វិធានការដំឡើងពន្ធរបស់លោក ដូណាល់ ត្រាំ ដែលបានប្រកាសកាលពីថ្ងៃទី២ ខែមេសា នឹងធ្វើឱ្យថ្លៃដើមផលិតទំនិញជាច្រើនរបស់វៀតណាមមានការកើនឡើង ជាពិសេសផលិតផលរបស់ក្រុមហ៊ុនល្បីៗចំនួន៣។ ក្រុមហ៊ុនទាំងនេះរួមមានក្រុមហ៊ុនសម្លៀកបំពាក់កីឡាយីហោ Nike, ក្រុមហ៊ុន American Eagle ដែលជាក្រុមហ៊ុនផលិតសម្លៀកបំពាក់ខូវប៊យ និងសម្ភារៈប្រើប្រាស់ផ្សេងៗ និងក្រុមហ៊ុនផលិតគ្រឿងសង្ហារឹម និងផ្ទះបាយ និងឧបករណ៍ក្មេងលេង Wayfair។
អ្នកវិភាគបានលើកឡើងថា វៀតណាមបានក្លាយជាជម្រើសដ៏ពេញនិយមមួយសម្រាប់ក្រុមហ៊ុន ដែលព្យាយាមបញ្ចៀសភាពតានតឹងពាណិជ្ជកម្មរបស់សហរដ្ឋអាម៉េរិកជាមួយទីក្រុងប៉េកាំង ហើយការដាក់ពន្ធថ្មីនេះ នឹងធ្វើឲ្យប៉ះពាល់ដល់ទំនិញនានា ជាពិសេសតម្លៃទំនិញនឹងមានការកើនឡើងទៅតាមនឹងដែរ។
លោក ដូណាល់ ត្រាំ បាននិយាយថា លោកនឹងដាក់ពន្ធ៤៦% លើការនាំចូលទំនិញពីប្រទេសវៀតណាមដែលជាផ្នែកមួយនៃវិធានការពន្ធរបស់រដ្ឋបាលសហរដ្ឋអាម៉េរិក។
តាមរយៈការកំណត់ពន្ធនេះ វានឹងបង្កើនថ្លៃដើមលើផលិតផលនានារាប់តាំងពីសម្លៀកបំពាក់ គ្រឿងសង្ហារិម និងប្រដាប់ប្រដា និងឧបករណ៍ក្មេងលេង ដែលវៀតណាមនាំចូលទីផ្សារសហរដ្ឋអាម៉េរិក។ តាមសេចក្តីរាយការណ៍ចុងក្រោយវិធានការពន្ធថ្មីរបស់លោក ត្រាំ លើប្រទេសវៀតណាម និងប្រទេសផ្សេងៗនឹងចូលជាធរមាននៅថ្ងៃទី៩ ខែមេសា ដ៏ខ្លីខាងមុខនេះ៕
ដោយៈ សរ សុជាតិ
