មេ SME ជឿជាក់ថា ឆន្ទៈគាំទ្រផលលិតផលក្នុងស្រុករបស់ពលរដ្ឋខ្មែរនឹងនៅតែបន្ត ទោះមានការបើកច្រកព្រំដែនឡើងវិញ

បើតាមប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជាជឿជាក់ថា ឆន្ទៈគាំទ្រផលិតផលក្នុងស្រុករបស់ពលរដ្ឋខ្មែរទំនងជាមិនធ្លាក់ចុះនោះឡើយ បើទោះបីច្រកទ្វារព្រំដែនត្រូវបានសម្រួលឱ្យដំណើរការប្រក្រតីភាពឡើងវិញក៏ដោយ ព្រោះភាពឈឺចាប់របស់ពលរដ្ឋខ្មែរពីការរំលោភបំពានទាំងកម្រោលរបស់ថៃនឹងដិតដាមជាប់ក្នុងចិត្តរបស់ពលរដ្ឋខ្មែរ។

ឧកញ៉ា តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជាកត់សម្គាល់ឃើញថា បន្ទាប់ពីថៃបានបិទច្រកព្រំដែនជាមួយកម្ពុជាដោយឯកតោភាគី បានជំរុញឱ្យការផលិតផលិតផលថ្មីៗមានការកើនឡើងគួរឱ្យកត់សម្គាល់សម្រាប់បំពេញតម្រូវការប្រើប្រាស់ក្នុងស្រុក និងអាចឈានដល់ការនាំចេញនៅថ្ងៃអនាគត។ តែយ៉ាងណា បញ្ហាខ្សែច្រវាក់ផលិតកម្មហាក់នៅមានទំហំតូច នៅតែជាកត្តាប្រឈមសម្រាប់កម្ពុជាក្នុងការប្រកួតប្រជែងជាមួយផលិតផលរបស់ប្រទេសដទៃ។ បើតាមការអះអាងរបស់ប្រធានសម្ព័ន្ធសមាគម SME រូបនេះ កន្លងមកអ្នកផលិតក្នុងស្រុកមួយចំនួនស្ទើរតែមិនហ៊ានដាក់ថា ផលិតផលរបស់ខ្លួនផលិតក្នុងស្រុកនោះទេ ដោយសារពលរដ្ឋខ្មែរមិនសូវចាប់អារម្មណ៍ជាមួយផលិតផលក្នុងស្រុក។ ប៉ុន្តែឥឡូវអ្នកផលិតក្នុងស្រុកមិនស្ទាក់ស្ទើរក្នុងការដាក់ថា ផលិតផលរបស់ខ្លួនផលិតនៅក្នុងស្រុកនោះទេ ក្រោយការគាំទ្រមានការកើនឡើងខ្លាំង។

អ្នកជំនាញរូបនេះរំពឹងថា ឆន្ទៈគាំទ្រផលិតផលក្នុងស្រុករបស់ពលរដ្ឋខ្មែរនឹងនៅតែបន្ត បើទោះបីច្រកទ្វារព្រំដែនរវាងប្រទេសទាំងពីរត្រូវបានសម្រួលឱ្យដំណើរការប្រក្រតីភាពឡើងវិញក៏ដោយ ព្រោះភាពឈឺចាប់របស់ពលរដ្ឋខ្មែរពីការរំលោភបំពានទាំងកម្រោលរបស់ថៃនឹងដិតដាមជាប់ក្នុងចិត្តរបស់ពលរដ្ឋខ្មែរ។

«សំឡេងឧកញ៉ា តែ តាំងប៉»

ជាមួយគ្នានេះ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជាបន្តអំពាវនាវដល់បណ្ដាក្រសួង និងស្ថាប័នទាំងអស់ជួយជំរុញដល់វិស័យ SME ដើម្បីឱ្យផលិតករអាចបោះជំហានទៅមុនបានដោយរលូន ហើយនៅពេលដែលផលិតករអាចរំកិលទៅមុខដោយរលូន នោះពួកគេនឹងមានចំណែកជួយជំរុញកំណើនសេដ្ឋកិច្ចតាមរយៈកាតព្វកិច្ចបង់ពន្ធ៕

អត្ថបទដោយ៖ ជា ម៉ារ៉ា