អ្នកជំនាញកសិកម្ម លើកទឹកចិត្តឱ្យម្ចាស់ចម្ការទុរេន ចេះចែករំលែកបទពិសោធន៍គ្នាទៅវិញទៅមក ដើម្បីរីកចម្រើនទាំងអស់គ្នា

ដោយមើលឃើញពីសារសំខាន់នេះ ក្រុមហ៊ុន យូ-ធី ក្រប ប្រឹថេកសិន កាលពីថ្ងៃទី ១១ ខែ មិថុនា ឆ្នាំ២០២៥ បានរៀបចំនូវកម្មវិធី ទស្សនាចម្ការបង្ហាញបច្ចេកទេសដំណាំទុរេន នៅភូមិកណ្ដាល ឃុំថ្មដា ស្រុកវាលវែង ខេត្តពោធិ៍សាត់ ដើម្បីផ្ដល់ឱកាស​ឱ្យ​ម្ចាស់ចម្ការបានជួបគ្នាផ្លាស់ប្ដូរយោបល់ និងទទួល​បានការណែនាំពីអ្នកជំនាញផ្នែកជីថ្នាំកសិកម្ម ដើម្បីធ្វើឱ្យការដាំដុះ និងថែទាំទុរេន​កាន់តែមានប្រសិទ្ធភាព និងទទួលបានទិន្នផលខ្ពស់។

លោក ឡេង សាម៉ុន ប្រធានផ្នែកទីផ្សារ និងបច្ចេកទេស នៃក្រុមហ៊ុន យូ-ធី ក្រប ប្រឹថេកសិន បានលើកឡើងថា នេះ គឺជាលើកទី២ហើយ ដែលក្រុមហ៊ុន បានរៀបចំកម្មវិធី ទស្សនាចម្ការបង្ហាញ​បច្ចេកទេសដំណាំទុរេន ខណៈកាលពីលើកទី១ រៀបចំឡើងនៅក្នុងស្រុកស្ទឹងត្រង់ ខេត្តកំពង់ចាម។ លោក សាម៉ុន បន្ថែមថា គោលបំណងសំខាន់នៃការរៀបចំកម្មវិធីនេះឡើង គឺជាការបង្ហាញ​​នូវវប្បធម៌​ចែករំលែកផ្នែកបច្ចេកទេស​​នៅក្នុងវិស័យកសិកម្ម ពិសេសសម្រាប់​ម្ចាស់ចម្ការទុរេន ដើម្បីធ្វើឱ្យការដាំដុះ​ទុរេនទទួលបានគុណភាពខ្ពស់ មាននិរន្តរភាព ដែលអាចបំពេញ​ស្របតាមតម្រូវការ​ទីផ្សារ​នាំចេញ​ទៅក្រៅប្រទេសនាពេលខាងមុខ។

លោក ឡេង សាម៉ុន អះអាងទៀតថា ក្រុមហ៊ុន យូ-ធី ក្រប ប្រឹថេកសិន មានក្រុមការងារបច្ចេកទេស​ជំនាញ​ផ្នែកថែទាំដំណាំ ដែលតែងតែចុះផ្ទាល់ជួយដល់កសិករ និងនៅជាប់ជាមួយនឹងកសិករ ដើម្បីដោះស្រាយបញ្ហានានាប្រឈមនានានៅក្នុងការដាំដុះ និងថែទាំដំណាំ។ មិនត្រឹមតែប៉ុណ្ណោះ​ ក្រុមហ៊ុន​ក៏មានដៃគូសហការពីក្រៅប្រទេស​ជាច្រើនដូចជា ថៃ ចិន អាម៉េរិក និងអូស្ត្រាលីជាដើម។ លោកបន្ថែមថា កត្តាខាងលើទាំងអស់នេះហើយ បានធ្វើឱ្យ​ផលិតផលរបស់ក្រុមហ៊ុន យូ-ធី ក្រប ប្រឹថេកសិន ទទួលបាន​គាំទ្រប្រកបដោយទំនុកចិត្តខ្ពស់ពីកសិករ។

