ប៉ុន្តែនៅពេលនេះបេក្ខជនដែលលេចធ្លោមានតែពីររូប គឺលោក ឆៃកាសេម នីទិស៊ីរី (Chaikasem Nitisiri) មកពីគណបក្សភឿថៃ និងជាអ្នកដែលទំនាក់ទំនងជិតដិតនឹងលោក ថាក់ស៊ីន ស៊ីណាវ៉ាត្រា និងលោក អានុទិន ឆានវីរ៉ាគុល (Anutin Charnvirakul) មេដឹកនាំគណបក្សភូមិចៃថៃ ដែលធ្លាប់កាន់តំណែងជាឧបនាយករដ្ឋមន្រ្តី និងជារដ្ឋមន្រ្តីមហាផ្ទៃ។ នេះបើយោងតាមការចុះផ្សាយរបស់សារព័ត៌មាន Bloomberg។
សភាថៃ អាចនឹងកោះប្រជុំ ដើម្បីជ្រើសរើសនាយករដ្ឋមន្រ្តីថ្មីជំនួសលោកស្រី ផែថងថាន ស៊ីណាវ៉ាត្រា ដែលត្រូវបានតុលាការធម្មនុញ្ញបញ្ចប់តំណែងកាលពីថ្ងៃទី២៩ ខែសីហា ចន្លោះពីថ្ងៃទី៣ ដល់ថ្ងៃទី៥ ខែកញ្ញា ខាងមុខនេះ។ នៅពេលនេះ បេក្ខជននាយករដ្ឋមន្ត្រីដែលមានភាពលេចធ្លោជាងគេមានចំនួនពីររូប រួមមាន លោក ឆៃកាសេម នីទិស៊ីរី មកពីគណបក្សភឿថៃ និងលោក អានុទិន មកពីគណបក្សភូមិចៃថៃ។
អ្នកវិភាគបានលើកឡើងថា រវាងបេក្ខជនទំាំងពីរ ប្រសិនបើបេក្ខជនណាមួយអាចទាក់ទាញការគាំទ្រពីតំណាងរាស្រ្តមកពីគណបក្សប្រឆាំង គឺគណបក្សប្រជាជនថៃ ដែលមានសមាជិកសភាភាគច្រើនលើសលុបជាអតីតសមាជិកគណបក្សឆ្ពោះទៅមុខ ដែលឈ្នះឆ្នោតតែមិនមានឱកាសកាន់អំណាច ហើយត្រូវតុលាការធម្មនុញ្ញរំលាយចោល នោះនឹងអាចក្លាយជានាយករដ្ឋមន្រ្តីថៃ ទី៣២។
បច្ចុប្បន្នទាំងតំណាងគណបក្សភឿថៃ ដែលគាំទ្រលោក ឆៃកាសេម និងគណបក្សភូមិថៃថៃ ដែលដាក់បេក្ខភាពលោក អានុទិន កំពុងប្រឹងប្រែងទាក់ទាញការគាំទ្រពីគណបក្សប្រជាជនថៃ។ ស្ថិតក្នុងស្ថានភាពដ៏ប្រទាញប្រទង់គ្នានេះ គណបក្សប្រជាជនថៃ បានដាក់នូវលក្ខខណ្ឌមើលទៅសាមញ្ញបំផុត ប៉ុន្តែវាបង្កប់នូវអត្ថន័យដែលពិបាកទទួលយកសម្រាប់គណបក្សទាំងពីរ ក្នុងនោះគណបក្សនេះទាមទារឱ្យរំលាយសភាក្នុងរយៈពេល៤ខែ ដើម្បីបោះឆ្នោតជាថ្មី និងការធ្វើប្រជាមតិលើរដ្ឋធម្មនុញ្ញថៃ។ ហើយមកដល់ពេលនេះ គណបក្សនេះមិនទាន់បានបញ្ជាក់ថា ខ្លួនគាំទ្របេក្ខភាពណាមួយនៅឡើយទេ។
លោក ធីទីណាន ភុងសុឌីរក្ស (Thitinan Pongsudhirak) សាស្ត្រាចារ្យផ្នែកវិទ្យាសាស្ត្រនយោបាយនៅសាកលវិទ្យាល័យជូឡាឡុងកន បានអះអាងថា ច្បាប់ថៃ ពេលខ្លះហាក់មានចំណុចខ្សោយ ដែលរៀបចំឡើង ដើម្បីរក្សាគណបក្ស និងអ្នកនយោបាយទន់ខ្សោយ តែពេលខ្លះច្បាប់នោះហាក់ដូចជាតឹងតែងនាំឱ្យមានភាពរញ៉េរញ៉ៃយ៉ាងខ្លាំង។
អ្នកវិភាគបានព្រមានថា ប្រសិនបើស្ថានភាពនយោបាយថៃ នៅតែស្ថិតក្នុងស្ថានភាពមិនមានមេដឹកនាំពិតប្រាកដដូចសព្វថ្ងៃនេះ នោះសេដ្ឋកិច្ចថៃនឹងជួបបញ្ហាកាន់តែធ្ងន់ធ្ងរ ស្របពេលដែលប្រទេសនេះកំពុងមានអរិភាពព្រំដែនជាមួយកម្ពុជា និងមីយ៉ាន់ម៉ា ដែលធ្វើឱ្យរាំងស្ទះពាណិជ្ជកម្ម និងលំហូរនៃទេសចរ។ ជាក់ស្តែងភាពចលាចលនយោបាយផ្ទៃក្នុងថៃ បានទាញទម្លាក់តម្លៃភាគហ៊ុនថៃ ឱ្យធ្លាក់ចុះជិត១២% ដែលជាការធ្លាក់ចុះដ៏អាក្រក់បំផុតនៅអាស៊ី៕
ដោយៈ សរ សុជាតិ
