តើវិស័យសុខាភិបាលពិភពលោកអាចជួបបញ្ហាប្រឈមអ្វីខ្លះ ក្រោយលោក ដូណាល់ ត្រាំ ប្រកាសដកសហរដ្ឋអាម៉េរិកចេញពីអង្គការសុខភាពពិភពលោក?

អង្គការសុខភាពពិភពលោក ដែលជាផ្នែកដ៏សំខាន់មួយនៃអង្គការសហប្រជាជាតិ (UN) បានអំពាវនាវឱ្យសហរដ្ឋអាម៉េរិក ដែលជាបងធំទី១ របស់ពិភពលោកពិចារណាឡើងវិញចំពោះការសម្រេចចិត្តរបស់ប្រធានាធិបតី ដូណាល់ ត្រាំ ក្នុងការដកសហរដ្ឋអាម៉េរិក ចេញពីស្ថាប័នសុខាភិបាលពិភពលោកមួយនេះ ដោយព្រមានថា វិធានការរបស់លោក ដូណាល់ ត្រាំ នេះនឹងអាចជះផលប៉ះពាល់ធ្ងន់ធ្ងរដល់សន្តិសុខសុខាភិបាលពិភពលោកទាំងមូល។ នេះបើយោងតាមការចុះផ្សាយរបស់សារព័ត៌មានអន្តរជាតិដ៏ល្បីល្បាញ Bloomberg។

គម្រោងដកខ្លួនចេញរបស់សហរដ្ឋអាម៉េរិក នឹងធ្វើឱ្យអង្គការសុខភាពពិភពលោកជួបការលំបាកខ្លាំងក្នុងការស្វែងរកម្ចាស់ជំនួយធំមកជំនួស ព្រោះសហរដ្ឋអាម៉េរិក គឺជាម្ចាស់ជំនួយធំបំផុតរបស់អង្គការនេះ ដែលបានផ្ដល់ជំនួយមូលនិធិរហូតដល់ទៅជាង១,៣ពាន់លានដុល្លារចន្លោះពីឆ្នាំ២០២២ ដល់ឆ្នាំ២០២៣។

ដូចនេះ ប្រសិនបើគ្មានមូលនិធិពីសហរដ្ឋអាម៉េរិកទេនោះ កម្មវិធីសំខាន់ៗដែលអង្គការសុខភាពពិភពលោកអនុវត្តដូចជាកម្មវិធីប្រយុទ្ធប្រឆាំងមេរោគអេដស៍ ជំងឺស្វិតដៃជើង និងជំងឺអេបូឡា ព្រមទាំងវីរុស Marburg ដ៏គ្រោះថ្នាក់ជាដើម ប្រឈមហានិភ័យជាប់គាំង។ អង្គការសុខភាពពិភពលោកបានដើរតួនាទីយ៉ាងសំខាន់ក្នុងការការពារសុខភាព និងសន្តិសុខរបស់ប្រជាជនទូទាំងពិភពលោក រួមទាំងពលរដ្ឋអាម៉េរិកផងដែរ។

យោងតាមលោក អែនដឺស ណតស្ត្រូម (Anders Nordström) អតីតអគ្គនាយកស្តីទីនៃអង្គការសុខភាពពិភពលោកបានទម្លាយឱ្យដឹងថា ម្ចាស់ជំនួយរបស់អង្គការសុខភាពពិភពលោកដូចជាប្រទេសអាល្លឺម៉ង់ និងបារាំង ជាដើមប្រហែលជាមិនអាចបង្កើនការផ្ដល់ជំនួយមូលនិធិបានឡើយ ព្រោះប្រទេសទាំងនោះ ក៏កំពុងមានបញ្ហាហិរញ្ញវត្ថុដែរ។

លោក អែនដឺស ណតស្ត្រូម (Anders Nordström) បានបង្ហាញក្ដីរំពឹងថា ប្រទេសផ្សេងៗទៀតនៅតំបន់អាស៊ី និងមជ្ឈិមបូព៌ា នឹងចេញមុខជួយក្នុងកិច្ចការនេះ ដើម្បីបង្កើនឥទ្ធិពលរបស់ពួកគេនៅក្នុងវិស័យសុខាភិបាលពិភពលោក។ ជាការកត់សម្គាល់ មហាយក្សចិន បានបង្ហាញការគាំទ្រភ្លាមៗកាលពីថ្ងៃទី២១ ខែមករា ដោយអ្នកនាំពាក្យក្រសួងការបរទេសចិន បានលើកឡើងថា តួនាទីរបស់អង្គការសុខភាពពិភពលោកគួរតែត្រូវបានពង្រឹងឱ្យកាន់តែរឹងមាំ គឺមិនមែនធ្វើឱ្យចុះខ្សោយនោះឡើយ។

ទន្ទឹមនេះ សហភាពអឺរ៉ុប ក៏បានជំរុញឱ្យសហរដ្ឋអាម៉េរិក ពិចារណាឡើងវិញផងដែរ និងអំពាវនាវឱ្យបណ្ដាប្រទេសជាសមាជិកនៃអង្គការនេះពង្រឹងការប្តេជ្ញាចិត្តរបស់ពួកគេដើម្បីជួយស្រោចស្រង់វិស័យសុខាភិបាលពិភពលោក៕

ដោយ: តែម សុខុម