អ្នកជំនាញយល់ឃើញថា នេះជាចំណុចល្អមួយសម្រាប់កម្ពុជាក្នុងការឈានទៅសម្រេចគោលដៅទំហំពាណិជ្ជកម្មទ្វេភាគីឲ្យដល់១៥ពាន់លានដុល្លារអាមេរិកនៅថ្ងៃអនាគតឆាប់ៗនេះ។
បើតាមតួលេខរពីអគ្គនាយកដ្ឋានគយវៀតណាម ដែលត្រូវបានចុះផ្សាយដោយសារព័ត៌មាន VN Express ការនាំចញទំនិញកម្ពុជាទៅវៀតណាមសម្រេចបានជាង៣ពាន់៧រយលានដុល្លារអាមេរិកកើនឡើងជិត៤ដង បើធៀបនឹងរយៈពេលដូចគ្នាកាលពីឆ្នាំមុន។ គិតត្រឹមត្រីមាសទី៣ក្នុងឆ្នាំ២០២១ ការធ្វើពាណិជ្ជកម្មរវាងប្រទេសទាំងពីរមានទំហំជាង៧ពាន់២លានដុល្លារអាមេរិក កើនឡើងជាង៩០%បើនឹងរយៈពេលដូចគ្នាកាលពីឆ្នាំមុន។
ផលិតផលដែលជួយជំរុញកំណើននាំចេញរបស់កម្ពុជាទៅកាន់ទីផ្សារវៀតណាមភាគច្រើនជាផលិតផលកសិកម្មមិនទាន់កែច្នៃ។ បើតាមតួលេខរបស់អគ្គនាយកគយវៀតណាម ការនាំចេញបន្លែផ្លែឈើទៅវៀតណាមមានការកើនឡើង៦១%, គ្រាប់ស្វាយចន្ទីកើនជិត៦០០%, សណ្ដែកសៀងកើនជិត៥៥០% និងកៅស៊ូកើនជាង៣៩០% និងមុខទំនិញផ្សេងៗទៀតក៏មានកើនឡើងដូចគ្នាដែរ។
ប៉ុន្តែបើតាមតួលេខកត់ត្រាដោយអគ្គនាយកដ្ឋានគយ និងរដ្ឋាករ ដែលផ្តល់ដោយក្រសួងពាណិជ្ជកម្មកម្ពុជាមានការខុសគ្នាឆ្ងាយមែនទែន ពោលគឺការនាំចេញទំនិញកម្ពុជាទៅកាន់ទីផ្សារវៀតណាមមានទំហំតែជាង៣៦៤លានដុល្លារអាមេរិកតែប៉ុណ្ណោះ ខណៈការនាំចូលពីវៀតណាមមានទំហំជាង២ពាន់៣រយលានដុល្លារអាមេរិក។ ទំហំពាណិជ្ជកម្មទ្វេភាគីរវាងកម្ពុជា-វៀតណាមនៅ៩ខែក្នុងឆ្នាំ២០២១ សម្រេចបានជាង២ពាន់៦រយលានដុល្លារតែប៉ុណ្ណោះ។
ពាក់ព័ន្ធបញ្ហានេះដែរ ឯកឧត្តម ប៉ែន សុវិជាតិ អនុរដ្ឋលេខាធិការនៃក្រសួងពាណិជ្ជកម្មបានបញ្ជាក់ប្រាប់ខេមបូណូមីសថា ឯកឧត្តមក៏មិនបានដឹងមូលហេតុជាក់លាក់ពីភាពខុសគ្នារវាងតួលេខដែលកត់ត្រាដោយអគ្គនាយកដ្ឋានគយវៀតណាម ជាមួយអគ្គនាយកដ្ឋានគយកម្ពុជានោះទេ។ អ្នកនាំពាក្យក្រសួងពាណិជ្ជកម្មរូបនេះគ្រាន់តែគូសបញ្ជាក់ថា ខុសតួលេខគ្នានេះ ទំនងមកពីភាគីទាំងពីរមានរបៀបនៃការកត់ត្រាការដឹកទំនិញចេញចូលរវាងប្រទេសទាំងពីរខុសគ្នា។
