វៀតណាម ងាកទៅរកការនាំចូលប្រេងពីរុស្ស៊ី ដើម្បីសង្គ្រោះទីផ្សារប្រេងក្នុងស្រុកដែលកំពុងហក់ឡើងថ្លៃ

នាយករដ្ឋមន្ត្រីវៀតណាម លោក ផាម មិញជិញ បានទៅដល់ទីក្រុងមូស្គូ ដើម្បីបំពេញទស្សនកិច្ចជាផ្លូវការនៅប្រទេសរុស្ស៊ីជាថ្មី ខណៈដែលពិភពលោកកំពុងជួបបញ្ហាវិបត្តិថាមពល ជាពិសេសប្រេង និងហ្គាស។ តាមការគ្រោងទុកនៅក្នុងដំណើរទស្សនកិច្ចរយៈពេល៣ថ្ងៃ ដែលគ្រោងបញ្ចប់នៅថ្ងៃទី២៥ ខែមីនា វៀតណាម និងរុស្ស៊ី ត្រូវបានរំពឹងថា នឹងសម្រេចបាននូវកិច្ចព្រមព្រៀងជាច្រើន រួមទាំងកិច្ចសហប្រតិបត្តិការលើវិស័យប្រេង និងហ្គាស ខណៈដែលវៀតណាម កំពុងស្វែងរកការបង្កើនទុនបម្រុងប្រេងឥន្ធនៈរបស់ខ្លួន ចំពេលមានការរំខានដល់ការផ្គត់ផ្គង់សកល ដែលបណ្តាលមកពីសង្គ្រាមនៅមជ្ឈិមបូព៌ា។

រដ្ឋាភិបាលវៀតណាម បាននិយាយនៅក្នុងសេចក្តីថ្លែងការណ៍មួយនៅថ្ងៃទី២២ ខែមីនា ថា ដំណើរទស្សនកិច្ចរបស់លោក ផាម មិញជិញ នឹងផ្តោតលើការពង្រឹងទំនាក់ទំនងជាមួយរុស្ស៊ី និងពង្រីកកិច្ចសហប្រតិបត្តិការក្នុងវិស័យពាណិជ្ជកម្ម វិនិយោគ និងថាមពល។ ក្រៅពីវិស័យ​ប្រេង និងហ្គាស កិច្ចព្រមព្រៀងសំខាន់ៗមួយចំនួនទាក់ទងនឹងគម្រោងរោងចក្រថាមពលនុយក្លេអ៊ែ ក៏នឹងរំពឹងថា នឹងត្រូវបានចុះហត្ថលេខានៅពេលនោះផងដែរ។

រដ្ឋាភិបាលទីក្រុងហាណូយ បានបញ្ជាក់ជាថ្មីថា រុស្ស៊ី នៅតែជាដៃគូយុទ្ធសាស្ត្រមិនអាចខ្វះបានក្នុងវិស័យថាមពល ហើយកិច្ចសហប្រតិបត្តិការនាពេលនេះ នឹងជួយឱ្យវៀតណាម មានភាពធន់កាន់តែខ្លាំងចំពោះការប្រែប្រួល នៃតម្លៃថាមពលលើទីផ្សារអន្តរជាតិ៕

ដោយៈ សរ សុជាតិ