លោក សំ ខឿន (ហៅ ម៉ក់) ម្ចាស់ចម្ការទុរេន​នៅឃុំថ្មដា ស្រុកវាលវែង ខេត្តពោធិ៍សាត់ ដែលបានចូលរួមកម្មវិធី ទស្សនាចម្ការបង្ហាញបច្ចេកទេសដំណាំទុរេន បានបង្ហាញពីក្ដី​សប្បាយរីករាយ និងបានចាត់ទុកកម្មវិធីនេះ គឺជាការជួបជុំដ៏ល្អមួយសម្រាប់​ការចែករំលែកគន្លឹះបទ​ពិសោធន៍​ល្អៗ​ ទាំងវិធីសាស្ត្រថែទាំ និងការប្រើប្រាស់ជីថ្នាំបានចំគោលដៅ ក្នុងការព្យាបាលជំងឺផ្សេងៗ ដែលតែងតែ​កើតមានលើដំណាំទុរេន។

ជាមួយគ្នានេះ លោក អាន សុខណា (ហៅ ផាន់ណា) ម្ចាស់ចម្ការទុរេន​នៅឃុំថ្មដា ស្រុកវាលវែង ខេត្តពោធិ៍សាត់ បានគូសបញ្ជាក់ដែរថា ក្រៅតែពីផ្ដល់នូវគន្លឹះបច្ចេកទេសលើការថែទាំទុរេន កម្មវិធីដែលរៀបចំឡើងដោយក្រុមហ៊ុន យូ-ធី ក្រប ប្រឹថេកសិននេះ ក៏ជាផ្នែកមួយដ៏សំខាន់ ក្នុងការចូលរួមផ្សព្វផ្សាយ​ទុរេន​នៅតំបន់ថ្មដា ទៅកាន់​ប្រជាពលរដ្ឋឱ្យបានដឹងកាន់តែច្រើន ដ្បិតកន្លងមក ទុរេនថ្មដា ពុំសូវមានអ្នកបានស្គាល់ច្រើនឡើយទេ។

តំបន់ថ្មដា ស្រុកវាលវែង ខេត្តពោធិ៍សាត់ គឺជាតំបន់ភ្នំ ដែលមាន​អាកាសធាតុ​ពុំសូវអំណោយផល​នោះឡើយ សម្រាប់ដំណាំទុរេន ប៉ុន្ដែ តាមរយៈការ អនុវត្តបច្ចេកទេស​បានត្រឹមត្រូវ ដោយមាន​ការប្រឹក្សាយោបល់ និងគាំទ្រពីអ្នកជំនាញកសិកម្មរបស់ក្រុមហ៊ុន យូ-ធី ក្រប ប្រឹថេកសិន បានជួយឱ្យ​ដំណាំទុរេនស្រុកថ្មដារ អាចដាំដុះបានជាមួយទិន្នផលល្អ និងគុណភាពខ្ពស់ មិនចាញ់ទុរេន​នៅតំបន់ ឬបណ្ដាខេត្តផ្សេងទៀតនោះឡើយ។

ក្រុមហ៊ុន U-T Crop Protections ជាក្រុមហ៊ុនជីថ្នាំកសិកម្មដ៏ធំនៅកម្ពុជា ដោយផ្ដោតលើការ​ផ្ដល់ដំណោះស្រាយ​បច្ចេកទេស និងបច្ចេកវិទ្យាថ្មីៗ សម្រាប់ជួយឱ្យដំណាំរបស់កសិករ ទទួលបានទិន្នផលខ្ពស់ គុណភាពល្អ ប្រកបដោយនិរន្ដរភាព។ ក្រុមហ៊ុន U-T Crop Protections ក៏មានការសហការជាមួយដៃគូពាណិជ្ជកម្មធំៗជាច្រើន​នៅក្រៅប្រទេស ដូចជាថៃ ចិន អាម៉េរិក និងអូស្ត្រាលីជាដើម៕