Advertisement
ការថយចុះនៃវិស័យអចលនទ្រព្យ

ឧកញ៉ា សៀ ឫទ្ធី៖ កំណើនវិស័យអចលនទ្រព្យកម្ពុជាក្នុងឆ្នាំ ២០១៩ អាចនឹងថយចុះ


សេដ្ឋីអចលនទ្រព្យលេចធ្លោជាងគេនៅកម្ពុជា លោកឧកញ៉ា សៀ ឫទ្ធី បានប្រមើលមើលថា នៅឆ្នាំ២០១៩នេះ កំណើននៅក្នុងវិស័យអចលនទ្រព្យកម្ពុជា អាចនឹងថយចុះជាងមុន ពោលគឺអាចនឹងមិនមានកំណើនខ្ពស់ដូចឆ្នាំ ២០១៨នោះឡើយ។
ទិដ្ឋភាព​រាជ​ធានី​ភ្នំពេញ​​មើល​ពី​លើ​អគារ​ខ្ពស់​នៅ​កណ្ដាល​ក្រុង។ រូបភាព៖ ហេង ភារម្យ​
ដោយ
Advertisement

លោកឧកញ៉ា សៀ ឫទ្ធី ប្រធាន​ក្រុមប្រឹក្សាភិបាល និងជាអគ្គនាយក​ក្រុមហ៊ុន WorldBridge Group បានឲ្យដឹង​ថា កំណើននិរន្តភាព​នៃវិស័យ​អចលនទ្រព្យ​២០១៨កន្លងទៅ វាអាច​នឹងជះ​ឥទ្ធិពល​ដល់​​ឆ្នាំ២០១៩ និង២០២០ ខាងមុខទៀត ដោយហេតុថា​ នៅមាន​គម្រោង​អភិវឌ្ឍន៍​ជាច្រើន ដែល​មិនទាន់​បាន​បញ្ចប់​នៅក្នុង​ឆ្នាំ​២០១៨​នៅឡើយ ដូចនេះ​វានឹង​នៅតែ​បន្ត​ក្នុង​ឆ្នាំ​២០១៩​​ទៀត។

ប្រធាន​​​ក្រុមប្រឹក្សា​ភិបាល​​នៃ​ក្រុមហ៊ុន WorldBridge Group ឧកញ៉ា សៀ ឫទ្ធី បានឲ្យ​​ដឹងទៀត​ថា បើទោះបីជា កាល​ពីឆ្នាំ​២០១៨ មានការ​បោះឆ្នោត​ថ្នាក់​ជាតិ​ក៏ដោយ តែមិន​បានផ្តល់​ផល​ប៉ះ​ពាល់​ដល់​វិស័យ​អចលនទ្រព្យ​នោះទេ ដោយ​លោក​ឧកញ៉ា​បាន​បញ្ជាក់ថា ការទិញដូរ ការលក់​​ក្នុង​វិស័យនេះ​ គឺនៅរក្សា​កំណើន​​ដដែល។ 

ជាមួយគ្នានេះដែរ វិស័យ​សេដ្ឋកិច្ច​ក៏មាន​កំណើន​ដូចគ្នា​ដែរ ដោយកន្លង​មក GDP ក្នុង​ឆ្នាំ​ ២០១៨​ គឺមាន ៧,៣ ភាគរយ ដែលជា​កំណើន​មួយខ្ពស់​ជាង​ឆ្នាំ ២០១៧ ដូចនេះ វិស័យ​អចលនទ្រព្យ​ក្នុង​​ឆ្នាំ២០១៨ គឺអាច​ចាត់ទុកថា មាន​កំណើន​និរន្តរ​ភាព។

ប្រធាន​ក្រុមប្រឹក្សា​ភិបាល​នៃក្រុមហ៊ុន WorldBridge Group បាន​បន្តថា សម្រាប់​ឆ្នាំ ២០១៩នេះ          វិស័យ​អចលទ្រព្យ ទាំងការ​អភិវឌ្ឍ​ដីធ្លី ការ​អភិវឌ្ឍ​លំនៅដ្ឋាន គឺនឹង​នៅតែ​បន្ត​មាន​កំណើន ជាបន្ត​ទៀត តែភាគច្រើន​គម្រោង​ទាំងនោះ គឺជាការ​អភិវឌ្ឍ​បន្ត​មក​ពី​ឆ្នាំ២០១៨។ ដូចនេះ កំណើន​វិស័យ​អចលនទ្រព្យ​របស់​កម្ពុជា​ក្នុង​ឆ្នាំ​ ២០១៩ អាច​នឹងមិន​មាន​ច្រើន​ដូច​ក្នុង​ឆ្នាំ២០១៨​កន្លង​ទៅ​នោះឡើយ។

