តើមានកត្តាអ្វីជំរុញឱ្យអង់គ្លេស និងអាម៉េរិក មិនព្រមចុះហត្ថលេខាលើកិច្ចព្រមព្រៀងអន្តរជាតិ ស្ដីពីបច្ចេកវិទ្យាបញ្ញាសិប្បនិម្មិត?

ប្រទេសអង់គ្លេស បានច្រានចោលមិនចុះហត្ថលេខាលើកិច្ចព្រមព្រៀងអន្តរជាតិ ស្ដីពីបច្ចេកវិទ្យាបញ្ញាសិប្បនិម្មិត AI ដែលគាំទ្រដោយប្រទេសធំៗមួយចំនួន ដូចជាបារាំង មហាយក្សចិន និងឥណ្ឌា នោះឡើយអំឡុងកិច្ចប្រជុំកំពូលពិភពលោកនៅទីក្រុងប៉ារីស ប្រទេសបារាំង ដោយលើកឡើងពីការព្រួយបារម្ភអំពីសន្តិសុខជាតិ និងអភិបាលកិច្ច។

ទន្ទឹមនេះ សហរដ្ឋអាម៉េរិក ដែលជាមហាអំណាចធំបំផុតទី១របស់ពិភពលោកក៏មិនព្រមចុះហត្ថលេខានោះដែរ ដោយអនុប្រធានាធិបតីសហរដ្ឋអាម៉េរិក លោក JD Vance បានព្រមានថា ការធ្វើនិយ័តកម្ម ឬការរឹតបន្តឹងលើ AI ខ្លាំងពេកអាចនឹងរារាំងដល់ការរីកចម្រើននៃឧស្សាហកម្ម AI ដែលកំពុងរីកចម្រើនយ៉ាងឆាប់រហ័ស។ អនុប្រធានាធិបតីរូបនេះ បានសង្កត់ធ្ងន់ថា រដ្ឋបាលរបស់លោក ដូណាល់ ត្រាំ ផ្តល់អាទិភាពសំខាន់លើផលប្រយោជន៍សេដ្ឋកិច្ចជាជាងការរឹតបន្តឹងច្បាប់។

ទោះជាយ៉ាងណា ប្រធានាធិបតីបារាំង លោក អេម៉ានូអែល ម៉ាក្រុង (Emmanuel Macron) បានទាញទឡ្ហីករណ៍ថា បទប្បញ្ញត្តិដ៏រឹងមាំ គឺចាំបាច់ណាស់សម្រាប់វឌ្ឍនភាពនៃបច្ចេកវិទ្យាបញ្ញាសិប្បនិម្មិត AI។

សូមបញ្ជាក់ថា កិច្ចព្រមព្រៀងអន្តរជាតិស្ដីពីបច្ចេកវិទ្យាបញ្ញាសិប្បនិម្មិត AI ដែលចុះហត្ថលេខាដោយ៦០ប្រទេសនេះមានគោលដៅកាត់បន្ថយគម្លាតរវាងអ្នកទទួលបានបច្ចេកវិទ្យា និងអ៊ីនធឺណិត និងអ្នកដែលមិនទទួលបានបច្ចេកវិទ្យា និងអ៊ីនធឺណិតតាមរយៈការជំរុញឱ្យការអភិវឌ្ឍបច្ចេកវិទ្យាបញ្ញាសិប្បនិម្មិត AI មានតម្លាភាព ប្រកបដោយបរិយាប័ន្ន ក្រមសីលធម៌ សុវត្ថិភាព និងគួរឱ្យជឿទុកចិត្តបាន៕

ដោយ: តែម សុខុម