ចាប់តាំងពីលោក ដូណាល់ ត្រាំ ឈ្នះការបោះឆ្នោតប្រធានាធិបតី កាលពីខែវិច្ឆិកា ឆ្នាំ២០២៤ មក ហាងឆេងប្រាក់យន់នៅបរទេសបានធ្លាក់ថ្លៃជាង៣% ខណៈដែលហាងឆេងប្រាក់យន់នៅក្នុងប្រទេសចិន បានធ្លាក់ថ្លៃខ្លាំងជិតឈានដល់កម្រិតទាបបំផុតមិនធ្លាប់មានក្នុងរយៈពេល១៦ខែមកនេះ។
បណ្ដាវិនិយោគិនមានការព្រួយបារម្ភអំពីស្ថានភាពសេដ្ឋកិច្ចចិន នាពេលអនាគត ដោយសារប្រទេសនេះកំពុងប្រឈមមុខនឹងបញ្ហាធំៗរួមមានដូចជា វិបត្តិអចលនទ្រព្យ និងការចំណាយរបស់អ្នកប្រើប្រាស់ធ្លាក់ចុះជាដើម។ ហើយការព្រួយបារម្ភអំពីការកើនឡើងអប្បផរណា ឬការធ្លាក់ចុះថ្លៃទំនិញ និងសេវាកម្មក្នុងប្រទេសចិន គួបផ្សំជាមួយនឹងធនាគារនានា ក៏កំពុងជួបការលំបាកក្នុងការជំរុញកំណើនឥណទាន បានបណ្ដាលឱ្យមូលនិធិយ៉ាងច្រើនសន្ធឹកសន្ធាប់ចាក់ចូលទៅក្នុងសញ្ញាបណ្ណ ឬមូលបត្របំណុលរបស់រដ្ឋាភិបាល ជាហេតុធ្វើឱ្យផលបត្រសញ្ញាបណ្ណធ្លាក់ចុះទាបបំផុតមិនធ្លាប់មាន។
ទន្ទឹមនឹងនេះ ធនាគារកណ្តាលអាម៉េរិក នៅពេលនេះរំពឹងថា នឹងបញ្ចុះអត្រាការប្រាក់យឺត ឬតិចជាងអ្វីដែលខ្លួនបានរំពឹងទុកមុននេះ ហើយការដំឡើងពន្ធគយ ដែលបានស្នើឡើងរបស់លោក ដូណាល់ ត្រាំ អាចនឹងធ្វើឱ្យអតិផរណាកើនឡើង ដែលអនុញ្ញាតឱ្យធនាគារកណ្ដាលអាម៉េរិកពន្យារពេលបញ្ចុះអត្រាការប្រាក់។
ងាកទៅក្រុងប៉េកាំងឯណោះវិញ នៅពេលនេះកំពុងប្រឹងប្រែងយ៉ាងខ្លាំង ដើម្បីគ្រប់គ្រងការធ្លាក់ថ្លៃនៃប្រាក់យន់ ខណៈកំពុងព្យាយាមធ្វើយ៉ាងណាកុំឱ្យតម្លៃប្រាក់យន់ ប្រែប្រួលខ្លាំងពេក ដោយធនាគារកណ្ដាលចិន ផ្តោតជាសំខាន់លើការក្សាស្ថិរភាពរូបិយប័ណ្ណ ទោះបីជាខ្លួនប្រឈមនឹងសម្ពាធឱ្យបញ្ចុះអត្រាការប្រាក់យ៉ាងណាក្ដី។
ក្រុមអ្នកជំនាញព្យាករថា ប្រាក់យន់នឹងធ្លាក់ថ្លៃបន្ថែមទៀត ប៉ុន្តែធនាគារកណ្ដាលចិន ទំនងជាអន្តរាគមន៍ធ្វើយ៉ាងណាកុំឱ្យប្រាក់យន់ធ្លាក់ថ្លៃខ្លាំងពេក ជាពិសេសស្របពេលដែលការគំរាមដំឡើងពន្ធគយរបស់សហរដ្ឋអាម៉េរិក កាន់តែជិតលេចចេញជារូបរាង ខណៈដែលលោក ដូណាល់ ត្រាំ បានចូលកាន់អំណាចឡើងវិញជាផ្លូវការនៅថ្ងៃទី២០ ខែមករា នេះ៕
ដោយ: តែម សុខុម
