រដ្ឋបាលលោក ដូណាល់ ត្រាំ គ្រោងនាំយកពន្ធចាស់ៗត្រលប់មកវិញ ហើយដំឡើងពន្ធបន្ថែមទៀតក្រោមច្បាប់ពាណិជ្ជកម្មរបស់ខ្លួន ដែលរដ្ឋមន្ត្រីហិរញ្ញវត្ថុអាម៉េរិក លោក Scott Bessent ជឿជាក់ថា អាចត្រឡប់មកវិញទាំងស្រុងក្នុងរយៈពេល៥ខែ។ ទីផ្សារហិរញ្ញវត្ថុនានា បានបញ្ចេញប្រតិកម្មដោយប្រុងប្រយ័ត្ន ហើយជាការកត់សម្គាល់ ភាគហ៊ុនអាម៉េរិក បានធ្លាក់ចុះបន្តិច បន្ទាប់ពីលោក Scott បានធ្វើអត្ថាធិប្បាយអំពីការដំឡើងពន្ធនេះ។
រដ្ឋមន្ត្រីហិរញ្ញវត្ថុអាម៉េរិក ក៏បាននិយាយដែរថា ទីផ្សារប្រេងនៅតែទទួលបានការផ្គត់ផ្គង់បានល្អនៅឡើយ ទោះបីជាមានសង្គ្រាមរវាងសហរដ្ឋអាម៉េរិក រួមដៃជាមួយអ៊ីស្រាអែលប្រឆាំងអ៊ីរ៉ង់ ក៏ដោយ។ លោកបានកត់សម្គាល់ថា ប្រេងរាប់រយលានបារ៉ែលកំពុងត្រូវបានដឹកជញ្ជូនចេញពីតំបន់ឈូងសមុទ្រពែក្សរួចទៅហើយ។
រដ្ឋាភិបាលអាម៉េរិក ក៏កំពុងត្រៀមវិធានការដើម្បីគាំទ្រពាណិជ្ជកម្មថាមពល រួមទាំងការធានារ៉ាប់រងសម្រាប់កប៉ាល់ដឹកប្រេង និងការបញ្ជូនកងទ័ពជើងទឹកអាម៉េរិក ទៅការពារកប៉ាល់ដែលឆ្លងកាត់ច្រកសមុទ្រហ័រមូស ផងដែរ។
រដ្ឋមន្ត្រីអាម៉េរិក អះអាងថា ប្រទេសចិន អាចរងផលប៉ះពាល់ខ្លាំង ប្រសិនបើការដឹកជញ្ជូនប្រេងពីឈូងសមុទ្រពែក្ស ត្រូវបានរាំងស្ទះដោយសារថាមពលជាងពាក់កណ្តាលរបស់ចិនបានមកពីតំបន់នេះ។ លោកក៏បាននិយាយដែរថា ប្រទេសចិន បានទិញយករហូតដល់ទៅប្រមាន៩៥% នៃប្រេងនាំចេញរបស់អ៊ីរ៉ង់ ដែលឥឡូវនេះភាគច្រើនត្រូវបានផ្អាក។ នៅពេលសួរអំពីការលើកឡើងរបស់លោក ដូណាល់ ត្រាំ អំពីការដាក់ទណ្ឌកម្មពាណិជ្ជកម្មដែលអាចកើតមានលើប្រទេសអេស្ប៉ាញ ដោយសារខឹងអេស្ប៉ាញ បដិសេធមិនឱ្យកងទ័ពអាម៉េរិក ប្រើមូលដ្ឋានទ័ពអាកាសរបស់ខ្លួន ដើម្បីវាយប្រហារប្រទេសអ៊ីរ៉ង់ លោក Scott Bessent បានឆ្លើយថា វានឹងតម្រូវឱ្យមានការសម្របសម្រួលក្នុងចំណោមទីភ្នាក់ងាររដ្ឋាភិបាលជាច្រើន ប៉ុន្តែមិនបានបញ្ជាក់ថា តើទណ្ឌកម្មពាណិជ្ជកម្មនឹងកើតឡើងឬក៏អត់នោះទេ៕
ដោយ: តែម សុខុម
