ផ្លូវល្បឿនលឿនភ្នំពេញ-ព្រះសីហនុ នឹងដាក់ឲ្យប្រើប្រាស់មុនពេលកំណត់!

ឯកឧត្តម ហេង រត្ន​ពិសិដ្ឋ អគ្គនាយក​នៃ​អគ្គនាយកដ្ឋាន​សាធារណការ​បាន​បញ្ជាក់​ប្រាប់​ខេ​ម​បូ​ណូ​មី​ស​ថា បើ​តាម​ផែនការ​ដែល​បាន​កំណត់​ទុក គម្រោង​ផ្លូវ​ល្បឿន​លឿន​ភ្នំពេញ​-​ព្រះ​សីហ​នុ គ្រោង​នឹង​ដាក់​ឲ្យ​ប្រើប្រាស់​នៅ​អំឡុង​ខែមីនា ឆ្នាំ​២០២៣​។ ក៏​ប៉ុន្ដែ​អ្វី​ៗ​មានការ​ប្រែប្រួល​ខុស​ពី​គម្រោងការ ដោយសារ​តែ​ការ​សាងសង់​មាន​វឌ្ឍនភាព​យ៉ាង​លឿន​រហ័ស ក្រសួង​សាធារណការ​គ្រោង​នឹង​ដាក់​ឲ្យ​ប្រើប្រាស់​ផ្លូវ​ល្បឿន​លឿន​ពី​ភ្នំពេញ​ទៅ​ខេត្ត​ព្រះ​សីហ​នុ នៅ​មុន​ពេល​កំណត់ ពោល​គឺ​នា​អំឡុង​ខែកញ្ញា ឆ្នាំ​២០២២ ខណៈ​បច្ចុប្បន្ន​គិត​ត្រឹម​ខែកក្កដា ការ​សាងសង់​សម្រេច​បាន​ប្រមាណ​៦០% ហើយ​។

មូលហេតុ​ដែល​ជំរុញ​ឲ្យ​ការ​សាងសង់​ផ្លូវ​ល្បឿន​លឿន​មាន​វឌ្ឍនភាព​លឿន​រហ័ស និង​គ្រោង​បញ្ចប់​មុន​ការ​កំណត់​យ៉ាង​ដូច្នេះ ត្រូវ​បាន​ឯកឧត្តម ហេង រត្ន​ពិសិដ្ឋ អះអាង​ប្រាប់​ខេ​ម​បូ​ណូ​មី​ស​ថា គឺ​ដោយសារ​តែ​កន្លង​មក ក្រសួង​សាធារណការ និង​ដឹក​ជញ្ជូន​បាន​ស្នើ និង​ជំរុញ​ឲ្យ​ក្រុមហ៊ុន​ព​ន្លឿ​ន​ការ​សាងសង់​របស់​ខ្លួន​ឲ្យ​បាន​ឆាប់​។ 

ម្យ៉ាងទៀត ដំណើរការ​សាងសង់​មិន​មានការ​រំខាន​ពី​ការ​រីក​រាលដាល​ឆ្លង​កូ​វី​ដ​-១៩​នោះ​ទេ ពោល​គឺ​ការដ្ឋាន​សាងសង់​ផ្លូវ​ល្បឿន​លឿន​ភ្នំពេញ ទៅ​ខេត្ត​ព្រះ​សីហ​នុ​នេះ ដំណើរការ​ធម្មតា​។សូម​បញ្ជាក់​ថា ផ្លូវ​ល្បឿន​លឿន​ពី​ភ្នំពេញ​ទៅ​ខេត្ត​ព្រះ​សីហ​នុ គ្រោង​ចំណាយ​ថវិកា​ប្រមាណ​ជាង​២​ពាន់​លាន​ដុល្លារ សាងសង់​ដោយ​ក្រុមហ៊ុន Cambodian PPSHV Expressway Co., Ltd និង​ក្រុមហ៊ុន​បុត្រ​សម្ព័ន្ធ​នៃ​ក្រុមហ៊ុន​សាជីវកម្ម​ស្ពាន​ថ្នល់​ចិន (CRBC) និង ត្រួតពិនិត្យ​បច្ចេកទេស​ដោយ​ក្រុមហ៊ុន MINCONSULT SDN. BHD​។ ផ្លូវ​នេះ​សាងសង់​ឡើង ឆ្លងកាត់​រាជធានី​ភ្នំពេញ ខេត្តកណ្តាល កំពង់ស្ពឺ កោះកុង និង ខេត្ត​ព្រះ​សីហ​នុ ដែល​មាន​ប្រវែង​សរុប​ជាង​១៩០​គីឡូម៉ែត្រ​។ ផ្លូវ​ល្បឿន​លឿន​នេះ​មាន ៤​គន្លង (២​គន្លង​ទៅ​, ២​គន្លង​មក​) ហើយ​អនុញ្ញាត​ឲ្យ​អ្នកដំណើរ​បើកបរ​ក្នុង​ល្បឿន ១០០​គីឡូម៉ែត្រ​ក្នុង​១​ម៉ោង ឬ លើស​ពី​នេះ​៕