ក្រុមអ្នកជំនាញក្នុងវិស័យទេសចរណ៍ ជឿជាក់ថា ចង់ឬមិនចង់ តាមរយៈការភ្ជាប់ជើងហោះហើរនេះ វានឹងជួយពាំនាំភ្ញៀវទេសចរ និងអ្នកវិនិយោគមកកាន់ប្រទេសកម្ពុជា ជាពិសេសខេត្តព្រះសីហនុ កាន់តែច្រើនបន្ថែមទៀត។ តែយ៉ាងណាក្រុមអ្នកជំនាញស្នើឱ្យក្រសួងស្ថាប័នពាក់ព័ន្ធត្រួតពិនិត្យ និងគ្រប់គ្រងតម្លៃសេវាកម្ម និងទំនិញនៅខេត្តព្រះសីហនុ ឱ្យបានល្អប្រសើរ ដើម្បីបង្កើនភាពប្រកួតប្រជែង និងទាក់ទាញភ្ញៀវទេសចរឱ្យបានច្រើន និងយូរអង្វែង។
តាមការបញ្ជាក់របស់ក្រុមហ៊ុនអាកាសចរណ៍ AirAsia Cambodia កាលពីពេលថ្មីៗនេះបានឱ្យដឹងថា ក្រុមហ៊ុនខ្លួននឹងបើកដំណើរការជើងហោះហើរត្រង់ពីទីក្រុងគូឡាឡាំពួ ប្រទេសម៉ាឡេស៊ី មកកាន់ខេត្តព្រះសីហនុ ប្រទេសកម្ពុជា ចាប់ពីថ្ងៃទី៣ ខែកក្កដា ឆ្នាំ២០២៤ តទៅ ជាមួយការហោះហើរចំនួន ៣ជើងក្នុង១សប្តាហ៍ ដើម្បីជួយជំរុញកំណើនភ្ញៀវទេសចរ និងការធ្វើពាណិជ្ជកម្មរវាងប្រទេសទាំងពីរ។
លោកជំទាវ ឆាយ ស៊ីវលីន ប្រធានសមាគមទេចរណ៍កម្ពុជា បានចាត់ទុកបើកដំណើរការជើងហោះហើរពីទីក្រុងគូឡាឡាំពួ មកកាន់ខេត្តព្រះសីហនុនេះ គឺជាឱកាសល្អមួយក្នុងការស្រូបទាញភ្ញៀវទេសចរម៉ាឡេស៊ី និងភ្ញៀវអន្តរជាតិដ៏ទៃទៀត ឱ្យចូលមកកម្សាន្តនៅកម្ពុជា ជាពិសេសខេត្តព្រះសីហនុ។ សម្រាប់អ្នកជំនាញរូបនេះ ខេត្តព្រះសីហនុ សម្បូរដោយតំបន់ទេសចរណ៍ និងមានហេដ្ឋារចនាសម្ព័ន្ធបម្រើឱ្យវិស័យទេសចរណ៍សម្បូរបែប មិនចាញ់ខេត្តជាប់មាត់សមុទ្ររបស់ប្រទេសដ៏ទៃនោះទេ។
អត្ថបទគួរអាន
ជាមួយគ្នានេះ លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា បានគូសបញ្ជាក់ថា សម្រាប់ការតភ្ជាប់ជើងហោះហើរនេះ គឺជាក្តីសង្ឃឹមថ្មីមួយសម្រាប់ជួយជំរុញវិស័យទេសចរណ៍កម្ពុជា ឱ្យកាន់តែល្អប្រសើរ។ តែយ៉ាងណាអ្នកជំនាញរូបនេះ ស្នើឱ្យក្រសួងស្ថាប័នពាក់ព័ន្ធត្រូវមានការគិតគូរពីកង្វះខាតមួយចំនួន ជាពិសេសលើការប្រកួតប្រជែងតម្លៃសេវាកម្មទេសចរណ៍នៅក្នុងខេត្តព្រះសីហនុ ដែលហាក់មានតម្លៃខ្ពស់បើធៀបនឹងតម្លៃនៅប្រទេសម៉ាឡេស៊ី។ ការស្នើបែបនេះ គឺដើម្បីរក្សានិរន្តភាពក្នុងការទាក់ទាញភ្ញៀវទេសចរ និងការដំណើរការជើងហោះហើរពីគូឡាឡាំពួ មកកាន់ខេត្តនេះ។
បើតាមការគូសបញ្ជាក់របស់លោកជំទាវ ឆាយ ស៊ីវលីន ស្ថានភាពភ្ញៀវទេសចរអន្តរជាតិ ចូលមកកម្ពុជា តាមផ្លូវអាកាសនៅរយៈ៤ខែដំបូងឆ្នាំនេះ គឺមានស្ថានភាពល្អប្រសើរគួរឱ្យកត់សម្គាល់ ពោលគឺកម្ពុជាទទួលបានភ្ញៀវទេសចរអន្តរជាតិ តាមផ្លូវអាកាសប្រមាណជាង៨២ម៉ឺននាក់ មានការកើនឡើងជាង៣០% បើធៀបនឹងឆ្នាំមុន។ ការកើនឡើងនេះ ត្រូវបានអ្នកជំនាញរូបនេះ វាយតម្លៃថា គឺដោយសារមានការតភ្ជាប់ការហោះហើរត្រង់ចូលមកកម្ពុជា ជាបន្តបន្ទាប់។
សូមជម្រាបថា ក្រុមហ៊ុន AirAsia Cambodia កាលពីខែឧសភា កន្លងទៅនេះ បានចាប់ផ្តើមជើងហោះហើរប្រចាំថ្ងៃទៅមករវាងភ្នំពេញ-សៀមរាប ចំនួន៤ជើងក្នុងមួយថ្ងៃ និងទិសដៅទៅមកររវាងខេត្តព្រះសីហនុ-សៀមរាប ចំនួន៤ជើង ក្នុងមួយថ្ងៃផងដែរ៕
None
