កាលពីថ្ងៃចន្ទ ទី ៨ មិថុនា សម្តេចតេជោ ហ៊ុន សែន បានថ្លែងថា កិច្ចព្រមព្រៀង AUKUS រវាងប្រទេសអូស្ត្រាលី សហរដ្ឋអាមេរិក អង់គ្លេស ជា«ចំណុចចាប់ផ្តើមនៃការប្រណាំងប្រជែងអាវុធដ៏គ្រោះថ្នាក់បំផុត» ខណៈដែលសម្ដេចបានជំទាស់នឹងការមកដល់នៃនាវាមុជទឹកដើរដោយថាមពលនុយក្លេអ៊ែរមកកាន់តំបន់ឥណ្ឌូប៉ាស៊ីហ្វិកក្នុងក្របខ័ណ្ឌកិច្ចព្រមព្រៀងនេះ។
សម្ដេច ហ៊ុន សែន បានលើកឡើងថា សមាគមប្រជាជាតិអាស៊ីអាគ្នេយ៍ ឬអាស៊ាន ជា«តំបន់គ្មានអាវុធនុយក្លេអ៊ែរ», ជាសមាគមថ្នាក់តំបន់មួយដែលប្រឆាំងទៅនឹងការរីករាយភាយអាវុធនុយក្លេអ៊ែរ។
នៅក្នុងពិធីចែកសញ្ញាបត្រនៅរាជធានីភ្នំពេញ កាលពីថ្ងៃចន្ទ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាក៏បានគូសបញ្ជាក់ទៀតថា សម្ព័ន្ធភាពខ្នាតតូចដែលពាក់ព័ន្ធនឹងនាវាមុជទឹកដើរដោយថាមពលនុយក្លេអ៊ែរក្នុងចំណោមសហរដ្ឋអាមេរិក អង់គ្លេស និងអូស្ត្រាលី កំពុងក្លាយជាកង្វល់សម្រាប់អាស៊ាន និងប្រទេសក្នុងតំបន់។
ទោះជាយ៉ាងណាក៏ដោយ អ្នកនាំពាក្យក្រសួងការបរទេសអាមេរិកបាននិយាយតាមរយៈអ៊ីម៉ែលប្រាប់ VOA ដោយឆ្លើយតបទៅនឹងកង្វល់របស់ប្រមុខរដ្ឋាភិបាលកម្ពុជាថា «AUKUS មានគោលបំណងលើកកម្ពស់សន្តិភាព វិបុលភាព សន្តិសុខ និងស្ថិរភាពនៅក្នុងតំបន់ឥណ្ឌូប៉ាស៊ីហ្វិក និងក្នុងតំបន់ឆ្ងាយពីនេះទៀត។ តាមរយៈកិច្ចព្រមព្រៀងនេះ យើងនឹងគាំទ្រដល់ការទិញនាវាមុជទឹកដើរដោយថាមពលនុយក្លេអ៊ែរបំពាក់ដោយអាវុធធម្មតាពីសំណាក់ប្រទេសអូស្ត្រាលី ដែលជាបច្ចេកវិទ្យាមានសុវត្ថិភាព»។
អត្ថបទគួរអាន
គួររំលឹកថា កាលពីខែមីនាកន្លងទៅ មេដឹកនាំនៃសម្ព័ន្ធមិត្តត្រីភាគីដែលមានសហរដ្ឋអាមេរិក ចក្រភពអង់គ្លេស និងអូស្ត្រាលី បានចុះហត្ថលេខាលើកិច្ចព្រមព្រៀងមួយក្នុងគោលបំណងពង្រឹងវត្តមានរបស់ពួកគេនៅក្នុងតំបន់អាស៊ីប៉ាស៊ីហ្វិក ទីដែលប្រទេសចិនកំពុងបង្កើនឥទ្ធិពលយោធារបស់ខ្លួន និងមានជម្លោះដែនទឹកជាមួយប្រទេសមួយចំនួនក្នុងសមាគមអាស៊ាន។ កិច្ចព្រមព្រៀងនេះនឹងអនុញ្ញាតឱ្យអូស្ត្រាលីអាចទិញនាវាមុជទឹកដើរដោយថាមពលនុយក្លេអ៊ែរចំនួន៣គ្រឿងពីសហរដ្ឋអាមេរិក។
អ្នកនាំពាក្យក្រសួងការបរទេសចិន លោកវ៉ាង វេនប៊ីន (Wang Wenbin) បាននិយាយនៅក្នុងសន្និសីទសារព័ត៌មានប្រចាំថ្ងៃកាលពីថ្ងៃអង្គារ ទី ៧ មិថុនា ថា «យោងតាមការប៉ាន់ប្រមាណរបស់អ្នកជំនាញគ្រប់គ្រងអាវុធអន្តរជាតិ បរិមាណនៃចំណាត់ថ្នាក់សម្ភារៈនុយក្លេអ៊ែរ ដែលសហរដ្ឋអាមេរិក និងចក្រភពអង់គ្លេស គ្រោងផ្តល់ឱ្យអូស្ត្រាលី អាចត្រូវបានប្រើប្រាស់សម្រាប់ផលិតអាវុធនុយក្លេអ៊ែររហូតដល់ ៦០ ទៅ ៨០ ដើម។ លោក វ៉ាង បានបន្ថែមថា ការលើកឡើងរបស់សម្ដេចតេជោ ហ៊ុន សែន ជាការនិយាយអំពីក្ដីបារម្ភរួមជាមួយប្រទេសក្នុងតំបន់ ជាពិសេសប្រទេសសមាជិកអាស៊ាន៕
