ស្ថាប័នក្រុមប្រឹក្សាមាសពិភពលោកព្យាករថា ប្រទេសសិង្ហបុរី នឹងក្លាយជាមជ្ឈមណ្ឌលជួញដូរមាសអន្តរជាតិឈានមុខគេ

លោក សៅខៃ ហ្វាន (Shaokai Fan) នាយកផ្នែកធនាគារកណ្តាល និងគោលនយោបាយសាធារណៈនៅស្ថាប័នក្រុមប្រឹក្សាមាសពិភពលោក ទទួលបន្ទុកផ្តល់ប្រឹក្សាយោបល់ដល់រដ្ឋាភិបាលនានាជុំវិញបញ្ហាមាសបានគូសបញ្ជាក់ថា ហេតុផលដ៏សំខាន់មួយដែលនឹងធ្វើឱ្យសិង្ហបុរី ក្លាយជាមជ្ឈមណ្ឌលជួញដូរមាសអន្តរជាតិឈានមុខគេ គឺដោយសារតម្រូវការមាសនៅក្នុងបណ្ដាប្រទេសកំពុងរីកចម្រើនឆាប់រហ័សធំៗកំពុងកើនឡើង ហើយភាគច្រើននៃទីផ្សារទាំងនេះប្រមូលផ្តុំនៅក្នុងតំបន់អាស៊ី។ នេះបើយោងតាមការចុះផ្សាយរបស់សារព័ត៌មាន CNBC។

អ្នកជំនាញរូបនេះបានលើកឡើងបន្ថែមទៀតថា កត្តាដ៏សំខាន់មួយទៀត គឺដោយសារប្រទេសសិង្ហបុរី មានភូមិសាស្ត្រស្ថិតនៅជិតបណ្ដាធនាគារកណ្តាលនៃប្រទេសកំពុងរីកចម្រើនឆាប់រហ័សធំៗទាំងនោះ ដែលកំពុងសម្រុកទិញមាសទុកយ៉ាងគំហុក ដោយក្នុងនោះរួមមានទាំងប្រទេសចិន ដែលមានសេដ្ឋកិច្ចធំបំផុតទី២ របស់ពិភពលោកផងដែរ។

ផ្អែកលើទិន្នន័យផ្លូវការបង្ហាញថា ប្រទេសចិន មានតម្រូវការទិញមាសច្រើនបំផុតរបស់ពិភពលោក ខណៈដែលធនាគារកណ្តាលនៃប្រទេសនេះក៏បានសម្រុកទិញមាសទុកច្រើនជាងគេបំផុតផងដែរក្នុងចំណោមធនាគារកណ្ដាលទូទាំងពិភពលោកក្នុងឆ្នាំ២០២៣។

នៅឯសន្និសីទស្ដីពីលោហៈមានតម្លៃនៅអាស៊ី-ប៉ាស៊ីហ្វិក (Asia Pacific Precious Metals Conference) រៀបចំឡើងនៅប្រទេសសិង្ហបុរី អ្នកជំនាញរូបនេះបានលើកឡើងថា ការជួញដូរមាសអន្តរជាតិ បានបង្វែរទិសដៅមកកាន់ភាគបូព៌ា ឬភាគខាងកើត ដែលកត្តានេះធ្វើឱ្យសិង្ហបុរី មានសក្ដានុពលក្លាយជាមជ្ឈមណ្ឌលជួញដូរមាសអន្តរជាតិ។

លើសពីនេះទៅទៀត សិង្ហបុរី ក៏មានភូមិសាស្ត្រស្ថិតនៅកៀកប្រមាណ២៥%នៃមជ្ឈមណ្ឌលផ្គត់ផ្គង់ការចម្រាញ់រ៉ែមាសរបស់ពិភពលោកដូចជាប្រទេសចិន អូស្ត្រាលី ឥណ្ឌូនេស៊ី ហ្វីលីពីន ប៉ាពួញូហ្គីណេ និងឡាវ ជាដើមផងដែរ៕

ដោយ: តែម សុខុម