បើយោងតាមការចុះផ្សាយរបស់សារព័ត៌មានរដ្ឋវៀតណាម ផ្លូវរថភ្លើងរបស់វៀតណាម ប្រវែង៤២៧គីឡូម៉ែត្រ នឹងត្រូវរត់ចេញពីព្រំដែនខេត្តឡាវសៃ (Lao Cai) ឆ្លងកាត់រដ្ឋធានីហាណូយ និងទីក្រុងកំពង់ផែហៃហ្វុង (Haiphong) ឆ្ពោះទៅកាន់ទីក្រុងហាឡុង (Ha Long) ប្រទេសវៀតណាម។
វៀតណាមកំពុងព្យាយាមកែលម្អប្រព័ន្ធផ្លូវដែកចាស់ៗរបស់ខ្លួនរួមទាំងផែនការសាងសង់ផ្លូវរថភ្លើងល្បឿនលឿន ដែលរត់តាមបណ្តោយប្រទេសនេះ និងផ្លូវរថភ្លើង ដែលតភ្ជាប់ជាមួយនឹងខេត្ដយូណានរបស់ប្រទេសចិន ដែលជាដៃគូពាណិជ្ជកម្មធំបំផុតរបស់ខ្លួនផងដែរ។
អាជ្ញាធរផ្លូវដែកវៀតណាម បានដាក់ផែនការសាងសង់ផ្លូវរថភ្លើងពីខេត្តឡាវសៃ ទៅទីក្រុងហាឡុង (Ha Long) ទៅក្រសួងដឹកជញ្ជូនវៀតណាម ដើម្បីពិនិត្យ និងអនុម័តរួចហើយ។ ការសាងសង់ផ្លូវដែកនេះត្រូវបានគេរំពឹងថា នឹងចាប់ផ្តើមនៅក្នុងឆ្នាំ២០៣០ ហើយគេរំពឹងថា នឹងមានតម្រូវការដឹកជញ្ជូនអ្នកដំណើរប្រមាណ៨លាន៣សែននាក់ និងទំនិញជាង១៧លានតោនតាមរយៈផ្លូវដែកនេះជារៀងរាល់ឆ្នាំនៅត្រឹមឆ្នាំ២០៥០។
សម្រាប់ការសាងសង់គម្រោងផ្លូវរថភ្លើងតភ្ជាប់រវាងប្រទេសវៀតណាមជាមួយចិននេះ វៀតណាមកំពុងស្វែងរកជំនួយបច្ចេកទេស និងថវិកាពីប្រទេសចិន ដោយតាមការប៉ាន់ស្មានអាចចំណាយថវិកាប្រមាណ៧ពាន់២រយលានដុល្លារ។
ជាមួយគ្នានេះ រដ្ឋសភាវៀតណាម គ្រោងបើកកិច្ចប្រជុំនៅថ្ងៃចន្ទ សប្ដាហ៍ក្រោយ ដោយគេរំពឹងថា នឹងអនុម័តផែនការចំណាយ៦៧ពាន់លានដុល្លារអាម៉េរិក ដើម្បីសាងសង់ផ្លូវរថភ្លើងល្បឿនលឿនប្រវែង១,៥៤១គីឡូម៉ែត្រពីរដ្ឋធានីហាណូយទៅកាន់មជ្ឈមណ្ឌលពាណិជ្ជកម្មទីក្រុងហូជីមិញ ដែលជាគម្រោងហេដ្ឋារចនាសម្ព័ន្ធធំបំផុតមិនធ្លាប់មានរបស់ប្រទេសនេះ៕
អត្ថបទ៖ សុខ មង្គល
