តើកិច្ចប្រជុំកំពូលរវាងមេដឹកនាំប្លុកប្រទេស BRICS ដែលរុស្ស៊ីធ្វើជាម្ចាស់ផ្ទះសម្រេចបានសមិទ្ធផលអ្វីខ្លះ?

ប្រធានាធិបតីរុស្ស៊ី លោក វ្ល៉ាឌីមៀ ពូទីន ដែលកំពុងស្វែងរកការគាំទ្រពីក្រុមមេដឹកនាំនៃក្រុមប្រទេស BRICS ចំពេលកំពុងប្រឈមមុខដាក់គ្នាជាមួយបស្ចិមលោកដោយសារសង្រ្គាមនៅអ៊ុយក្រែននោះបានអះអាងថា កំណើនសេដ្ឋកិច្ចជាមធ្យមរបស់ប្រទេសក្នុងប្លុក BRICS នៅឆ្នាំ២០២៤ និង២០២៥ នឹងមានកំណើន៣,៨% បើធៀបនឹងកំណើនសេដ្ឋកិច្ចរបស់ពិភពលោកដែលមាន៣,២% និង៣,៣%រៀងគ្នា។

កាលពីថ្ងៃអង្គារ សប្តាហ៍នេះ ក្រុមមេដឹកនាំនៃប្លុកប្រទេស BRICS បានបង្ហាញពីគម្រោងរួមគ្នាមួយចំនួនចាប់ពីការផ្លាស់ប្ដូរគ្រាប់ធញ្ញជាតិរហូតដល់ប្រព័ន្ធទូទាត់ឆ្លងព្រំដែន។ បើតាមសេចក្ដីថ្លែងការណ៍រួមនៃកិច្ចប្រជុំកំពូលរបស់ក្រុមមេដឹកនាំ BRICS រុស្ស៊ី ដែលជាប្រទេសនាំចេញស្រូវសាលីដ៏ធំបំផុតរបស់ពិភពលោកបានស្នើឱ្យបង្កើនការផ្លាស់ប្តូរគ្រាប់ធញ្ញជាតិនៃក្រុមប្រទេសនេះ ហើយក្រោយមកអាចពង្រីកពាណិជ្ជកម្មទំនិញសំខាន់ៗផ្សេងទៀតដូចជាប្រេង ឧស្ម័ន និងលោហៈជាដើម។

ចំណែកមេដឹកនាំផ្សេងទៀតបានគាំទ្រការបង្កើតប្រព័ន្ធទូទាត់សាច់ប្រាក់ឆ្លងព្រំដែនរួមគ្នាដែលនឹងជួយប្រទេសប្រ៊ីក ក្នុងការធ្វើពាណិជ្ជកម្មជាមួយគ្នាដោយមិនចាំបាច់ឆ្លងកាត់ប្រព័ន្ធហិរញ្ញវត្ថុសកល ដែលគ្រប់គ្រងដោយប្រាក់ដុល្លារ។

ប្រធានាធិបតីប្រេស៊ីលលោក លូឡា ដា ស៊ីលវ៉ា ដែលបានចូលរួមក្នុងកិច្ចប្រជុំកំពូលតាមរយៈវីដេអូពីចម្ងាយបាននិយាយថា វាដល់ពេលហើយសម្រាប់ក្រុមប្រទេសប្រ៊ីក ដើម្បីបង្កើតវិធីសាស្រ្តទូទាត់ជំនួសបែបនេះ ហើយធនាគារអភិវឌ្ឍន៍ថ្មី (NDB) របស់ក្រុមនេះ នឹងជំនួសឱ្យមូលនិធិរូបិយវត្ថុអន្តរជាតិ (IMF) ដ៏ល្អមួយ៕

អត្ថបទ៖ សុខ មង្គល