របាយការណ៍​ក្រសួង​រៀប​ចំ​ដែន​ដី នគរូបនីយកម្ម និង​សំណង់​បង្ហាញ​ថា នៅឆ្នាំ២០១៨ តម្លៃ​ទុនវិនិយោគ​លើវិស័យ​សំណង់​មាន​ការថយចុះ​ប្រមាណ​ជាង ១៨ភាគរយ ពោលគឺ​មាន​តម្លៃ​ទុន​វិនិយោគ​ត្រឹមជាង ៥ពាន់​លានដុល្លារ ខណៈឆ្នាំ​២០១៧ តម្លៃទុន​វិនិយោគ​មាន​រហូតជាង ៦ពាន់លានដុល្លារ។

តាមរបាយការណ៍ដដែល​ ចំនួន​គម្រោង ស្នើសុំ​ច្បាប់​សាងសង់​នៅក្នុង​វិស័យ​សំណង់ ក៏បង្ហាញ​ពីតួរលេខ​ថយចុះដែរ ដែល​ជាក់ស្តែង​នៅឆ្នាំ ២០១៨ ចំនួន​គម្រោង​សរុប​មាន​ជាង ២.៨៦៧ គម្រោង ជាមួយនឹងផ្ទៃ​ក្រឡា​ជាង ១១លាន​ម៉ែត្រ​ការ៉េ ខណៈ ឆ្នាំ​២០១៧ មាន​គម្រោង​សរុប​រហូត​ជាង ៣ពាន់​គម្រោង ​ជាមួយ​ផ្ទៃក្រឡា​សំណង់​ជាង ១០លាន​ម៉ែត្រ​ការ៉េ។

ប៉ុន្តែយ៉ាងណា ការថយ​ចុះនៃ​តម្លៃទុន​វិនិយោគ​នេះ ត្រូវ​បាន​អ្នក​ជំនាញ​អភិវឌ្ឍន៍​​វិស័យ​​សំណង់​អះអាងថា មិនចោទ​ជាបញ្ហា​ធំ​ដល់​វិស័យ​សំណង់​នោះ​ឡើយ៕

Advertisement
© 2019 រក្សាសិទ្ធិ​គ្រប់​បែប​យ៉ាង​ដោយ ខេមបូណូមីស។ សម្រាប់​ការ​ប្រើ​ប្រាស់ ឬ​ផ្សាយ​បន្ត សូមទាក់ទង​មក អ៊ីម៉េល sothea[at]cambonomist.com ឬទូរស័ព្ទលេខ​ 089 777 076។



អត្ថបទបន្ទាប់


វៀតណាម នឹងធ្វើជាម្ចាស់ផ្ទះផ្លូវការ ក្នុងជំនួបលើកទី២ រវាង Donald Trump និង Kim Jong Un

ព័ត៌មាន
វាហាក់បីដូចជារឿងមួយ ដែលមានមុខមានមាត់ណាស់ដែរ សម្រាប់ប្រទេសវៀតណាម ដែលនឹងធ្វើជាម្ចាស់ផ្ទះក្នុងជំនួបលើកទី២ រវាងកំពូលមេដឹកនាំអាមេរិក ...

រោងចក្រចំនួន៨ តម្លៃជិត ៥០ លានដុល្លារ ត្រូវបាន CDC អនុម័តឲ្យបើកដំណើរការផ្លូវការ នាដើមខែកុម្ភៈនេះ

ព័ត៌មាន
គិតត្រឹមថ្ងៃទី ៧ ក្នុងខែកុម្ភៈ ឆ្នាំនេះ ក្រុមប្រឹក្សាអភិវឌ្ឍន៍កម្ពុជា (CDC) បានសម្រេចចេញវិញ្ញាបនប័ត្រចុះបញ្ជីជាស្ថាពរ ដល់រោងចក្រធំៗចំនួន៨ ...
ច្រើនទៀត

អត្ថបទស្រដៀង


ផ្សេងទៀត


ច្រើនទៀត

ពេញនិយមបំផុត


ច្រើនទៀត

ថ្មីៗ