រដ្ឋសភាវៀតណាម បានបើកសម័យប្រជុំពេញអង្គរបស់ខ្លួននៅថ្ងៃចន្ទ ដើមសប្តាហ៍នេះ ដើម្បីបោះឆ្នោតជ្រើងតាំងឧបនាយករដ្ឋមន្ត្រីថ្មីចំនួន៣រូប និងដកឧបនាយករដ្ឋមន្ត្រី២រូប។ ប៉ុន្តែសភាវៀតណាមមិនបញ្ជាក់ឈ្មោះ និងមូលហេតុនៃការដកឧបនាយករដ្ឋមន្ត្រីទាំងពីរនាក់នេះនោះទេ។ ជាមួយគ្នានេះ ស្ថាប័ននីតិប្បញ្ញត្តិរបស់ប្រទេសនេះ ក៏បានបោះឆ្នោតជ្រើសតាំងរដ្ឋមន្ត្រីក្រសួងបរិស្ថានថ្មី និងរដ្ឋមន្ត្រីយុត្តិធម៌ថ្មីនៅក្នុងសម័យប្រជុំនេះផងដែរ។
ការបោះឆ្នោតជ្រើសតាំងឧបនាយករដ្ឋមន្ត្រីនេះបានធ្វើឡើងបន្ទាប់ពីមានភាពចលាចលនយោ បាយក្រោយប្រធានរដ្ឋចំនួនពីររូប និងប្រធានរដ្ឋសភាមួយរូបបានលាលែងពីតំណែងជុំវិញការចោទប្រកាន់ថា«បានប្រព្រឹត្តខុស»។ ប្រទេសវៀតណាមបច្ចុប្បន្នមានឧបនាយករដ្ឋមន្ត្រីចំនួនបួនរូប ដែលស្ថិតនៅក្រោមឱវាទរបស់នាយករដ្ឋមន្ត្រីលោក ផាម មិញ ឈិញ (Pham Minh Chinh)។ តំណែងនេះនឹងកើនឡើងដល់៧រូបបន្ទាប់បញ្ចូលឧបនាយករដ្ឋមន្ត្រីទាំង៣រូប ដែលទើបជ្រើសតាំងថ្មីខាងលើ៕
អត្ថបទ៖ សុខ មង្គល
