ទំហំ GDP របស់វៀតណាម ធ្លាក់ចុះនៅត្រីមាសដំបូងឆ្នាំនេះ នៅមុនពេលពន្ធគយរបស់លោក ត្រាំ ចូលជាធរមាន
ទិន្នន័យផ្លូវការបានបង្ហាញថា កំណើនសេដ្ឋកិច្ចរបស់វៀតណាម បានធ្លាក់ចុះបន្តិចនៅត្រីមាសទី១ឆ្នាំនេះ បើធៀបនឹងត្រីមាសចុងក្រោយកាលពីឆ្នាំមុន ខណៈប្រទ…
គោលការណ៍ច្បាប់របស់ឥស្លាម RIBA គឺមានការហាមប្រាមចំពោះ ទាក់ទងនឹងផលរបរ ដែលបានមកពីអត្រាការប្រាក់ ដូច្នេះហើយ ទើបពលរដ្ឋខ្មែរ-ឥស្លាម មានការលំបាកក្នុងការបង្កើតគណនីដាក់ប្រាក់សន្សំនៅធនាគារ ដោយសារតែបារម្ភថា ប្រាសចាកពីគោលការណ៍ច្បាប់របស់ឥស្លាម RIBA។
ឯកឧត្តម អ្នកឧកញ៉ាបណ្ឌិត អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានក្រុមប្រឹក្សាភិបាលសមាគមអាម៉ាណះតាកាហ្វុលកម្ពុជា បានគូសបញ្ជាក់ថា បច្ចុប្បន្ន នៅកម្ពុជា មានពលរដ្ឋខ្មែរ-ឥស្លាមសរុបជាង ៨០ម៉ឺននាក់ ប៉ុន្ដែ ការប្រើប្រាស់សេវាធនាគារសម្រាប់ពួកគាត់ គឺមិនសូវមានភាពទូលំទូលាយនោះឡើយ ដោយសារតែមានការហាមប្រាមមួយចំនួននៅក្រោមគោលការណ៍ច្បាប់ឥស្លាម។ ប៉ុន្ដែ តាមរយៈកម្មវិធីគម្រោង «លុយខ្ញុំស្អាត» ដែលទើបតែបានដាក់ឱ្យប្រើប្រាស់ ដោយធនាគារ អេស៊ីលីដា ក្រោមការសហការជាមួយនឹងសមាគម អាម៉ាណះតាកាហ្វុលកម្ពុជា នឹងជួយឱ្យពលរដ្ឋខ្មែរ-ឥស្លាមទាំងអស់ អាចមានលទ្ធភាពប្រើប្រាស់សេវាធនាគារបានយ៉ាងងាយស្រួល សម្រាប់ជីវភាពរស់នៅចាំថ្ងៃ ពិសេស អាចទុកដាក់ប្រាក់កាសរបស់ពួកគាត់បានយ៉ាងងាយស្រួល មានសុវត្ថិភាពបំផុត និងជៀសផុតពីការបាត់បង់ដោយយថាហេតុ។
ជាមួយគ្នានេះ បណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា បានគូសបញ្ជាក់ដែរថា កម្មវិធីគម្រោង «លុយខ្ញុំស្អាត» នឹងអនុញ្ញាតឱ្យពលរដ្ឋខ្មែរ-ឥស្លាមទាំងអស់ អាចបើកគណនីសន្សំដោយមិនទទួលការប្រាក់ ឬការប្រាក់នោះ ត្រូវបានកាត់ចេញដោយស្វ័យប្រវត្តិពីគណនីរបស់ពួកគាត់ ចូលទៅគណនីរបស់សមាគម អាម៉ាណះតាកាហ្វុលកម្ពុជា ហើយសមាគមនឹងប្រើប្រាស់មូលនិធិទាំងនោះ សម្រាប់គម្រោងសហគមន៍ និងសកម្មភាពសប្បុរសធម៌នានា ដែលអនុលោមតាមច្បាប់របស់ឥស្លាម។
បណ្ឌិត អ៊ិន ចាន់នី បានគូសបញ្ជាក់ទៀតថា ភាពជាដៃគូរវាងធនាគារ អេស៊ីលីដា និង សមាគមអាម៉ាណះតាកាហ្វុលកម្ពុជា ក៏ជាការឆ្លុះបញ្ចាំងនៃការប្តេជ្ញាចិត្តនៃភាគីទាំងពីរ ដើម្បីផ្ដល់នូវសេវាហិរញ្ញវត្ថុ ស្របតាមគោលការណ៍ច្បាប់ឥស្លាម និងជាដំណោះស្រាយហិរញ្ញវត្ថុប្រកបដោយតម្លាភាព និងសុវត្ថិភាព សម្រាប់ប្រជាពលរដ្ឋខ្មែរ-ឥស្លាមទាំងអស់។
គិតត្រឹមចុងឆ្នាំ២០២៤ ធនាគារអេស៊ីលីដា មានទ្រព្យសកម្មសរុបជាង ១០ពាន់លានដុល្លារ ប្រាក់បញ្ញើសរុបប្រមាណជាង ៨ពាន់លានដុល្លារ និងអតិថិជនសរុបប្រមាណជាង ៥លាន៥សែននាក់។ ដោយឡែក ដៃគូអាជីវកម្មរបស់ធនាគារអេស៊ីលីដាវិញ មានដល់ទៅជាង ៥៥ម៉ឺនដៃគូ និងអ្នកប្រើប្រាស់អេស៊ី ស៊ូភើអេប សរុបជាង ៤លាន៥សែននាក់៕
