អាជ្ញាធរវៀតណាម បានចាប់ខ្លួនមនុស្សយ៉ាងហោចណាស់ចំនួន៤នាក់ ចាប់ពីនាយកក្រុមហ៊ុនរហូតដល់នាយកផលិតកម្មរបស់ក្រុមហ៊ុនផលិតម្ហូបអាហារ Hida Food JSC យកទៅឃុំខ្លួន ក្រោយរកឃើញថា ក្រុមហ៊ុនបានផលិត និងចែកចាយផលិតផលអាហារក្លែងក្លាយ។
អាជ្ញាធរ វៀតណាម បានអះអាងថា លោក ត្រាន ហោងហ៊្វុក (Tran Hoang Phuoc Phuoc) នាយកក្រុមហ៊ុន SK FOODS ជាបុរសម្នាក់ក្នុងចំណោម៤នាក់ ដែលត្រូវបានប៉ូលិសចាប់ខ្លួនបានសារភាពថា ក្រោយមើលឃើញតម្រូវការសាច់គោវ៉ាកយូរបស់ជប៉ុន មានការកើនឡើងខ្លាំងនៅក្នុងប្រទេសវៀតណាម លោកក៏បានបញ្ចុះបញ្ចូលឱ្យក្រុមហ៊ុន Hida Food JSC ផលិតសាច់គោក្លែងក្លាយ។ បន្ទាប់មកនាយកក្រុមហ៊ុន Hida ដែលត្រូវបានចាប់ខ្លួនដែរនោះ ក៏បានទិញសាច់ក្របីមានតម្លៃថោកពីប្រទេសឥណ្ឌា ក្នុងតម្លៃជិត៥ដុល្លារក្នុងមួយគីឡូក្រាម ហើយបានចាក់ថ្នាំគីមីចូលក្នុងសាច់ក្របីនោះ ដើម្បីបង្កើតជាដុំខ្លាញ់សតូចៗដូចជាសាច់គោជប៉ុន វ៉ាកយូ ដើម្បីលក់នៅលើទីផ្សារក្នុងតម្លៃចន្លោះពី១៥ដុល្លារទៅ២០ដុល្លារក្នុងមួយគីឡូក្រាម។
ការស៊ើបអង្កេតបឋមរបស់អាជ្ញាធរវៀតណាម បានបង្ហាញថា ចាប់តាំងពីខែឧសភា ឆ្នាំ២០២៤ រហូតដល់ការចាប់ខ្លួនជនសង្ស័យទាំងនេះនៅសប្តាហ៍នេះ ក្រុមជនសង្ស័យទាំងនេះបានផលិតសាច់គោក្លែងក្លាយបានចំនួន១៤តោន ហើយបានលក់វានៅក្នុងទីក្រុងហាណូយ, ដាណាង, ញ៉ាត្រាង និងទីក្រុងហូជីមិញ៕
ដោយ៖ សុខ មង្គល
