ក្រសួសពាណិជ្ជកម្ម និងឧស្សាហកម្មវៀតណាម បានស្នើសុំឱ្យដាក់បន្ថែមការលើកទឹកចិត្តនៅក្នុងច្បាប់ឧស្សាហកម្មបច្ចេកវិទ្យាឌីជីថល ដូចជាការលុបចោល១៥០% នៃការចំណាយលើការស្រាវជ្រាវសម្រាប់ក្រុមហ៊ុនអាជីវកម្ម ការផ្តល់ជំនួយនិងទិដ្ឋាការឆាប់រហ័ស និងការប្រើប្រាស់ដីធ្លីរយៈពេល១០ឆ្នាំដោយមិនគិតថ្លៃជួលផងដែរ។
ក្រុងហាណូយ កំពុងដាក់ចេញនូវវិធានការបែបនេះ ដើម្បីចាប់យកឱកាសក្នុងពេលដែលមានជម្លោះពាណិជ្ជកម្មរវាងចិន និងអាម៉េរិក។ សង្គ្រាមបច្ចេកវិទ្យារវាងមហាអំណាចសេដ្ឋកិច្ចទាំងពីរនេះ បានបង្ខំឱ្យក្រុមហ៊ុនផលិតបន្ទះឈីបជាច្រើនស្វែងរកការធ្វើពិពិធកម្មខ្សែច្រវាក់ផ្គត់ផ្គង់ចេញឆ្ងាយពីប្រទេសចិន ដោយពួកគេកំពុងចាប់អារម្មណ៍នៅតំបន់អាស៊ីអាគ្នេយ៍ ប៉ុន្តែវៀតណាម ក៏ត្រូវពិចារណាដែរថា តើវិធានការនេះស្របនឹងសន្ធិសញ្ញាសកលថ្មី ស្តីពីពន្ធអប្បបរមាដែរឬទេ។
គួរបញ្ជាក់ថា នៅក្នុងរយៈពេលប៉ុន្មានឆ្នាំចុងក្រោយនេះ នាយកប្រតិបត្តិក្រុមហ៊ុនបន្ទះឈីបរបស់អាម៉េរិកមួយចំនួន រួមទាំងលោក ជេនសេន ហ័ង (Jensen Huang) នាយកប្រតិបត្តិក្រុមហ៊ុន Nvidia បានទៅទស្សនកិច្ចនៅទីក្រុងហាណូយ ដោយជំរុញឱ្យរដ្ឋាភិបាលវៀតណាម រិះរកវិធីគ្រប់យ៉ាង ដើម្បីទាក់ទាញក្រុមហ៊ុនទាំងនេះ៕
អត្ថបទ៖ សុខ មង្គល
