អង្គការពាណិជ្ជកម្មពិភពលោកថា វៀតណាមក្លាយជាប្រទេសនាំចេញធំបំផុតទី២ នៅអាស៊ាន និងធំបំផុតទី១១ទូទាំងពិភពលោក

យោងតាមអង្គការពាណិជ្ជកម្មពិភពលោក (WTO) បានឱ្យដឹងថា ប្រទេសវៀតណាម បានឡើងចំណាត់ថ្នាក់យ៉ាងលឿនផ្នែកនាំចេញ និងនាំចូល ដែលពេលនេះឈរនៅលំដាប់លេខរៀងទី២ នៅក្នុងតំបន់អាស៊ាន បន្ទាប់ពីប្រទេសសិង្ហបុរី។

លោកស្រី ហ្វុង ធី ឡាន ហ្វួង (Phung Thi Lan Phuong) អ្នកជំនាញមកពីក្រុមហ៊ុនប្រឹក្សាយោបល់មួយរបស់វៀតណាម បានគូសបញ្ជាក់ថា វៀតណាមបានជាប់ឈ្មោះក្នុងចំណោមប្រទេសនាំចេញដែលមានកំណើនលឿនបំផុតទាំង៤ នៅទូទាំងពិភពលោកចន្លោះពីឆ្នាំ២០១៩ ដល់ឆ្នាំ២០២៣ រួមជាមួយប្រទេសឥណ្ឌា កាណាដា និងមហាយក្សចិន។

លោកស្រីបានសង្កត់ធ្ងន់ថា សមទ្ធិផលដ៏អស្ចារ្យនេះអាចសម្រេចបានក៏ដោយសារយុទ្ធសាស្ត្រសមាហរណកម្មសេដ្ឋកិច្ចដ៏រឹងមាំរបស់រដ្ឋាភិបាលវៀតណាម ដែលបានចុះកិច្ចព្រមព្រៀងពាណិជ្ជកម្មសេរី (FTA) រហូតដល់ទៅ១៦ និងបានបើកចំហទីផ្សារជាមួយប្រទេសជាដៃគូរហូតដល់ទៅជិត៦០ប្រទេស។ តាមរយៈកិច្ចព្រមព្រៀងពាណិជ្ជកម្មសេរីទាំងនេះបានជួយទាក់ទាញការវិនិយោគផ្ទាល់ពីបរទេស (FDI) បានកាន់តែច្រើន ដោយបានជួយបង្កើតការងារ និងបានជួយជំរុញកំណែទម្រង់ផ្ទៃក្នុង។ ទោះជាយ៉ាងណា បណ្ដាក្រុមហ៊ុនបរទេសបានគ្របដណ្ដប់រហូតដល់ទៅ៦០%នៃការនាំចេញ ខណៈដែលអត្រាតម្លៃបន្ថែមក្នុងស្រុក មានត្រឹមតែ៥២%ប៉ុណ្ណោះ ដែលទាបជាងមធ្យមភាគនៅក្នុងពិភពលោក។

ជាការកត់សម្គាល់ ក្នុងរយៈពេល១០ខែឆ្នាំ២០២៤ វិស័យសេដ្ឋកិច្ចក្នុងស្រុកបានកើនឡើងលឿនជាង៤ដង បើធៀបនឹងវិស័យវិនិយោគផ្ទាល់ពីបរទេស (FDI) ដែលធ្វើឱ្យចំណែកនៃការនាំចេញ-នាំចូលរបស់ខ្លួនកើនឡើងដល់៣២% នៃការនាំចេញ-នាំចូលសរុប។ ដើម្បីបង្កើនតម្លៃពាណិជ្ជកម្ម បណ្ដាក្រុមហ៊ុនសហគ្រាសវៀតណាម ចាំបាច់ត្រូវបង្កើនសមត្ថភាពរបស់ខ្លួន កាត់បន្ថយការនាំចូលវត្ថុធាតុដើម និងបង្កើនការចូលរួមរបស់ខ្លួននៅក្នុងខ្សែខ្សែច្រវាក់តម្លៃទូទាំងពិភពលោក៕

ដោយ:  តែម សុខុម