ការនាំចេញកាហ្វេរបស់ប្រទេសវៀតណាមត្រូវបានគេព្យាករថា នឹងកើនឡើងដល់កំណត់ត្រាមួយខ្ពស់រហូតដល់៥,៦ពាន់លានដុល្លារនៅឆ្នាំ២០២៤ នេះ ដោយសារតែមានការកើនឡើងតម្លៃកាហ្វេជាសកល។ លោក ង្វៀន ណាម ហៃ (Nguyen Nam Hai) ប្រធានសមាគមកាហ្វេ និងកាកាវរបស់ប្រទេសវៀតណាមបានកត់សម្គាល់ថា ការកើនឡើងតម្លៃកាហ្វេជាសកលនាពេលថ្មីៗនេះ ក៏បានជំរុញឱ្យតម្លៃកាហ្វេក្នុងស្រុកកើនឡើងផងដែរ។
លោកបានពន្យល់ថា ទោះជាតម្លៃកាហ្វេអាចនឹងប្រែប្រួលធ្លាក់ចុះបន្តិចបន្តួចនៅពេលរដូវប្រមូលផលកាហ្វេរបស់វៀតណាម ដែលនឹងចាប់ផ្តើមនៅខែធ្នូ នេះក៏ដោយ ប៉ុន្តែគេបានរំពឹងថា តម្លៃកាហ្វេនឹងនៅតែកើនខ្ពស់ជាងឆ្នាំមុនដោយហេតុថា ប្រទេសដែលផលិតកាហ្វេធំៗផ្សេងទៀតមិនទាន់ឈានចូលដល់រដូវប្រមូលផល។
សូមរំលឹកថា កាលពីថ្ងៃទី២៧ ខែវិច្ឆិកា តម្លៃកាហ្វេនៅខេត្តភាគកណ្តាលប្រទេសវៀតណាមដូចជាខេត្តដាកឡាក់ (Dak Lak) ជាដើមមានតម្លៃចាប់ពី៤,៨១ទៅ៤,៨៤ដុល្លារក្នុង១គីឡូក្រាម ពោលគឺខ្ពស់ជាងកាលពី២០ថ្ងៃមុន ដែលមានតម្លៃត្រឹមតែ៤,៣៤ដុល្លារក្នុង១គីឡូក្រាម។
ក្រុមអាជីវករបានរាយការណ៍ថា តម្លៃកាហ្វេកំពុងឡើងថ្លៃនៅមុនរដូវប្រមូលផល ដែលធ្វើឱ្យកសិករកំពុងថ្លឹងថ្លែងក្នុងការសម្រេចចិត្តលក់គ្រាប់កាហ្វេរបស់ពួកគេ ភ្លាមៗ ឬរក្សាទុកក្នុងឃ្លាំងសិន ក្រោយពួកគេមានការរំពឹងថា តម្លៃកាហ្វេនឹងឡើងថ្លៃថែមទៀត។ នៅក្នុងរយៈពេល១១ខែដំបូងឆ្នាំ២០២៤ ប្រទេសវៀតណាមបាននាំចេញកាហ្វេបានប្រមាណ១,២លានតោន ដែលបង្កើតចំណូលបានជិត៥ពាន់លានដុល្លារ។ បរិមាណនាំចេញកាហ្វេរបស់វៀតណាមក្នុងរយៈពេលនេះមានការធ្លាក់ចុះជាង១៣% ប៉ុន្តែតម្លៃកើនឡើងជាង៣៨%បើធៀបនឹងពេលដូចគ្នាកាលពីឆ្នាំមុន៕
អត្ថបទ៖ សុខ មង្គល
