របាយការណ៍ពីការិយាល័យស្ថិតិជាតិចិន បានបង្ហាញថា នៅក្នុងរយៈពេល ៨ខែ ដើមឆ្នាំ ២០២១នេះ ប្រទេសចិនសម្រេចបាននូវទំហំពាណិជ្ជកម្មជាមួយប្រទេសជាដៃគូ សរុប ៣,៨ទ្រីលានដុល្លារអាមេរិក ដោយការនាំចេញទំនិញរបស់ចិន សម្រេចបាន ២,១ទ្រីលានដុល្លារអាមេរិក មានកំណើន ៣៤% ហើយការនាំចូលមកវិញ សម្រេចបាន ១,៧ទ្រីលានដុល្លារអាមេរិក មានកំណើន ៣៥%។
ប្រធានការិយាល័យស្ថិតិជាតិចិន បានលើកឡើងថា ដោយសារតែវិធានការគ្រប់គ្រងបញ្ហាមេរោគកូវីដ១៩ បានយ៉ាងល្អប្រសើរ សេដ្ឋកិច្ចប្រទេសចិន អាចងើបឡើងវិញជាលំដាប់ និងដំណើរការប្រកបដោយស្ថិរភាព ជាមួយនឹងកំណើនល្អ ក្នុងនោះ ការនាំចេញ-នាំចូល មានកំណើន ២ខ្ទង់យ៉ាងល្អប្រសើរ ហើយប្រទេសចិន ក៏សម្រេចបាននូវអតិរេកពាណិជ្ជកម្មប្រមាណ ៣៦២ពាន់លានដុល្លារអាមេរិក ដែលមានកំណើនដល់ទៅ ១៧% ធៀបនឹងពេលដូចគ្នាកាលពីឆ្នាំមុន។
នៅក្នុងអំឡុងពេល ៨ខែឆ្នាំ២០២១នេះ បណ្តាប្រទេសនៅក្នុងតំបន់អាស៊ាន បានក្លាយជាដៃគូពាណិជ្ជកម្មធំជាងគេបំផុតមួយរបស់ ប្រទេសចិន ដោយទំហំពាណិជ្ជកម្មទ្វេភាគីរវាង ចិន និងអាស៊ាន សម្រេចបានជាង ៥៦០ពាន់លានដុល្លារអាមេរិក ហើយសហភាពអឺរ៉ុប ក្លាយជា ដៃគូពាណិជ្ជកម្មធំបន្ទាប់ មានទំហំពាណិជ្ជកម្មជាង ៥៣០ពាន់លានដុល្លារអាមេរិក ហើយបន្ទាប់ពីនោះគឺមាន អាមេរិក ដែលមានទំហំពាណិជ្ជកម្មទ្វេភាគី ៤៧០ពាន់លានដុល្លារអាមេរិក ជាមួយនឹងចិន។
ចំណែកឯ ទំហំពាណិជ្ជកម្មរវាងចិន ជាមួយនឹង បណ្តាប្រទេសក្នុងគំនិតផ្តួចផ្តើមខ្សែក្រវ៉ាត់ និងផ្លូវសម្រេចបានជាង ១ទ្រីលានដុល្លារអាមេរិក ដែលមានកំណើន ២៤%។
អត្ថបទគួរអាន
ដោយឡែក ក្នុងខែសីហាកន្លងទៅ ទំហំពាណិជ្ជកម្មរបស់ចិន មានជាង ៥៣១ពាន់លានដុល្លារអាមេរិក មានកំណើន ១៨% ក្នុងនោះ ការនាំចេញមានទំហំ ២៩៤ពាន់លានដុល្លារអាមេរិក ខណៈការនាំចូលទំនិញរបស់ចិន មានទំហំ ២៣៥ពាន់លានដុល្លារអាមេរិក។
នៅក្នុងខែសីហាកន្លងទៅថ្មីៗនេះ ការនាំចេញរបស់ប្រទេសចិន ទៅកាន់បណ្តាប្រទេសអាស៊ានទាំង ១០ សម្រេចបាន ៣៩ពាន់លានដុល្លារអាមេរិក កើនឡើង ១៦% ធៀបនឹងខែសីហា កាលពីឆ្នាំមុន ហើយការនាំចូលមកប្រទេសចិនវិញ មានទំហំ ៣២ពាន់លានដុល្លារអាមេរិក ដែលធ្វើឲ្យ ចិន មានអតិរេកពាណិជ្ជកម្ម ជាង ៦ពាន់លានដុល្លារអាមេរិក ធ្លាក់ចុះ ១៦%។
ប្រធានការិយាល័យស្ថិតិជាតិចិន ក៏បានព្រមានដែរថា ដោយសារតែ បញ្ហាមេរោគឆ្លងកូវីដ១៩ នៅតែបន្តរីករាលដាលទូទាំងសកលលោក បរិយាកាសសេដ្ឋកិច្ចខាងក្រៅ នឹងកាន់តែស្មុគស្មាញ ដូច្នេះទំហំពាណិជ្ជកម្មរបស់ចិន នៅត្រីមាសទី ៤ឆ្នាំនេះ អាចនឹងមានការថមថយចុះបន្តិច៕
អត្ថបទ៖ វណ្ណ វុឌ្ឍវិវឌ្ឍន៍
None
