រដ្ឋសភាវៀតណាម កាលពីថ្ងៃទី១៨ ខែកុម្ភៈ បានអនុម័តផែនការកំណែទម្រង់ការិយាធិបតេយ្យមួយ ដោយបានកាត់បន្ថយក្រសួងពី១៨ មកនៅត្រឹម១៤ក្រសួង ដើម្បីកាត់បន្ថយការចំណាយ និងបង្កើនប្រសិទ្ធភាពការងាររបស់រដ្ឋាភិបាល។ ផែនការកំណែទម្រង់ដែលបានដាក់ចេញក្រោយវៀតណាម បានរៀបចំក្បាលម៉ាស៊ីនទាំងបក្ស និងរដ្ឋាភិបាលថ្មី កាលពីឆ្នាំមុន មានផែនការធ្វើកំណែទម្រង់នេះពី១៥%ទៅ២០%។
លោក តូ ឡឹម អគ្គលេខាធិការបក្សកុម្មុយនីស្តវៀតណាម ដែលកំពុងកាន់អំណាច បានប្រាប់រដ្ឋសភាថា ផែនការនេះមិនត្រឹមតែជួយសន្សំថវិការដ្ឋនោះទេ ថែមទាំងជួយបង្កើនប្រសិទ្ធភាពនៃប្រព័ន្ធការងាររបស់រដ្ឋាភិបាលផងដែរ។ ក្រោយផែនការនេះទទួលបានការគាំទ្រពីសមាជិកសភាក្នុងសំឡេងរហូតដល់៩៧% អ្នកវិនិយោគ អ្នកការទូត និងមន្ត្រីបានអបអរចំពោះលទ្ធផលនេះ ប៉ុន្តែពួកគេព្រួយបារម្ភថា នៅដំណាក់កាលដំបូង កិច្ចការ និងការសម្រេចចិត្តមួយចំនួនអាចត្រូវបានពន្យារពេល។
តាមរយៈផែនការកំណែទម្រង់ខាងលើ ក្រសួងផែនការ និងវិនិយោគ ដែលកំពុងមើលកិច្ចការអនុម័តគម្រោងវិនិយោគបរទេសនឹងត្រូវបញ្ចូលទៅក្នុងក្រសួងហិរញ្ញវត្ថុ ខណៈក្រសួងដឹកជញ្ជូន និងក្រសួងសំណង់នឹងត្រូវបញ្ចូលគ្នា ខណៈក្រសួងធនធានធម្មជាតិ និងបរិស្ថាន និងក្រសួងកសិកម្ម ត្រូវច្របាច់បញ្ចូលគ្នាធ្វើជាក្រសួងតែមួយ។ បន្ថែមលើនេះ សមាជិកសភាវៀតណាម ក៏បានផ្តល់សច្ចាប័នលើការតែងតាំងឧបនាយករដ្ឋមន្ត្រីថ្មីពីររូបផងដែរ។
ពាក់ព័ន្ធនឹងការច្របាច់ក្រសួងបញ្ចូលគ្នានេះ គេបានប៉ាន់ប្រមាណថា មន្រ្តី និងបុគ្គលិករដ្ឋប្រមាណ១០ម៉ឺននាក់ ប្រឈមនឹងផលប៉ះពាល់ ស្របពេលដែលមានការលើកឡើងថា ស្ថាប័នរដ្ឋមិនមែនជាជម្រកសុវត្ថិភាពសម្រាប់មន្ត្រីដែលគ្មានសមត្ថភាពឡើយ។ រដ្ឋាភិបាលវៀតណាមថ្មីនេះ មានសមាជិកតែ២៥រូបទេ រួមមាន នាយករដ្ឋមន្ត្រី ឧបនាយករដ្ឋមន្ត្រី៧រូប រដ្ឋមន្ត្រី១៤រូប និងថ្នាក់ដឹកនាំស្ថាប័នថ្នាក់រដ្ឋមន្ត្រី៣រូប៕
ដោយៈ សុជាតិ
