តើនាយករដ្ឋមន្ត្រីជប៉ុន លោក អ៊ីស៊ីបា អាចនឹងចុះចេញពីតំណែងនៅខែសីហា មែនឬ?

កាសែតម៉ៃនិឈិ (Mainichi) របស់ជប៉ុន បានរាយការណ៍នៅថ្ងៃពុធ សប្តាហ៍នេះ ថា នាយករដ្ឋមន្ត្រីជប៉ុន លោក ស៊ីហ្គើរុ អ៊ីស៊ីបា បង្ហាញបំណងពីការប្រកាសលាលែងពីតំណែងនៅចុងខែសីហា ដ៏ខ្លីខាងមុខនេះ។ ប្រព័ន្ធផ្សព្វផ្សាយរបស់ជប៉ុនមួយផ្សេងទៀត គឺកាសែតយ៉ូមីអ៊ូរី (Yomiuri) ក៏បានរាយការណ៍ស្រដៀងគ្នាដែរថា លោក អ៊ីស៊ីបា នឹងសម្រេចចិត្តថា តើនឹងត្រូវបន្តកាន់តំណែងជានាយករដ្ឋមន្ត្រីជាបន្តទៀត ឬយ៉ាងណា បន្ទាប់ពីវាយតម្លៃអំពីវឌ្ឍនភាពនៃការចរចា ពន្ធគយជាមួយនឹងសហរដ្ឋអាម៉េរិករួច។

ចំណែកសារព័ត៌មានជីជីប្រេស (Jiji Press) បានរាយការណ៍ថា លោក អ៊ីស៊ីបា នឹងសម្រេចចិត្តក្នុងពេលឆាប់ៗនេះ ថាតើនឹងត្រូវចុះចេញពីតំណែង ឬក៏អត់ ដោយបន្ថែមថា សមាជិកជាន់ខ្ពស់នៃគណបក្សប្រជាធិបតេយ្យសេរីរបស់លោកបានព្យាករថា លោក អ៊ីស៊ីបា នឹងចុះចេញពីតំណែងនៅខែក្នុងសីហា ខាងមុខនេះ។

ដូចគ្នានេះដែរ កាសែតសានកេ (Sankei) បានរាយការណ៍ថា លោក អ៊ីស៊ីបា នឹងសម្រេចចិត្តចុងក្រោយពីអនាគតរបស់លោកនៅក្នុងខែសីហា ហើយថា ប្រសិនបើលោកសម្រេចចិត្តចុះចេញពីតំណែង នោះលោកនឹងត្រូវបានរំពឹងថា នឹងជ្រើសរើសមេដឹកនាំគណបក្សថ្មីនៅក្នុងខែកញ្ញា ហើយនឹងរៀបចំការបោះឆ្នោតសម្រាប់មេដឹកនាំថ្មីនោះនៅក្នុងខែតុលា។

កាសែតមួយចំនួនដូចជាកាសែត Nikkei ជាដើម បានលាតត្រដាងថា លោក អ៊ីស៊ីបា នៅថ្ងៃពុធសប្តាហ៍នេះ នឹងចូលរួមក្នុងកិច្ចប្រជុំដ៏ធំមួយជាមួយប្រធានទីប្រឹក្សាគណបក្សប្រជាធិបតេយ្យ សេរី (LDP) គឺលោក តារ៉ូ អាស៊ូ (Taro Aso) អនុប្រធានគណបក្សលោក យ៉ូស៊ីហ៊ីដេ ស៊ូហ្គា (Yoshihide Suga) និងអតីតនាយករដ្ឋមន្ត្រីជប៉ុន លោក ហ៊្វូមីអូ គីស៊ីដា (Fumio Kishida)។

កាសែតដដែលនេះ បានអះអាងថា លោក អ៊ីស៊ីបា  នឹងពិភាក្សាអំពីអនាគតរបស់លោកជាមួយនឹងអតីតនាយករដ្ឋមន្ត្រី លោក គីស៊ីដា។ ទោះយ៉ាងណាលោក អ៊ីស៊ីបា មិនបាននិយាយអ្វីជាសាធារណៈពាក់ព័ន្ធនឹងអនាគតរបស់លោកនោះទេ ដោយគ្រាន់តែនិយាយបន្ទាប់ពីការបោះឆ្នោតកាលពីថ្ងៃអាទិត្យ ថា លោកនឹងបន្តធ្វើជានាយករដ្ឋមន្ត្រីបន្តទៀត៕

ដោយ៖ សុខ មង្គល