កំពូលមហាសេដ្ឋី អេឡិន ម៉ាស់ កាលពីថ្ងៃចន្ទ ដើមសប្តាហ៍នេះ បានគំរាមប្តឹងក្រុមហ៊ុន Apple ពីបទរំលោភលើទំនុកចិត្តទាក់ទងនឹងចំណាត់ថ្នាក់នៃកម្មវិធី Grok AI chatbot ដែលជាកម្មសិទ្ធិរបស់ xAI startup និងជាកម្មសិទ្ធិផ្នែកបញ្ញាសិប្បនិម្មិតរបស់ក្រុមហ៊ុនលោក។ ការគំរាមប្តឹងក្រុមហ៊ុន Apple នេះធ្វើឡើងក្រោយក្រុមហ៊ុននេះបានលើកឡើងថា ក្រៅពី Open AI គ្មានក្រុមហ៊ុន AI ណាអាចឈានដល់ចំណាត់ថ្នាក់លេខ១នោះទេ។
តែយ៉ាងណាមកទល់ពេលនេះ ក្រុមហ៊ុន Apple មិនទាន់ឆ្លើយតបណាមួយជុំវិញការគំរាមរបស់លោក អេឡិន ម៉ាស់ នោះទេ ហើយ Apple ក៏មិនបានឆ្លើយតបភ្លាមៗចំពោះសំណើសុំការអត្ថាធិប្បាយជុំវិញបញ្ហានេះរបស់ CNBC នោះដែរ។
លោក អេឡិន ម៉ាស់ បានលើកឡើងថា កាលពីឆ្នាំមុនក្រុមហ៊ុន Apple បានភ្ជាប់ជាមួយ OpenAI ដើម្បីបញ្ចូល ChatGPT ទៅក្នុង iPhone, iPad និងផលិតផលកុំព្យូទ័រផ្សេងៗរបស់ខ្លួន ហើយពេលនោះលោកបានព្រមានថា ប្រសិនបើ Apple បញ្ចូល OpenAI នៅកម្រិត OS នោះឧបករណ៍ Apple នឹងត្រូវបានហាមឃាត់នៅក្នុងក្រុមហ៊ុនរបស់លោក ដោយសារវាជាការរំលោភលើសុវត្ថិភាពដែលមិនអាចទទួលយកបាន៕
ដោយៈ សរ សុជាតិ
