នេះជាកិច្ចព្រមព្រៀងដំបូងបង្អស់របស់ជប៉ុន ដែលពាក់ព័ន្ធនឹងវត្តមានកងកម្លាំងយោធាបរទេសនៅលើទឹកដីរបស់ខ្លួន ចាប់តាំងពីកិច្ចព្រៀមព្រៀងមួយ នៅឆ្នាំ១៩៦០ ដែលអនុញ្ញាតឲ្យសហរដ្ឋអាមេរិកដាក់មូលដ្ឋានទ័ព យន្តហោះចម្បាំង និងនាវាចម្បាំងនៅក្នុងប្រទេសជប៉ុន ។
កតិកាសញ្ញាយោធាអូស្ត្រាលី-ជប៉ុន អនុញ្ញាតឲ្យប្រទេសទាំងពីរបញ្ជូនកងទ័ពទៅទស្សនកិច្ចនៅក្នុងប្រទេសរបស់ខ្លួនទៅវិញទៅមក ដើម្បីហ្វឹកហ្វឺន និងធ្វើប្រតិបត្តិការរួមគ្នាផ្សេងៗ ។ មន្ត្រីរដ្ឋាភិបាលនៃប្រទេសទាំងពីរ បានចំណាយពេល ៦ឆ្នាំ ចរចាគ្នាអំពីកតិកាសញ្ញានេះ ។
អត្ថបទទាក់ទង
កតិកាសញ្ញាយោធាអូស្ត្រាលី-ជប៉ុននេះ ត្រូវបានយល់ព្រមគ្នាជាគោលការណ៍ ដោយនាយករដ្ឋមន្ត្រីប្រទេសទាំងពីរ នៅខណៈដែលនាយករដ្ឋមន្ត្រីអូស្ត្រាលី លោក Scott Morrison បានធ្វើទស្សនកិច្ចទៅកាន់ប្រទេសជប៉ុន និងជួបជាមួយនាយករដ្ឋមន្ត្រីជប៉ុន លោក Yoshihide Suga កាលពីថ្ងៃទី១៧ វិច្ឆិកា ឆ្នាំ២០២០ ។
ប្រព័ន្ធផ្សព្វផ្សាយរបស់រដ្ឋចិន បានរិះគន់កតិកាសញ្ញាអូស្ត្រាលី-ជប៉ុន ដោយនិយាយថា កតិកាសញ្ញានេះ"តម្រង់គោលដៅទៅរកប្រទេសចិនយ៉ាងច្បាស់" និង "បង្កើនល្បឿននៃបរិយាកាសប្រឈមមុខគ្នានៅក្នុងតំបន់អាស៊ី-ប៉ាស៊ីហ្វិក ។"
ទំនាក់ទំនងរវាងរដ្ឋាភិបាលក្រុងកង់ប៊ែរ៉ា និងរដ្ឋាភិបាលក្រុងប៉េកាំង បានធ្លាក់ចុះកាន់តែដុនដាប បន្ទាប់ពីមានការចោទប្រកាន់ពីការជ្រៀតជ្រែករបស់ចិនទៅក្នុងនយោបាយក្នុងស្រុករបស់អូស្ត្រាលី និងការអំពាវនាវរបស់អូស្ត្រាលី ឲ្យមានការស៊ើបអង្កេតរកប្រភពដើមនៃជំងឺរាតត្បាតកូវីដ-១៩ ដែលគេបានរកឃើញករណីឆ្លងដំបូង នៅក្នុងប្រទេសចិន កាលពីជិតមួយឆ្នាំមុន ។
បន្ទាប់មក ចិនបានដាក់ទណ្ឌកម្មទៅលើការនាំចូលផលិតផលសំខាន់ៗពីប្រទេសអូស្ត្រាលី ក្នុងនោះរួមមាន ស្រា ស្រូវ barley និងផលិតផលកសិកម្មដទៃទៀត ។
ចិនគឺជាដៃគូពាណិជ្ជកម្មធំបំផុតទីមួយរបស់អូស្ត្រាលី រីឯជប៉ុន គឺជាដៃគូពាណិជ្ជកម្មធំបំផុតទីពីររបស់ខ្លួន ៕
