ស្ថាប័នវាយតម្លៃហិរញ្ញវត្ថុដ៏ល្បីល្បាញមួយបានបន្ទាបការព្យាករកំណើនសេដ្ឋកិច្ចថៃ និងព្រមានពីហានិភ័យសេដ្ឋកិច្ចមួយចំនួន

ក្រុមហ៊ុនវាយតម្លៃហិរញ្ញវត្ថុដ៏ល្បីល្បាញមួយនៅលើពិភពលោក Moody's Ratings បានវាយតម្លៃថា ស្ថានភាពស្ថិរភាពរូបិយប័ណ្ណរបស់ថៃមិនមានសុវត្ថិភាពនោះទេ នៅពេលនេះ ខណៈកម្លាំងជំរុញសេដ្ឋកិច្ច និងទំហំសារពើពន្ធរបស់ប្រទេសនេះ ក៏បានបង្ហាញសញ្ញាអវិជ្ជមានគួរបារម្ភផងដែរ។ ក្រុមហ៊ុននេះ បានអះអាងថា សន្ទុះជំរុញកំណើនសេដ្ឋកិច្ចរបស់ថៃមានស្ថានភាពយឺតខ្លាំង ដោយសារសម្ពាធសារពើពន្ធកើនឡើង និងភាពងាយរងគ្រោះដោយសារវិបត្តិខាងក្រៅ ជាពិសេសការផ្លាស់ប្តូរប្រពន្ធពាណិជ្ជកម្មសកល។

ការដាក់ពន្ធបដិការដោយរដ្ឋាភិបាលសហរដ្ឋអាម៉េរិក និងភាពមិនច្បាស់លាស់ជុំវិញការរឹតបន្តឹងពាណិជ្ជកម្មសកល កំពុងបន្ថែមផលប៉ះទង្គិចដល់សេដ្ឋកិច្ចរបស់ថៃ កាន់តែខ្លាំង ជាពិសេសការធ្វើសមាហរណកម្មយ៉ាងស៊ីជម្រៅរបស់ប្រទេសនេះក្នុងខ្សែច្រវាក់តម្លៃសកល និងតំបន់។

ការនាំចេញ ផលិតផល ដែលជំរុញសេដ្ឋកិច្ចរបស់ថៃ ត្រូវបានគេរំពឹងថា នឹងទទួលរងការកើនឡើងសម្ពាធពីលទ្ធិគាំពារនិយម បន្ថែមលើផលប៉ះពាល់ពាណិជ្ជកម្មដោយផ្ទាល់។ ស្ថិតក្នុងស្ថានភាពបែបនេះប្រទេសថៃ ក៏ប្រឈមមុខនឹងការប៉ះពាល់ដោយប្រយោលផងដែរ ជាពិសេសភាពតានតឹងរវាងអាម៉េរិក និងចិន។

ដោយឈរលើទឡ្ហីករណ៍ខាងលើនេះ ក្រុមហ៊ុន Moody's Ratings បានបន្ទាបការព្យាករកំណើនសេដ្ឋកិច្ចរបស់ថៃ ពី២,៩% មកនៅត្រឹមប្រមាណ២% ប៉ុណ្ណោះ នៅឆ្នាំ២០២៥។ ក្រុមហ៊ុននេះជឿជាក់ថា ភាពទន់ខ្សោយនៃរចនាសម្ព័ន្ធសេដ្ឋកិច្ច រួមទាំងការថយចុះកម្លាំងពលកម្ម និងគម្លាតនៃជំនាញអាចនឹងធ្វើឱ្យសេដ្ឋកិច្ចកាន់តែលំបាក៕

ដោយៈ សរ សុជាតិ