ប្រទេសវៀតណាម គឺជាទិសដៅវិនិយោគដ៏ធំបំផុតមួយរបស់ក្រុមហ៊ុនជប៉ុន AEON ដោយបច្ចុប្បន្នក្រុមហ៊ុននេះ បានបោះទុនវិនិយោគនៅក្នុងប្រទេសក្បែរខាងកម្ពុជាមួយនេះប្រមាណជិត ១ពាន់២រយលានដុល្លារ ដោយកំពុងប្រតិបត្តិការលើមជ្ឈមណ្ឌលលក់ទំនិញចំនួន៦ទីតាំងនៅក្នុងទីក្រុង និងខេត្តសំខាន់ៗរបស់វៀតណាម ដូចជា ទីក្រុងហានូយ, ហូជីមិញ, ហៃផុង និងខេត្ត ធួរ ធៀន ហឺ ជាដើម។ នេះបើតាមការអះអាងរបស់លោកយូហ្ស៊ីដា អាគីអូ (Yoshida Akio) តំណាងអគ្គនាយកប្រតិបត្តិក្រុមហ៊ុន AEON នៅអំឡុងជំនួបទល់មុខជាមួយនឹងនាយករដ្ឋមន្ត្រីវៀតណាមលោក ផាម មិញជីងកាលពីថ្ងៃទី ២០ ខែឧសភា។
តំណាងក្រុមហ៊ុន AEON រូបនេះបានអះអាងថា ក្រុមហ៊ុនខ្លួនគ្រោងនឹងពង្រីកការវិនិយោគមជ្ឈមណ្ឌលលក់ទំនិញនៅវៀតណាម ២០សាខាបន្ថែមទៀត ពីលើសាខាដែលមានស្រាប់៦សាខានាពេលបច្ចុប្បន្ន។
អត្ថបទគួរអាន
នៅពេលដែលឭការលើកឡើងយ៉ាងដូច្នេះ លោក ផាម មិញជីង នាយករដ្ឋមន្ត្រីវៀតណាម ក៏បានស្នើឲ្យក្រុមហ៊ុន AEON ជ្រើសរើសវៀតណាមធ្វើជាមជ្ឈមណ្ឌលពាណិជ្ជកម្មសកលរបស់ខ្លួន និងបន្ដវិនិយោគលើមជ្ឈមណ្ឌលលក់ទំនិញបន្ថែមទៀតនៅក្នុងទីក្រុង និងខេត្តមួយចំនួនដែលប្រជាជនមានកម្រិតជីវភាពខ្ពស់។
នាយករដ្ឋមន្ត្រីវៀតណាម ក៏បានស្នើឲ្យក្រុមហ៊ុនជប៉ុនមួយនេះ នាំយកផលិតផលវៀតណាមទៅកាន់ខ្សែចង្វាក់ផ្គត់ផ្គង់ពិភពលោក ជាពិសេសទំនិញសំខាន់របស់វៀតណាមដូចជា វាយនភណ្ឌ ស្បែកជើង ផលិតផលកសិកម្ម និងជលផលជាដើម។
ក្រៅតែពីផែនការអភិវឌ្ឍន៍មជ្ឈមណ្ឌលលក់ទំនិញបន្ថែម ២០សាខានៅក្នុងប្រទេសវៀតណាមនាពេលអនាគតហើយនោះ លោក យ៉ូហ្ស៊ីដា តំណាងក្រុមហ៊ុន AEON បានអះអាងថា ក្រុមហ៊ុនរបស់លោក នឹងពង្រីកការនាំចូលទំនិញរបស់វៀតណាម សម្រាប់ចែកចាយទៅកាន់មជ្ឈមណ្ឌលលក់ទំនិញ ២ម៉ឺនកន្លែងរបស់ខ្លួននៅក្នុងប្រទេសជប៉ុន រួមទាំងការផ្ដល់ជូនអាហារូបករណ៍ ដល់ប្រទេសវៀតណាមសម្រាប់ការបណ្ដុះបណ្ដាលធនធានមនុស្ស ដូចដែលបានស្នើឡើងដោយថ្នាក់ដឹកនាំវៀតណាមផងដែរ៕
