ការដាំបន្លែក្នុងផ្ទះសំណាញ់ទទួលបានទិន្នផលខ្ពស់ តែបញ្ហាទីផ្សារនៅតែជាក្តីបារម្ភ
ការដាំបន្លែក្នុងផ្ទះសំណាញ់អាចអនុញ្ញាតឱ្យកសិករដាំដុះបានគ្រប់រដូវកាល និងអាចផ្តល់ផលបានច្រើនជាងដាំលើដីវាលធម្មតា។ បើតាមការអះអាងរបស់ក្រុមកសិ…
នាជំនួបពិភាក្សាការងារជាមួយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា លោក Masato Kanda ប្រធានធនាគារអភិវឌ្ឍន៍អាស៊ី (ADB) បានគូសបញ្ជាក់ថា ស្របពេលមានការប្រកួតប្រជែងជាសកលកាន់តែខ្លាំង ភាពជាអ្នកដឹកនាំដ៏រឹងមាំ និងការប្តេជ្ញាចិត្តចំពោះការអភិវឌ្ឍដែលផ្តោតលើពលរដ្ឋជាមូលដ្ឋាន គឺជាការចាំបាច់ ហើយ ADB ប្តេជ្ញាជួយកម្ពុជា ក្នុងការពង្រឹងសេដ្ឋកិច្ច និងបង្កើតឱកាសថ្មីៗ ជាពិសេសសម្រាប់ប្រជាពលរដ្ឋក្រីក្រ និងងាយរងគ្រោះបំផុត។ ជាមួយគ្នានេះ លោក Masato Kanda និងសម្តេចធិបតី ហ៊ុន ម៉ាណែត បានពិភាក្សាគ្នាលើបញ្ហាការធ្វើឱ្យមានតុល្យភាពកំណើនសេដ្ឋកិច្ច ជាមួយនឹងនិរន្តរភាពអេកូឡូស៊ី និងការអភិរក្សវប្បធម៌ និងបានទទួលស្គាល់ពីសារៈសំខាន់នៃកិច្ចសហប្រតិបត្តិការក្នុងវិស័យថាមពលក្នុងតំបន់ រួមទាំងការចូលរួមរបស់កម្ពុជា នៅក្នុងបណ្តាញថាមពលអាស៊ាន ដើម្បីបង្កើនលទ្ធភាពទទួលបាន និងសន្តិសុខថាមពលផងដែរ។
ដោយឡែកនៅក្នុងជំនួបពិភាក្សាជាមួយលោកជំទាវ ជា សិរី ទេសាភិបាលធនាគារជាតិនៃកម្ពុជា លោក Masato Kanda បានវាយតម្លៃខ្ពស់ចំពោះវឌ្ឍនភាពនៃប្រព័ន្ធធនាគារ និងប្រព័ន្ធទូទាត់សងប្រាក់នៅកម្ពុជា ដែលបានជួយគាំទ្រការរីកចម្រើននៃសេដ្ឋកិច្ច ការធ្វើពាណិជ្ជកម្ម និងជំរុញបរិយាបន្នហិរញ្ញវត្ថុ។ ជាពិសេស ប្រព័ន្ធបាគង បានក្លាយជាគំរូជោគជ័យមួយសម្រាប់ការសិក្សាដកយកបទពិសោធន៍ ចំពោះប្រទេសកំពុងអភិវឌ្ឍមួយចំនួន។ បើតាមលោក Masato Kanda ធនាគារ ADB នឹងបន្តចូលរួមចំណែកយ៉ាងសកម្មក្នុងការគាំទ្រការអភិវឌ្ឍវិស័យហិរញ្ញវត្ថុ និងសេដ្ឋកិច្ចរបស់កម្ពុជា។
ជាមួយគ្នានេះ លោកជំទាវ ជា សិរី ទេសាភិបាលធនាគារជាតិនៃកម្ពុជា បានគូសបញ្ជាក់ថា ធនាគារអភិវឌ្ឍន៍អាស៊ី បានចូលរួមចំណែកជួយគាំទ្រដល់ការអភិវឌ្ឍសេដ្ឋកិច្ចកម្ពុជា តាំងពីទសវត្សរ៍ឆ្នាំ១៩៩០ រហូតមក តាមរយៈការផ្តល់នូវជំនួយបច្ចេកទេស និងហិរញ្ញប្បទានទៅដល់គម្រោងអភិវឌ្ឍន៍ជាច្រើន។ លើសពីនេះ ADB ក៏បានរួមចំណែកជួយអភិវឌ្ឍប្រព័ន្ធធនាគារ តាមរយៈការជួយរៀបចំបទប្បញ្ញត្តិសម្រាប់អភិវឌ្ឍវិស័យមីក្រូហិរញ្ញវត្ថុ ដែលធ្វើឱ្យកម្ពុជា ក្លាយជាប្រទេសដំបូងបង្អស់លើពិភពលោកដែលមានបទប្បញ្ញត្តិលើវិស័យនេះ។ ទន្ទឹមនឹងនេះ លោកជំទាវ ក៏បានរំលេចពីការចូលរួមរបស់ ADB ក្នុងការជួយអភិវឌ្ឍវិស័យកសិកម្មនាពេលកន្លងមក ព្រមទាំងបានស្នើឱ្យមានការបន្តចូលរួមគាំទ្របន្ថែមទៀតដល់វិស័យចម្បងសម្រាប់សេដ្ឋកិច្ចកម្ពុជាមួយនេះ។
គួរជម្រាបថា គម្រោងដែលជួយគាំទ្រដោយ ADB នៅកម្ពុជា មានការកើនឡើងដល់តម្លៃសរុបប្រមាណ ២,២ពាន់លានដុល្លារ គិតមកដល់ពេលនេះ។ ក្នុងរយៈពេល៣ឆ្នាំកន្លងមក ការសន្យាផ្តល់ហិរញ្ញប្បទានរបស់ ADB សម្រាប់វិស័យសាធារណៈនៅកម្ពុជា មានជាមធ្យមប្រហែល៣៥០លានដុល្លារក្នុងមួយឆ្នាំ។ យុទ្ធសាស្ត្រភាពជាដៃគូសម្រាប់អភិវឌ្ឍន៍កម្ពុជា របស់ ADB ឆ្នាំ២០២៤-២០២៨ បានគូសបញ្ជាក់ពីការប្តេជ្ញាចិត្តជាយុទ្ធសាស្ត្ររបស់ខ្លួនចំពោះការអភិវឌ្ឍរបស់ប្រទេសកម្ពុជា៕
