ជាការពិត ដំណើរទស្សនកិច្ចរបស់ ហ្សេឡិនស្គី មកជួបលោកត្រាំដល់ផ្ទះនេះ ត្រូវបានគេមើលឃើញថា ជាឱកាសមួយ ដើម្បីបញ្ចុះបញ្ចូលសហរដ្ឋអាមេរិកកុំឱ្យឈរនៅខាងប្រធានាធិបតីរុស្ស៊ីលោក ពូទីន ដែលបានបញ្ជាឱ្យឈ្លានពានអ៊ុយក្រែនកាលពីបីឆ្នាំមុន។
ផ្ទុយទៅវិញ លោកត្រាំ និងអនុប្រធានាធិបតីអាមេរិក លោក JD Vance បាននិយាយសង្កត់លោក ហ្សេឡិនស្គីជាប់ និងបានស្ដីបន្ទោសថា មេដឹកនាំទីក្រុងគៀវរូបនេះ មិនបានបង្ហាញការគោរពចំពោះសហរដ្ឋអាមេរិក ហើយបញ្ហានេះ បានធ្វើឲ្យទំនាក់ទំនងរវាងទីក្រុងគៀវ និងវ៉ាស៊ីនតោនកាន់តែធ្លាក់ចុះដល់កម្រិតទាបថ្មីមួយទៀត។
ការប្រកែកគ្នារវាងលោក ហ្សេឡិនស្គី និងលោកត្រាំ បានកើតឡើង នៅក្រោយពេលដែលលោក ហ្សេឡិនស្គី បានលើកឡើងថា លោកប្រធានាធិបតីរុស្ស៊ី ពូទីន គឺជាមនុស្សមិនអាចទុកចិត្តបានឡើយ ហើយលោកបានបង្ហាញការកត់សម្គាល់ថា លោក JD Vance អនុប្រធានាធិបតីអាមេរិកពុំបានទស្សនកិច្ចនៅអ៊ុយក្រែន ក្រោយសង្គ្រាមផ្ទុះឡើងនោះទេ។
លោក ហ្សេឡិនកស្គី បានសួរទៅអនុប្រធានាធិបតីអាមេរិក លោក Vance នៅក្រោយពេលរំលឹកឡើងពីការបរាជ័យ ក្នុងកិច្ចខិតខំប្រឹងប្រែងការទូតជាមួយរុស្ស៊ីថា « តើអ្នកកំពុងនិយាយអំពីការទូតបែបណា ?» លោក Vance ក៏តបភ្លាមៗវិញថា «ខ្ញុំកំពុងនិយាយអំពីប្រភេទការទូត ដែលនឹងបញ្ចប់ការបំផ្លិចបំផ្លាញប្រទេសរបស់អ្នក»។
អត្ថបទគួរអាន
បន្ទាប់មក លោក ហ្សេឡិនស្គី ក៏បានជំទាស់ដោយបើកចំហ ហើយបាននិយាយទទូចទៅកាន់លោកត្រាំ ដែលនៅក្បែរលោក Vance ថា «កុំធ្វើសម្បទានជាមួយឃាតកឲ្យសោះ»។
ពេលនោះ លោកត្រាំ បានកាត់សម្ដីលោក ហ្សេឡិនស្គី បានដោយបានបញ្ជាក់ថា ពុំចាំបាច់ប្រាប់ពីអ្វីដែលសហរដ្ឋអាមេរិកត្រូវធ្វើនោះទេ។ លោកត្រាំបាននិយាយសង្កត់លោក ហ្សេឡិនស្គីទៀតថា «អ្នកមិនឈរនៅចំណុចល្អទេនាពេលនេះ! អ្នកគ្មានសន្លឹកបៀរអ្វីទេពេលនេះ! ជាមួយយើង គឺអ្នកទើបតែចាប់ផ្ដើមមានសន្លឹកបៀរតែប៉ុណ្ណោះ។»
លោក ហ្សេឡិនស្គី បាននិយាយប្រកែកតាមក្រោយថា «ខ្ញុំមិនបានលេងសន្លឹកបៀរអីទេ ខ្ញុំនិយាយមែន លោកប្រធានាធិបតី»។ ប៉ុន្ដែ លោកត្រាំ បានបន្ថែមថា «អ្នកកំពុងលេងសន្លឹកបៀរ! អ្នកកំពុងលេងល្បែងជាមួយនឹងជីវិតមនុស្សរាប់លាននាក់, អ្នកកំពុងលេងល្បែងជាមួយនឹងសង្គ្រាមលោកលើកទី៣ហើយ!»។
ទោះយ៉ាងណា ក្រោយជំនួបដ៏ចម្រូងចម្រាសនេះ លោកត្រាំ បានសរសេរនៅលើបណ្ដាញសង្គមផ្លូវការរបស់លោកថា «វាគឺជារឿងដ៏អស្ចារ្យមួយ ដែលការសន្ទនារបស់លោកជាមួយនឹងលោក ហ្សេឡិនស្គី បានបង្ហាញឲ្យឃើញពីការរំជួលចិត្ត ប៉ុន្ដែ លោកបញ្ជាក់ថា លោក ហ្សេឡិនស្គី មិនទាន់ត្រៀមខ្លួនរួចរាល់សម្រាប់សន្ដិភាព ដែលមានការចូលរួមពីសហរដ្ឋអាមេរិកនោះទេ ព្រោះគាត់យល់ថា ការចូលរួមរបស់អាមេរិក គឺនឹងផ្ដល់ឲ្យគាត់នូវផលចំណេញសម្រាប់ការចរចាសន្ដិភាព។ លោកត្រាំសង្កត់ធ្ងន់ថា «ខ្ញុំមិនចង់បានផលប្រយោជន៍ទេ! ខ្ញុំចង់បានសន្ដិភាព!» លោកត្រាំបានបន្ថែមថា លោក ហ្សេឡិនស្គី មិនបានគោរពសហរដ្ឋអាមេរិក នៅក្នុងការិយាល័យប្រធានាធិបតីឡើយ! ប៉ុន្ដែ លោកថា មេដឹកនាំអ៊ុយក្រែនរូបនេះ អាចត្រឡប់មកវិញបាន នៅពេលដែលគាត់ត្រៀមខ្លួនរួចរាល់សម្រាប់សន្ដិភាព»។
ដោយឡែក មេដឹកនាំអឺរ៉ុបវិញ បានបង្ហាញពីជំហរគាំទ្រអ៊ុយក្រែន តួយ៉ាង អធិការបតីអាល្លឺម៉ង់ លោក Friedrich Merz បាននិយាយថា «យើងមិនត្រូវច្រឡំអ្នកឈ្លានពាន និងជនរងគ្រោះ នៅក្នុងសង្គ្រាមដ៏អាក្រក់នោះឡើយ»។
