តើអ្នកជំនាញមានការរំពឹងបែបណា ប្រសិនបើក្រុមហ៊ុនយក្សចិន BYD បង្កើតរោងចក្រផ្គុំ និងដំឡើងរថយន្តអគ្គិសនីនៅកម្ពុជា?

លោក សឿន ដារ៉ា នាយកប្រតិបត្តិនៃសហព័ន្ធឧស្សាហកម្មយានយន្តកម្ពុជាជឿជាក់ថា ប្រសិនបើក្រុមហ៊ុនផលិតរថយន្តអគ្គិសរបស់ចិន BYD ពិតជាបង្កើតរោងចក្រផ្គុំនិងដំឡើងរថយន្តអគ្គិសនីនៅកម្ពុជានៅឆ្នាំក្រោយមែននោះ កម្ពុជានឹងអាចទាញយកអត្ថប្រយោជន៍ជាច្រើនពីក្រុមហ៊ុនខ្នាតយក្សមួយនេះ។ តាមរយៈគម្រោងវិនិយោគរបស់ក្រុមហ៊ុននេះមិនត្រឹមតែអាចបង្កើតការងារជូនដល់ប្រជាពលរដ្ឋ និងជួយពាំនាំច្ចេកវិទ្យាថ្មីៗមកកម្ពុជានោះទេ ថែមទាំងជួយជំរុញកំណើនសេដ្ឋកិច្ច និងជួយទាក់ទាញការវិនិយោគមកកម្ពុជាផងដែរ។ បើតាមអ្នកជំនាញរូបនេះ គម្រោងវិនិយោគរបស់ក្រុមហ៊ុន BYD នៅកម្ពុជា គឺផ្តោតសំខាន់លើការផ្គុំ និងដំឡើងរថយន្តអគ្គិសនីសម្រាប់នាំចេញទៅកាន់ទីផ្សារអន្តរជាតិ។

បើតាមលោក សឿន ដារ៉ា ការប្រើប្រាស់រថយន្តអគ្គិសនីនៅកម្ពុជាបច្ចុប្បន្នហាក់នៅមានកម្រិតនៅឡើយបើធៀបជាមួយនឹងបណ្តាប្រទេសនៅក្នុងតំបន់ បើទោះបីជាមានសម្ទុះកើនឡើងជាបន្តបន្ទាប់ពីមួយថ្ងៃទៅមួយថ្ងៃក៏ដោយ។ យ៉ាងណាក៏ដោយ ជំនាញរូបនេះរំពឹងថា ការប្រើប្រាស់រថយន្តអគ្គិសនីនៅកម្ពុជានៅឆ្នាំ២០២៥ ខាងមុខ នឹងអាចកើនឡើងប្រមាណ៥០%បន្ថែមទៀត បើធៀបនឹងការប្រើប្រាស់នៅឆ្នាំនេះ។ បើតាមការគូសបញ្ជាក់របស់អ្នកជំនាញរូបនេះ កត្តាដែលធ្វើឱ្យការប្រើប្រាស់រថយន្តអគ្គិសនីនៅកម្ពុជានៅមានកម្រិត ក៏ដោយសារប្រជាពលរដ្ឋនៅមិនទាន់មានជំនឿចិត្តខ្ពស់លើការប្រើប្រាស់រថយន្តប្រភេទនេះ ខណៈស្ថានីយបញ្ចូលថាមពលអគ្គិសនីនៅកម្ពុជាក៏នៅមានចំនួនតិចនៅឡើយ។

គួរជម្រាបថា កាលពីពេលថ្មីៗនេះសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបានអះអាងថា ក្រុមហ៊ុន BYD របស់ចិន កំពុងចរចាជាមួយក្រុមប្រឹក្សាអភិវឌ្ឍន៍កម្ពុជាក្នុងការមកបើករោងចក្រផ្គុំ និងដំឡើងរថយន្តអគ្គិសនីនៅកម្ពុជានៅឆ្នាំក្រោយនេះ។ គិតមកទល់ពេលនេះ នៅកម្ពុជាមានរថយន្តអគ្គិសនីចុះបញ្ជីនៅក្រសួងសាធារណការ និងដឹកជញ្ជូនចំនួន២,៣២៧គ្រឿង ក្នុងនោះរថយន្តអគ្គិសនីរបស់ក្រុមហ៊ុន BYD ចំនួន៧៩០គ្រឿងឈរលើកំពូលតារាង និងបន្តបន្ទាប់ដោយរថយន្តអគ្គិសនីរបស់ក្រុមហ៊ុនតូយ៉ូតាចំនួន៤៤៣គ្រឿង, រថយន្តអគ្គិសនីរបស់ក្រុមហ៊ុនTesla ចំនួន២៦៩គ្រឿង និងរថយន្តអគ្គិសនីរបស់ក្រុមហ៊ុនផ្សេងៗទៀត៕

អត្ថបទ សោម ស្រីពេជ្រ និងរូបភាពឯកសារ