នៅក្នុងលិខិតនោះដែរ បានបញ្ជាក់ថា ក្រុមហ៊ុន OCIC បានស្នើសុំគោលការណ៍នាំចូលសម្ភារ និងគ្រឿងចក្រនេះ ដោយមានតម្លៃ ទឹកប្រាក់សរុប ជិត ៤១លានដុល្លារអាមេរិក ក្នុងនោះពន្ធ និងអាករផ្សេងៗ ជាបន្ទុករបស់រដ្ឋ ដែលសាលារាជធានីភ្នំពេញ បានផ្ញើជូនរដ្ឋមន្ត្រីក្រសួងសេដ្ឋកិច្ច ដើម្បីពិនិត្យនិងសម្រេច។
ក្រុមហ៊ុនវិនិយោគទុនក្រៅប្រទេស (OCIC) នឹងធ្វើការអភិវឌ្ឍកោះនរា ឲ្យក្លាយជាទីក្រុងពាណិជ្ជកម្មដ៏សម្បូរបែប ស្ថិតនៅតាមបណ្តោយទន្លេមេគង្គ ពោលគឺស្ថិតនៅប្របមាត់ច្រាំងទន្លេមេគង្គ ដែលបានបាក់បាត់បង់អស់ជាច្រើនឆ្នាំកន្លងមកនេះ។
ខេមបូណូមីស ក៏បានទាក់ទងទៅកាន់ អគ្គនាយករងក្រុមហ៊ុន OCIC លោក ទូច សំណាង បានបញ្ជាក់ថា គម្រោងសាងសង់ស្ពាននេះស្ថិតនៅក្នុងដំណាក់កាលសិក្សានៅឡើយទេ ដោយក្រោយសិក្សារួច អាចនឹងធ្វើការសាងសង់នៅចុងឆ្នាំនេះតែម្តង។ លោកបានបន្ថែមថា ស្ពានបេតុងខ្សែកាបថ្មីនេះ នឹងត្រូវចំណាយទឹកប្រាក់សាងសង់ក្រោម៥០លានដុល្លារ ដើម្បីសម្រួលដល់ការចេញពីកោះពេជ្រ ទៅកាន់គម្រោងអភិវឌ្ឍកោះនរា។យ៉ាងណាមិញ លោកបានបញ្ជាក់ថា លោកមិនអាចឆ្លើយអ្វីលម្អិតជុំវិញការសាងសង់ស្ពាន និងការអភិវឌ្ឍកោះនរានេះ លើសពីនេះនោះទេ ។
អត្ថបទទាក់ទង!
ជាមួយគ្នានេះ អ្នកនាំពាក្យសាលារាជធានីភ្នំពេញ បានប្រាប់អ្នកសារព័ត៌មានខេមូណូមីសថា លោកក៏មិនទាន់អាចប្រាប់លម្អិតពីព័ត៌មាននៃការសាងសង់ស្ពាននេះនៅឡើយដែរ តែលោកទទួលស្គាល់ថា លិខិតស្នើមួយច្បាប់លេខ ៥៥០ ចុះថ្ងៃទី១៣ ខែឧសភា ស្តីពីការសុំគោលការណ៍នាំសម្ភារ និងគ្រឿងចក្រសម្រាប់ស្ថាបនាស្ពានបេតុងខ្សែកាបមួយខ្សែនោះ ជារឿងពិតមែន តែលិខិតនេះគួរតែជាចរាចរណ៍ផ្ទៃក្នុងប៉ុណ្ណោះ។
គួរជម្រាបថា ស្ពានបេតុងខ្សែកាបថ្មី ដែលនឹងសាងសង់ដោយក្រុមហ៊ុនវិនិយោគទុនអាណិកជនកម្ពុជា(OCIC)នេះ ទំនងជាដើម្បីបង្កលក្ខណៈកាន់តែងាយស្រួល ដល់ការចេញចូលទីក្រុងរណបពាណិជ្ជកម្មដ៏ធំទំនើបថ្មីមួយទៀតរបស់ក្រុមហ៊ុននេះ ដែលនឹងផុសចេញរូបរាងឡើង ពីដែនទឹកកោះនរា ទៅខាងកើតទីក្រុងកោះពេជ្រ លាតសន្ធឹងរហូតជិតកៀនស្វាយ ស្ថិតនៅក្នុងខណ្ឌច្បារអំពៅ រាជធានីភ្នំពេញ។
គម្រោងអភិវឌ្ឍន៍ដ៏ធំទីក្រុងរណបកោះនរានេះ ត្រូវបានគេដឹងថា គឺស្ថិតក្រោមការអភិវឌ្ឍរបស់ក្រុមហ៊ុន OCIC របស់អ្នកឧកញ៉ា ពុង ឃាវសែ ដែលវាលាតសន្ធឹងចាប់ពីចំណុចក្បាលទឹកត្រង់ទន្លេបាសាក់ (ខាងកើតទីក្រុងរណបកោះពេជ្រ) ប្របមាត់ច្រាំងទន្លេមេគង្គរហូតដល់កោះប្រាក់ ជិតកៀនស្វាយ ឯណោះ ដែលសរុបផ្ទៃទឹកគ្រោងនឹងចាក់ខ្សាច់ចាក់ដី ចាក់ថ្ម បំពេញដើម្បីអភិវឌ្ឍវិនិយោគសរុបប្រមាណ ១០០ហិកតា។
