អាជ្ញាធរវៀតណាម បើកឱ្យជនបរទេសអាចកាន់កាប់លំនៅឋានដោយស្របច្បាប់ ដើម្បីជំរុញទីផ្សារអចលនទ្រព្យ

អាជ្ញាធរក្រុងហូជីមិញ បានផ្តល់ភ្លើងខៀវឱ្យក្រុមហ៊ុនអភិវឌ្ឍន៍អចលនទ្រព្យចំនួន១៧គម្រោងអាចលក់ និងផ្តល់សិទ្ធិកាន់កាប់អចលនទ្រព្យដល់បុគ្គល និងក្រុមហ៊ុនបរទេសដោយស្របច្បាប់ ដើម្បីជំរុញការអភិវឌ្ឍន៍ និងតម្លៃអចលនទ្រព្យនៅក្នុងទីក្រុងនេះ។ អ្នកជំនាញបានចាត់ទុកការសម្រេចនេះ ជាវិធានការមួយដ៏មានប្រសិទ្ធភាពក្នុងការបើកឲ្យជនបរទេសអាចចូលក្នុងទីផ្សារអចលនទ្រព្យនៅក្នុងស្រុក។

នៅឆមាសទី១ ឆ្នាំ២០២៥ វៀតណាម ទាក់ទាញគម្រោងវិនិយោគមានតម្លៃរហូតដល់ជាង២១ពាន់លានដុល្លារកើនឡើង៣៣% បើធៀបនឹងរយៈពេលដូចគ្នាកាលពីឆ្នាំមុន។ ក្នុងចំណោមគម្រោងវិនិយោគទាំងនេះ គម្រោងវិនិយោគពាក់ព័ន្ធនឹងវិស័យអចលនទ្រព្យមានទំហំជាង៥ពាន់លានដុល្លារ។ បច្ចុប្បន្នក្រៅពីសិង្ហបុរី វៀតណាម អាចជាប្រទេសទី២ នៅក្នុងតំបន់ ដែលមានស្ថានភាពសេដ្ឋកិច្ចអំណោយផលបំផុត។ វៀតណាម ត្រូវបានគេព្យាករថា នឹងសម្រេចបានកំណើនក្នុងរង្វង់៨% នៅឆ្នាំនេះ៕

ដោយៈ សរ សុជាតិ