សិង្ហបុរី បានក្លាយជាគោលដៅដ៏ពេញនិយមសម្រាប់ក្រុមមហាសេដ្ឋីរក្សាទុកដុំមាស
ក្រុមមហាសេដ្ឋីនៅលើពិភពលោក កំពុងផ្លាស់ប្តូរកន្លែងរក្សាទុកមាសរបស់ខ្លួននៅក្រៅប្រទេសកាន់តែច្រើន ក្រោយទីផ្សារហិរញ្ញវត្ថុសកលរងការគំរាមកំហែងពីភាព…
លោក អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី ដែលកាន់តំណែងជាប្រធានប្តូរវេនរបស់អាស៊ាននៅឆ្នាំនេះ បាននិយាយក្នុងសុន្ទរកថា បើកកិច្ចប្រជុំកំពូលអាស៊ាន នៅទីក្រុងកូឡាឡាំពួកាលពីថ្ងៃចន្ទ ថា លោកបានទាក់ទងលោក ត្រាំ រួចហើយ ដើម្បីអញ្ជើញលោកឱ្យចូលរួមក្នុងកិច្ចប្រជុំកំពូលអាម៉េរិក-អាស៊ាន នាពេលខាងមុខ។
ការិយាល័យនាយករដ្ឋមន្ត្រីម៉ាឡេស៊ី បាននិយាយថា កិច្ចប្រជុំនេះ បានគ្រោងទុកជាបណ្តោះអាសន្នថានឹងធ្វើនៅក្នុងខែតុលា ក្នុងទីតាំងមួយដែលមិនទាន់កំណត់បាននៅឡើយទេ ប៉ុន្តែសារព័ត៌មាននីកេអេស៊ា យល់ឃើញថា លិខិតរបស់លោក អាន់វ៉ា ចង់បានកិច្ចប្រជុំកំពូលឱ្យបានឆាប់តាមដែលអាចធ្វើទៅបាន។
ទោះយ៉ាងណា ប្រភពការទូតមួយបានឱ្យដឹងថា សមាជិកអាស៊ានមួយចំនួនមានការប្រយ័ត្នប្រយែងចំពោះសំណើនេះដោយពួកគេព្រួយបារម្ភថា ពួកគេអាចត្រូវមេដឹកនាំអាម៉េរិក ចំអកក្រោយពីឧប្បត្តិហេតុបែបនេះបានកើតឡើងរួចហើយកាលពីសប្តាហ៍មុននៅឯសេតវិមាននៅពេលលោក ត្រាំ បានប្រឈមមុខនឹងប្រធានាធិបតីអាហ្វ្រិកខាងត្បូងលោក ស៊ីរីល រ៉ាម៉ាផូសា (Cyril Ramaphosa) ចំពោះការអះអាងមិនពិតអំពីប្រល័យពូជសាសន៍លើពលរដ្ឋស្បែកស។
លិខិតដែលបានផ្ញើកាលពីថ្ងៃចន្ទនេះ បានធ្វើឡើងចំពេលមានការកើនឡើងនៅតំបន់អាស៊ាន ជុំវិញគោលនយោបាយពាណិជ្ជកម្មគាំពារនិយមរបស់ទីក្រុងវ៉ាស៊ីនតោន ដែលនៅតែជាទីផ្សារនាំចេញដ៏សំខាន់បំផុតមួយរបស់តំបន់នេះ ខណៈប្រទេសសមាជិកអាស៊ានមួយចំនួនមានភាពងាយរងគ្រោះខ្លាំងចំពោះការផ្លាស់ប្តូររំហូរពាណិជ្ជកម្មពិភពលោក។
ពន្ធបដិការរបស់សហរដ្ឋអាម៉េរិក បានកំណត់គោលដៅលើការនាំចេញយ៉ាងទូលំទូលាយរបស់អាស៊ានជាមួយនឹងអត្រាចាប់ពី១០% លើទំនិញរបស់សិង្ហបុរី រហូតដល់៤៩% លើផលិតផលពីកម្ពុជា។ អត្រាពន្ធខ្ពស់បែបនេះបានធ្វើឱ្យមានការភ្ញាក់ផ្អើលទូទាំងទីផ្សារក្នុងតំបន់ និងបានជំរុញឱ្យអាស៊ានពង្រឹងកិច្ចសហប្រតិបត្តិការសេដ្ឋកិច្ចក្នុងប្លុកនេះជាបន្ទាន់ផងដែរ៕
ដោយ៖ សុខ មង្គល
