ តម្រូវឱ្យលោកស្រីនាំមុខគេក្នុងការដឹកនាំគោលនយោបាយសេដ្ឋកិច្ចរបស់រដ្ឋបាលលោក ចូ បៃដិន ប្រធានាធិបតីអាមេរិកឆ្ពោះទៅប្រទេសចិន ដើម្បីត្រួតពិនិត្យវិធានការមួយចំនួនដូចជា ការត្រួតពិនិត្យការនាំចេញបច្ចេកវិទ្យាបន្ទះឈីប។
លោក ជែក ស៊ូលីវ៉ាន់ (Jake Sullivan) ទីប្រឹក្សាសន្តិសុខជាតិរបស់សេតវិមានបាននិយាយនៅខែនេះសំដៅទៅរកប្រទេសចិនថា ទស្សនកិច្ចរបស់រដ្ឋមន្ត្រីពាណិជ្ជកម្មអាមេរិកនេះគឺជា «ការរួមបញ្ចូលនៃវិធីសាស្រ្តដែលរដ្ឋបាល លោក បៃដិន កំពុងអនុវត្ត ដើម្បីប្រកួតប្រជែងយ៉ាងខ្លាំងជាមួយនឹងចិន ប៉ុន្តែការប្រកួតប្រជែងខ្លាំងនេះ បានទាមទារឱ្យមានការទូតខ្លាំង ដើម្បីគ្រប់គ្រងការប្រកួតប្រជែងនោះ កុំឱ្យវាប្រែក្លាយទៅជាជម្លោះទៅវិញ។
មានក្តីបារម្ភខ្លះដែលថា ភាពតានតឹងរវាងសហរដ្ឋអាមេរិក និងចិនពាក់ព័ន្ធនឹងគ្រឿងបន្ទះឈីបនឹងកើនឡើងកាន់តែខ្លាំងបន្ទាប់ពីមានការចាត់វិធានការប្រឆាំងគ្នាទៅមកជាបន្តបន្ទាប់។
នៅខែតុលា ឆ្នាំ២០២២ រដ្ឋបាលលោក បៃដិន បានហាមឃាត់ការនាំចេញបច្ចេកវិទ្យាបន្ទះ ឈីបទំនើប និងឧបករណ៍ផលិតបន្ទះឈីបទៅកាន់ប្រទេសចិន ហើយនៅឆ្នាំនេះទីក្រុងប៉េកាំងបានដាក់កម្រិតលើលទ្ធភាពរបស់ក្រុមហ៊ុនចិនក្នុងការទិញផលិតផលពីក្រុមហ៊ុនបន្ទះឈីបអាមេរិក Micron Technology និងរឹតបន្តឹងការគ្រប់គ្រងលើការនាំចេញបរិក្ខារបន្ទះឈីបផងដែរ។
បញ្ហាបន្ទះឈីបមិនមែនជាសមរភូមិតែមួយគត់រវាងអាមេរិក និងចិននោះទេ ដោយនៅក្នុងខែសីហានេះលោក បៃដិន ទើបតែបានចុះហត្ថលេខាលើបទបញ្ជាមួយ ដើម្បីដាក់កម្រិតលើការវិនិយោគរបស់អាមេរិកមួយចំនួន នៅក្នុងប្រទេសចិន ក្នុងវិស័យដូចជាបញ្ញាសិប្បនិមិត្ត (AI) និងបន្ទះឈីបកុំព្យូទ័រផងដែរ ខណៈដែលចិនបាននិយាយថា ចិនបានត្រៀមខ្លួនរួចហើយដើម្បីចាត់វិធានការចាំបាច់ឆ្លើយតបនឹងការរឹតបន្តឹងរបស់អាមេរិកថ្មីៗនេះ៕

អត្ថបទ៖ សុខ ជា