មន្ត្រីជាន់ខ្ពស់នៅក្រសួងធនធានទឹក និង អ្នកជំនាញជលវិទ្យា ធ្លាប់បានប្រាប់ខេមបូណូមីស ដែរថា កោះនរា ក៏ដូចជាកោះប្រាក់ពីមុនជាដែនកោះគោកដែលមានមនុស្សរស់នៅរាប់រយគ្រួសារ ប៉ុន្តែដោយសារតែ ការបម្រែបម្រួលធម្មជាតិ សណ្ឋានដី និង សណ្ឋានទឹកទន្លេបានធ្វើឲ្យដីកោះអស់នេះបាក់ស្រុតបន្តិចម្តងៗ រហូតដល់បាត់បង់ដីកោះអស់តែម្តង។
ប្រភពខាងលើដដែលបញ្ជាក់ទៀតថា ដោយសារតែកោះនរាកោះប្រាក់នេះ ស្ថិតនៅចំពីមុខទឹកហូរ បុកយ៉ាងខ្លាំង ដូច្នេះមិនអាចទ្រាំទ្រទៅនឹងកម្លាំងទឹកហូរ ក៏បង្កឲ្យមានការបាក់ស្រុតអស់តែម្តងទៅ។ ហើយការចាក់បំពេញដីខ្សាច់ដើម្បីអភិវឌ្ឍន៍នេះគឺជារឿងល្អ ដែលវានឹងអាចការពារមិនឲ្យមានការបាក់ស្រុតច្រាំងតទៅទៀត ប៉ុន្តែត្រូវធ្វើទៅតាមស្តងដារបច្ចេកទេសច្បាស់លាស់។
ប្រភពពីអ្នកជំនាញ និង អ្នកជំនួញដីធ្លីដ៏ល្បីល្បាញខាងលើនេះ បានឲ្យដឹងទៀតថា គម្រោងអភិវឌ្ឍន៍នេះ ទទួលបាន ស. ជ. ណ ពីរាជរដ្ឋាភិបាលកម្ពុជាហើយ ក្រុមហ៊ុនគ្រោងនឹងធ្វើការចាក់ខ្សាច់ ចាក់ដី និង ថ្ម បំពេញទៅលើកោះក្នុងទន្លេមេគង្គដែលបានបាក់ដី បាក់ច្រាំងបាត់កោះអស់រយៈពេលជាយូរឆ្នាំមកហើយ។
រូបភាពជ្រុងម្ខាងនៃទីក្រុងកោះពេជ្រ
រូបភាពពីជ្រុងម្ខាងនៃគម្រោងអភិវឌ្ឍន៍កោះនរា
សូមបញ្ជាក់ផងដែរថាអ្នកឧកញ៉ា ពុង ឃាវសែ បានបោះទុនវិនិយោគរាប់ពាន់លានដុល្លារអាមេរិកទៅលើគម្រោងអភិវឌ្ឍន៍ទីក្រុងរណបចំនួនពីរនៅក្នុងទីក្រុងភ្នំពេញ ទី១ ទីក្រុងរណបកោះពេជ្រ ដែលបច្ចុប្បន្នកំពុងក្លាយជាមជ្ឈមណ្ឌលពាណិជ្ជកម្ម ទេសចរណ៍ ដ៏ទាក់ទាញបំផុតសម្រាប់រាជធានីភ្នំពេញ ជាទីកន្លែងបណ្តុំទៅដោយអគារពាណិជ្ជកម្មធំៗ ខ្ពស់ៗ ដូចជា អគារស្នាក់នៅរួម ខុនដូ ផ្សារទំនើប សណ្ឋាគារ ដែលភាគច្រើនវិនិយោគដោយចិន ដែលមានតម្លៃរាប់ពាន់លានដុល្លារអាមេរិក។ ទី២ គឺទីក្រុងរណបជ្រោយចង្វារ ទីក្រុងនៃអនាគត ដែលវិនិយោគដោយក្រុមហ៊ុនវិនិយោគទុនអាណិកជនកម្ពុជា OCIC ក្រោមទុនវិនិយោគចំនួន ១៦០០លានដុល្លារអាមេរិកនោះ កំពុងដំណើរការទៅមុខយ៉ាងរលូន ក្នុងគម្រោងប្លង់មេ និងមានការសាងសង់អគារពាណិជ្ជកម្មធំៗ ផ្សារទំនើប លំនៅដ្ឋានប្រណីតៗ អគារស្នាក់នៅរួម និងកន្លែងកម្សាន្តផ្សេងៗទៀត៕
None