អត្ថបទទាក់ទង
ជុំវិញបញ្ហានេះដែរ សារព័ត៌មានខេមបូណូមីស មិនអាចទាក់ទងសុំការបកស្រាយពីឯកឧត្តម គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករបាននោះទេ នៅថ្ងៃទី ២១ ខែតុលានេះ។
យ៉ាងណាក៏ដោយចុះ ពាក់ព័ន្ធការនាំចេញរបស់កម្ពុជាទៅវៀតណាមមានការកើនឡើងនេះដែរ ឧកញ៉ា លឹម ហេង អនុប្រធានសភាពាណិជ្ជកម្មកម្ពុជាចាត់ទុកកំណើនតួលេខនាំចេញនេះថា ជាចំណុចល្អសម្រាប់កម្ពុជាក្នុងការធ្វើឲ្យមានតុល្យភាពជញ្ជីងពាណិជ្ជកម្មរវាងប្រទេសទាំងពីរ ដែលកំពុងផ្អៀងខ្លាំងទៅខាងប្រទេសវៀតណាម។ ហើយការកើនឡើងនេះ គឺវាស្របតាមទិសដៅសហគមន៍សេដ្ឋកិច្ចអាស៊ាន ក៏ដូចជាកិច្ចព្រមព្រៀងពាណិជ្ជកម្មទ្វេភាគីរវាងកម្ពុជា-វៀតណាម ដែលបានដាក់គោលដៅជំរុញទំហំពាណិជ្ជកម្មឲ្យឈានដល់១៥ពាន់លានដុល្លារអាមេរិកនាពេលខាងមុខ។
ជាមួយគ្នានេះ លោកបណ្ឌិត ហុង វណ្ណៈ អ្នកជំនាញសេដ្ឋកិច្ច នៃវិទ្យាស្ថានទំនាក់ទំនងអន្តរជាតិ នៃរាជបណ្ឌិតសភាកម្ពុជាយល់ឃើញថា ទោះបីការនាំចេញទំនិញកម្ពុជាទៅវៀតណាមមានការកើនឡើងក៏ពិតមែន តែវានៅមានទំហំតិចតួចណាស់ បើធៀបនឹងការនាំចូលពីវៀតណាមមកកម្ពុជា។ លោកសន្និដ្ឋានថា ការកើនឡើងតួលេខនាំចេញទៅវៀតណាមនេះ វាអាចជាការខិតខំប្រឹងប្រែងរបស់រាជរដ្ឋាភិបាលក្នុងការធ្វើឲ្យមានតុល្យភាពទំហំពាណិជ្ជកម្មរវាងប្រទេសទាំងពីរ ដែលកំពុងខុសគ្នាដាច់ឆ្ងាយហៅមិនលឺ។
របាយការណ៍ពីក្រសួងកសិកម្មកម្ពុជា បានឲ្យដឹងដែរថា ការនាំចេញផលិតផលកសិកម្មរបស់កម្ពុជានៅ៩ខែមកនេះ រកបានប្រាក់ចំណូលជាង ៣ពាន់លានដុល្លារ ជាមួយនឹងបរិមាណនាំចេញសរុបនជិត៦លានតោន មានការកើនឡើងជាង៨៨% ធៀបនឹងរយៈពេលដូចគ្នាកាលពីឆ្នាំ២០២០។ ក្នុងនោះ ការនាំចេញផលិតផលកសិកម្មទៅកាន់ប្រទេសវៀតណាមមានប្រមាណ ជាង៦៤% នៃការនាំចេញសរុប នាំចេញទៅថៃមានជាង ២១% និងនាំចេញទៅចិនមានជិត៧% និងគោលដៅប្រទេសដទៃទៀតជិត៥%៕
None
