ថៃកំពុងជំរុញផែនការវិនិយោគលើវិស័យថាមពល ដើម្បីបង្កើតប្រាក់ចំណូលដល់ជិត៥ពាន់លានដុល្លារសម្រាប់សេដ្ឋកិច្ច

ការផ្សាយរបស់កាសែតបាងកកប៉ុស្តិ៍បានឲ្យដឹងថា ដើម្បីសម្រេចតាមគម្រោងបង្កើនចំណូលពីវិស័យថាមពលឱ្យដល់ ៥ ពាន់លានដុល្លារ តាមផែនការប្រេងជាតិ រដ្ឋាភិបាលថៃត្រូវអនុម័តនូវកញ្ចប់ថវិការមួយដែលមានតម្លៃប្រមាណជាជិត ៣៥ ពាន់លានបាត ឬប្រហែល ១ ពាន់លានដុល្លារ។

ប្រភពដដែលបានបន្តថា គម្រោងនេះត្រូវតែឆ្លងកិច្ចពិភាក្សាក្នុងគណៈរដ្ឋមន្រ្តី ហើយនឹងអនុម័តឲ្យបាននៅក្នុងរង្វង់ដើមខែសីហាខាងមុខ ប្រសិនបើដំណើរនៃគម្រោងនេះវាប្រព្រឹត្តទៅដោយរលូន។

លោកស្រី ណាន់ធិកា ថាងស៊ូផានិច ( Nanthika Thangsupanich) អគ្គនាយិកានៃអគ្គនាយកដ្ឋានអាជីវកម្មថាមពលថៃបានអះអាងថា គម្រោងនេះនឹងត្រូវដំណើរការអនុវត្តសន្សឹមៗរហូតដល់ឆ្នាំ២០២៦ ដោយផ្តោតលើការរៀបចំទុនបម្រុងប្រេងឱ្យបានគ្រប់គ្រាន់សម្រាប់សន្តិសុខថាមពល និងការផ្លាស់ប្តូរឆ្ពោះទៅរកថាមពលស្អាត។

លោកស្រីបានបន្តថា តាមផែនការដែលបានគ្រោងទុក គម្រោងក៏នឹងរួមបញ្ចូលទាំងការលើកកម្ពស់ការប្រើប្រាស់ជីវឥន្ធនៈសម្រាប់យន្តហោះ ក៏ដូចជាការបង្កើនបរិមាណជីវឥន្ធនៈដែលលាយជាមួយប្រេងសាំង និងម៉ាស៊ូត ព្រមទាំងការគាំទ្រគម្រោងរថយន្តប្រើភ្លើងអាគុយ។

លោកស្រី ណាន់ធិកា បាននិយាយថា ការប្រើប្រាស់ប្រេងឥន្ធនៈនៅក្នុងប្រទេសថៃបានកើនឡើងជាង ៣ ភាគរយ ក្នុងអំឡុងពេលបួនខែដំបូងនៃឆ្នាំ ២០២៣ ដោយសារការងើបឡើងវិញនៃសេដ្ឋកិច្ចក្នុងស្រុក។ លោកស្រីបានបញ្ជាក់ថា ការប្រើប្រាស់ផលិតផលប្រេងចម្រាញ់ រួមមានប្រេងសាំង ប្រេងយន្តហោះ, ហ្គាស, និងឧស្ម័នធម្មជាតិជាដើម បានកើនឡើងដល់ជិត ១៦០ លានលីត្រក្នុងមួយថ្ងៃ (MLD) ខណៈដែលឆ្នាំមុនបរិមាណប្រើប្រាស់មានតែ ១៥៤ លានលីត្រក្នុងមួយថ្ងៃ។ កាលពីឆ្នាំ២០១៩ បរិមាណប្រើប្រាស់ប្រេងឥន្ធនៈគឺមានត្រឹមតែ ១៥៨ លានលីត្រក្នុងមួយថ្ងៃ៕